توشہ خانہ توں کھلن والے نویں کٹّے

خالد حسین خان

سید رضی الدین میرے کالم دے مستقل قاری نیں تے میرے نال بہت سارے معاملیاں تے اختلاف رکھن دے باوجود میرے واسطے بڑے محترم نیں کہ اوہناں دی تنقید کدی وی دلیل تے احترام دے دائرے چوں باہر نہیں جاندی۔ ایمانداری دی گل اے کہ فی زمانہ مخالفین نوں زندہ درگور کر دین دی خواہش دے حامل ایس معاشرے وچ اجہے ناقد وی ہن غنیمت نیں تے اوہناں دی تنقید پڑھ کے وی تسلی ہوندی اے کہ تحمل‘ بردباری تے برداشت توں عاری ایس معاشرے وچ ایہ اوہ لوک نیں جہناں دے دم نال اختلاف تے دشمنی دے وچکار حد فاصل اپنا وجود قائم رکھے ہوئے نیں۔
سید رضی اک پنجابی لفظ ’’کاڈھو‘‘ دی عملی تفسیر نیں۔ پنجاب وچ کاڈھو اوس بندے نوں کہندے نیں جو کسے چیز دے اندر توں اجہی گل کڈھے جو عام بندے نوں وکھائی نہ دیندی ہووے تے معاملے نوں گہرائی وچ جا کے پرکھدے ہوئے اجہی نویں چیز دریافت کرے جو باقی لوکاں دیاں نظراں توں اولھے ہووے۔ مینوں اوہناں دی ایس صلاحیت تے حیرانی ایس لئی نہیں ہوندی کہ اوہ اینٹی فراڈ ایکسپرٹ نیں تے اوہناں دی دوربین نظراں بالکل اوس تھاں تے جا کے ٹھہردیاں نیں جتھے کوئی گڑ بڑ ہوندی اے‘ تسیں اک پیشے نال مستقبل وابستہ رہو تے تہاڈا مسلسل ارتکاز تہانوں اجہی صلاحیتاں عطا کر دیندا اے جہدے توں میرے ورگے لوک محروم ہوندے نیں۔
اوہناں نے مینوں اک واہوا تفصیلی خط لکھیا اے جہدے وچ اوہناں نے توشہ خانے توں فائدہ چکن والیاں دی چار سو چھتالی صفحیاں تے مشتمل لمی فہرست توں اجہے اجہے نیک ناواں دی فنکارانہ کاروائیاں دریافت کیتیاں نیں کہ بندہ حیران رہ جاندااے کہ کیسے کیسے بزعم خود پارساواں نے کہڑے کہڑے طریقے نال نجائز نوں جائز بنایا تے اپنی نام نہاد ایمانداری دا علم اچا کرن والے کیسے کیسے متقیاں نے ایس وگدی گنگا دے قواعد و ضوابط وچ ہیراپھیری کرکے اشنان کیتا۔ ایس خط دی روشنی وچ جدوں میں توشہ خانہ دے وکھووکھ ادوار دے قنون ویکھے تے اوہدے وچوں پتلی گلی دے راہیں مال کھسکان والیاں دیاں چلاکیاں ویکھیاں تے یقین کرو ایمانداری اُتوں تے اعتبار ای ختم ہو گیا کہ ہن بندہ کنہوں ایماندار سمجھے تے کنہوں بے ایماناں دے خانے وچ تھاں دیوے۔
عمران خان دی گھڑی دے معاملے وچ کیوں جے پہلے ای بہت کجھ لکھیا جا چکیا اے تے ایس سلسلے وچ جے کجھ سطراں میں ایس معاملے تے لکھاں تے اوہ ایہہ وے کہ جے عمران خان صاحب نے اوہ شہرہ آفاق گھڑیاں توشہ خانے وچ اوہناں دی رقم جمع کروان توں پہلاں بازار وچ ویچیاں تے اوہناں دی رقم بعد وچ جمع کروائی تے ایہ صاف بددیانتی‘ بے اصولی تے غیراخلاقی ہون دے نال نال غیرقنونی وی اے تے خاص طور تے ایس لئی وی کہ اٹھاراں دسمبر 2018ء نوں جو قواعد آپ اوہناں نے منظور کیتے اوہدی شق نمبر ست دے تحت اوہ ادائیگی توں پہلاں تحفے حاصل نہیں سن کر سکدے۔ ہن ایہدے تے ایہ کہنا کہ وزیراعظم کدھرے نسے تے نہیں جا رہے جے اوہناں نے پیسے بعد وچ وی جمع کروائے نیں تے ایہدے وچ کیہ حرج اے؟ تے ایس سلسلے وچ عرض اے کہ ایہ کوئی کاروبار نہیں کہ باہمی اعتبار تے اعتماد دی بنیاد تے مال پہلے چک کے بعد وچ ادائیگی دے باہمی اصولاں تے چلایا جاوے۔ ایہ سدھی سدھی قواعد و ضوابط دی خلاف ورزی اے تے ایہنوں کسے طرح وی ٹھیک نہیں کہیا جا سکدا۔ کیوں جے عمران خان دے بارے ایس موضوع تے بہت کجھ لکھیا وی جا چکیا اے تے گھڑی چور‘ گھڑی چور دا یناں رولا پایا جا چکیا اے کہ ایہدے تے ہور کجھ لکھنا ویلے تے کالم دی تھاں دا ضیاع اے۔ درج بالا تھوڑی جہی تفصیل صرف ایس لئی لکھی کہ کدھرے گھڑی چور دا رولا پان والے نیک تے پارسا لوک اپنیاںگھڑیاں دے غتربود دے پس منظر وچ مینوں ’’یوتھیا‘‘ قرار دے کے اپنی دو نمبریاں تے پردہ پان دی کوشش نہ کرن۔ خان دیاں گھڑیاں تے سیاسی رنگ بازی کرن والیاں دے اپنے ہتھ وی ایسے سیاہی نال رنگے ہوئے نیں۔ تقریباً ہر بندے نے اپنی مرضی نال قنوناں نوں تروڑ مروڑ تے جوڑ توڑ نال اپنے واسطے راہ بنا کے ملن والے تحفیاں نوں ایس غچہ بازی دے طفیل سستے مُل ہتھایا۔ ایمانداری دی گل اے کہ ایس فہرست وچ مینوں اپنے ’’گرائیں‘‘ سابق وزیراعظم سید یوسف رضا گیلانی دا ناں ویکھ کے تے اوہناں ولوں تحفیاں نوں مال غنیمت وانگوں گھر لے جان تے نہ تے افسوس ہویا تے نہ ای حیرت ہوئی کہ اوہناں ولوں ترک صدر دی بیوی ولوں دتا جان والا ہار چپکے نال گھر لے جان تے اوہنوں بدقت تمام واپس کرن ورگی حرکت مگروں مینوں اوہناں ولوں توشہ خانہ والے معاملے تے نہ تے حیرانی اے تے نہ ای افسوس کہ اوہناں دے بارے کسے قسم دا حسن ظن باقی ای نہیں تے افسوس یاں ملال کس گل دا؟ ایہو حال زرداری صاحب تے اپنے راجہ صاحب دا اے۔
دوستو! تسیں یقین کرو ہن عمر دے ایس حصے وچ مینوں اوہناں دا ناں واقعی یاد نہیں آ رہیا پر اوہناں دی عرفیت ضرور یاد اے۔ ایہناں حضرات توں وی ایس عاجز نوں کسے قسم دی کوئی چنگی امید نہیں سی ایس لئی اوہناں دے معاملیاں تے نہ تے ساڈے مہربان سید رضی نے ای کوئی دھیان دتا اے تے نہ ای مینوں کوئی دلچسپی اے۔ ایس سارے حیرت خانے وچ دو وڈیاں گلاں قابل غور نیں پہلی ایہ کہ ساڈے دوست شاہ محمود قریشی نے بہرحال اپنے پکے ٹھکے پیر ہون دا ثبوت دتا اے تے تحفے وچ ملن والی ہر مہنگی چیز خریدن دی تھاں اوہنوں توشہ خانہ وچ جمع کروا دتا تے ہر سستی تے مفت ملن والی چیز گھر لے گئے۔ دوجی حیرت انگیز گل ایہہ سی کہ عرصہ ویہہ پنجی ورھے توں حکومتی ایواناں دا مستقل حصہ رہن والے تے کشمیر کمیٹی دی چیئرمینی دی مسند دے طفیل بہت سارے غیرملکی دوریاں دا لطف اٹھان والے ساڈے پیارے مولانا فضل الرحمن دا ایس لمی فہرست وچ کوئی نام و نشان تک نہیں پایا گیا ایہ فہرست ویکھ کے میرے دل وچ مولانا فضل الرحمن دے بارے جو منفی خیالات سن اوہناں وچ کافی حد تک کمی ہوئی اے۔٭