ووٹراں دی بے قدری

رمضان المبارک دی آمد دے نال ای منافع خوراں نے لٹ مار دے
نویں ریکارڈ قائم کرنا شروع کردتے نیں

روہیل اکبر

رمضان المبارک دی آمد دے نال ای منافع خوراں نے لٹ مار دے نویں ریکارڈ قائم کرنا شروع کردتے نیں۔ اشیائے ضروریہ دی قیمتاں پہلے ای اسمان نال گلاں کر رہیاں سن لیکن رمضان آندے ای ملک بھر وچ مہنگائی دی نویں لہر آ گئی اے۔ آٹے چاول دال تے مختلف قسماں دی سبزیاں دی قیمتاں ودھن نال غریب طبقہ پس کے رہ گیا اے۔
عوام دی اکثریت دو ویلے دی روٹی لئی ترس رہے نیں تے بے رحم منافع خوراں نے موجودہ رمضان المبارک نوں ملکی تریخ دا سب توں مہنگا مہینہ بنا دتا اے ۔اوتوں حکمراناں دی نکام تے بدترین پالیسیاں دی وجہ نال کسان بدحال‘ عوام مایوس تے نوجوان بے روزگار نیں۔ پورے ملک وچ ہر پاسے غربت نچ رہی اے تے ایسے غربت نوں ختم کرن لئی حکومت نے بینظیر انکم سپورٹ پروگرام شروع کر رکھیا اے جہدے پیسے حاصل کرن والی زنانیاں نوں تے ذلیل و خوار ہوندے ویکھیا ای سی ہن آٹے دی لائناں وچ اوہناں نوں پیراں تھلے مردے وی ویکھ رہیاواں۔
عوام دے ووٹاں توں آن والی ایہہ کیسی جمہوری حکومت اے جہڑی اپنے ووٹراں نوں ای مارن تے تلی ہوئی اے۔ کیسے حکمران نیں جہناں نوں احساس اے نہ ای شرم سویر توں شام 4وجے تک روزے دی حالت وچ مجبور زنانیاں نوں اے ٹی ایم مشیناں دے باہر رلدے ویکھ کے سر شرم تے ندامت نال جھک جاندا اے تے فیر جدوںآٹے دے تھیلے دے نال اوہناں دی لاش ویکھنا واں تے ماتم کرن نوں جی چاہندا اے۔ کنے بے حس حکمران نیں جہڑے کجھ سو روپے لئی غریباں دا مذاق اڈا رہے نیں حالانکہ ایہہ اینا آسان طریقہ اے کہ بغیر کوئی وقت ضائع کیتے پیسے مستحق افراد تک پہنچ سکدے نیں۔ اج کل موبائل وچ ہر انسان بینک لئی پھردا اے۔
حکومت بینظیر انکم سپورٹ پروگرام دے پیسے غریباں نوں جے دین وچ مخلص اے تے فیر اوہناں دے موبائل اکائونٹ وچ ٹرانسفر کر دتے جاوے لیکن جو حالت اے ٹی ایم مشیناں دے باہر میں زنانیاں دی ویکھی اوہ انتہائی قابل افسوس اے۔ کیہ ایہہ کسی دی ماواں‘ بھیناں تے دھیاں نہیں نیں جو اوہناں نوں ایس طرحاں سڑکاں اتے خوار کیتا جا رہیا اے۔ حکمران بنن والے کیوں ایس گل نوں بھل جاندے نیں کہ اوہ خاندانی بادشاہ نہیں نیں جہڑے صدیاں تک اوہناں دا ایہہ سلسلہ چلدا رہوے گا۔ اج جے ایہہ حکمران بنے ہوئے نیں تے کل فیر اوہناں نوں ایسے عوام دے کول جانا پووے گا تے ایسے خوف توں تے ایہہ الیکشن نہیں کروا رہے تے انج لگ رہیا اے کہ الیکشن توں عوام دی توجہ ادیھر اودھر کرن لئی ایہہ سارے تماشے کیتے جا رہے نیں۔
اقتدار ہے ای ایسی شے جہدے کول ہووے اوہ چھڈن دا نام نہیں لیندا لیکن ویلا وی بڑا ظالم اے جدوں کسی نوں اقتدار توں کڈن تے آندا اے تے فیر اوہدا نام و نشان وی مٹ جاندا اے۔ پاکستان دے طاقتور ترین سیاسی حکمراناں وچ ذوالفقار علی بھٹو تخت توں تختہ دار تک پہنچ گیا۔ بینظیر بھٹو نوں اقتدار توں فارغ کیتا۔
میاں نواز شریف نوں وزیراعظم ہائوس توں جیل بھیجیا گیا تے عمران خان نوں اقتدار توں چٹکیاں وچ فارغ کر دتا گیا تے جہڑے فوجی آمر آئے اوہ وی اپنے دور دے مضبوط ترین حکمران سن لیکن کتھے گئے تے گواچ گئے کسی نوں یاد نہیں۔ عراق دے مضبوط ترین صدر صدام حسین نوں وی جدوں اقتدار توں فارغ کیتا گیا تے فیراوہنوں وی لکن دی تھاں نہیں ملی۔ ایسے طرحاں اج کل ساڈے حکمران وی ہر قیمت تے حربے تے اقتدار دی کرسی نال چمٹے رہنا چاہندے نیں۔ آئین اتے عمل دے بجائے اوہنوں وی مذاق بنایا جا رہیااے۔
ویلے تے الیکشن نہ کراون دی ضد دی وجہ نال ایس ویلے جمہوریت‘ سیاست‘ معیشت سنے سب کجھ دائو اتے لگ چکیااے تے دوجے پاسے ملک وچ ڈھائی کروڑ بچے غربت دی وجہ نال سکولاں توں باہر نیں۔ 80 فیصد آبادی پین دے صاف پانی توں محروم تے لکھاں ایکڑ زرعی اراضی بنجر پئی ہوئی اے۔
معیشت تباہ‘ بیروزگاری عام تے مہنگائی نے لوکاں دے ہوش اڈا کے رکھے نیں تے حکمراناں نے کراچی توں لے کے چترال تک عوام وانگوں آٹے دی ٹرکاں دے پیچھے لا رکھیا اے۔ انج لگدا اے کہ حکمراناں دے کول عوام نوں دین لئی جھوٹے وعدیاں تے نعریاں دے سوا کجھ نہیں اے جہدی وجہ نال ملک بند گلی وچ‘ ادارے بے توقیر تے ایوان تماشا بنیا ہویا اے۔ بہتری ایہدے وچ اے کہ سارے ادارے مکمل طور تے غیر جانبدار ہو جان تاں جے صاف تے شفاف انتخابات ہوسکن ۔ جے ویلے تے آئین دے مطابق الیکشن نہ ہوئے تے ملک وچ رہی سہی جمہوریت وی ختم ہو جاوے گی ایسے لئی تے سپریم کورٹ نے الیکشن التوا کیس وچ حکومت ولوں فنڈز نہ ہون تے ات گردی دے کارن انتخابات ملتوی کرن دے ومقف نوں رد کردتا۔
چیف جسٹس دا کہنا سی کہ جمہوریت لئی قنون دے حکمرانی لازمی تے انتخابات ضروری نیں۔قنون دی حکمرانی دے بغیر جمہوریت نہیں چل سکدی۔ سیاسی درجہ حرارت اینا بوہتا ہووے گا تے مسئلے ودھن گے۔ ملک وچ ایس ویلے تشدد تے عدم برداشت اے۔ معاشی حالات ویکھو آٹے لئی لائناں لگیاں ہوئیاں نیں تے اداریاں نوں بے توقیر کیتا جا رہیا اے۔
اک اک بندے اتے درجناں کیس کیتے جارہے نیں تے پلس دی کارستانیاں ویکھو اوہ کیویں اپنے آپ نوں تباہ کر رہی اے۔ حسان نیازی اتے کیساں دی بھرمار کردتی تے فیر اوہدے مگروں اسلام آباد کچہری وچ وکیلاں نے پلس دا داخلہ بند کردتا۔ لہور وچ حالات اجے تک کشیدہ نیں۔ حکمران سمجھدے نیں کہ شاید عوام بیوقوف اے لیکن اوہناں نوں سب علم اے کہ حکمران طبقہ دی جنگ کرسی‘ ذات تے مفادات لئی اے جو کرپٹ نظام دے محافظ وی نیں۔ ایہناں ساریاں نے تے توشہ خانہ لٹیا۔
قومی خزانہ تے ملکی وسائل اتے ہتھ صاف کر کے اندرون بیرون ملک ارباں دی جائیداداں بنائیاں۔ ملک دے صرف اٹھارہ وڈیاں دے چار ہزار ارب دے ثاثے نیں۔ حیرانی ہوندی اے کہ جہڑے ملک وچ عوام آٹے دی لائناں وچ ہون اوتھے حکمراناں نے اینی دولت کتھوں کمائی؟ جد کہ قوم دی گردناں اتے مسلط ظالم جاگیرداں تے کرپٹ سرمایہ داراں نوں کوئی ادارہ‘ نیب یا عدالت کرپشن اتے نہیں پچھدی تے رہی سہی کسر نیب قنون وچ تبدیلی کر کے پوری کردتی گئی اے۔
ایس گھسے پٹے جمہوری بادشاہی نظام توں جان چھڈوان دا صرف اک ای طریقہ اے کہ الیکشن کراوئے جان کیوں جے ووٹ دی طاقت نال ای ایہناں دا احتساب ممکن اے۔ جے ایہو صورتحال رہی تے اداریاں دا وقار ختم ہو جاوے گا تے جہڑے حالات شروع ہو چکے نیں ایہدا انجام کیہ نکلے سوچ کے وحشت ہوندی اے۔ ایہناں ساری گلاں توں ہٹ کے نگران وزیراعلیٰ محسن نقوی دن رات کجھ نہ کجھ ایسا کرن دی فکر وچ رہندے نیں کہ جہدے توں عوام دا فیدہ ہو سکے تے ایسے مقصد لئی اوہناں نے صوبہ بھر وچ شہریاں دی سہولت تے رش گھٹ کرن لئی مفت آٹے
دے سنٹراں نوں سویر6وجے کھولن دا حکم دتا اے تے ہن تک لہور ای اوہ شہر اے جہڑا آٹے دی تقسیم وچ پرامن اے کیوں جے ایتھے کمشنر علی رندھاوا تے سی سی پی او بلال صدیق کمیانہ دی براہ راست نگرانی شامل اے۔ ایسے طریقہ کار نوں باقی شہر والے وی اپنا لین تے حالات کسی حد تک قابو وچ رہن گے تے لوکاں دا ویلا وی بچے گا۔ ویسے تے حکومت نوں چاہیدا اے کہ عوام نوں اینا ذلیل و خوار کرن دے بجائے اینے ای پیسے اوہناں دے موبائل اکائونٹ وچ پا دین تاں جے اوہ گھر بیٹھ کے اپنا کوئی ہور کم کر لین۔