سیاست تے ایمان افروز واقعات

سعد اللہ شاہ

کسی کی نیند اڑی اور کسی کے خواب گئے
سفینے سارے اچانک ہی زیر آب گئے
ہمیں زمیں کی کشش نے کچھ اس طرح کھینچا
ہمارے ہاتھ سے مہتاب و آفتاب گئے
کدی کدی انج ہوندا اے کہ حالات بالکل ای وَسوں باہر ہو جاندے نیں کہ انسان دی بس ہو جاندی اے تے فیر بس۔ قارئین کرام ایہہ تے جان دے نیں کہ حباب دی اوقات ای کہڑی ہوندی اے ۔ پر اللہ جان دا اے کہ ایس حباب صفت انسان نے کیہ کیہ طوفان نہیں اٹھائے تے کدی ایہناں طوفاناں دے سامنے آپ ای ڈٹ گیا۔ حالات تے گل کردے ہوئے ڈر لگدا اے کہ ایہ بڑا نازک کم اے۔ اوہی جو میر نے کہیا سی: لے سانس بھی آہستہ کہ نازک ہے بہت کام آفاق کی اس کارگہہ شیشہ گری کا۔ تے دوجے پاسے انیس وی یاد آندے نیں کہ گل کرن وچ ایہ وی اک احتمال اے:
خیال خاطر احباب چاہیے ہر دم
انیس ٹھیس نہ لگ جائے آبگینوں کو
بہرحال سیاست دی زمین گرم اے تے دوہاں پاسے اگ برابر لگی ہوئی اے۔ قومی اسمبلی وچ قرارداد پیش ہو چکی کہ حکومت تن رکنی بنچ دے فیصلے تے عمل نہ کرے۔ ایہ اخبار دی شہ سرخی وی سی۔ ماڑے حالات دشمن نوں شہہ دیندے نیں یاں موقع دیندے نیں کہ اوہ کوئی حرکت کر سکے۔ میری تے دعا اے کہ اللہ کرے کوئی راہ نکل آوے لگدا انج ای اے کہ معاملہ فل کورٹ ول چلا جاوے ایس توں اگے تے فیر ٹویا اے۔ اللہ رحم کرے اسیں اپنے مضمون ول آنے آں کہ اسیں رمضان شریف دے حوالے نال کجھ عرض کرنا اے۔ احوال توں پہلاں مینوں اک دلچسپ واقعے دا تذکرہ کرنا اے ایہ اک ویڈیو وائرل ہوئی اے کہ الجزائر دے اک قاری ولیدنماز تراویح پڑھا رہے سن کہ اک پیاری جہی بلی اوہناں دے کول نظر آئی جدوں اوہ تلاوت فرما رہے سن تے اوہ بلی چھال لا کے اوہناں دے موڈھے تے آ گئی۔ قاری صاحب اوسے سکون تے اطمینان نال تلاوت فرماندے رہے بلی نوں سہلایا تے اوہ اوہناں دے موڈھیاں تے چڑھ کے اپنا منہ اوہناں دی گلھ نال لاندی رہی ایہ بڑا خوبصورت تے ایمان افروز منظر سی۔ ایہدے بعد بلی تھلے اتر گئی ایس منظر نوں پوری دنیا وچ ویکھیا گیا ہور تے ہور بلی تے وی پروگرام آ گئے کہ بلی پانی وچ منہ پا جاوے تے اوہ پلیت نہیں ہوندا۔ حضرت ابوہریرہؓ دا ناں ای ایسے لئی پیا کہ اوہ بلیاں نال پیار کردے سن۔ ابوہریرہ دا مطلب اے بلیاں دا باپ۔ ایس توں اگے دی گل کرنے آں جو ہور وی زیادہ دلچسپ اے میں جس مسجد وچ پچھلے کئی ورھیاں توں تراویح پڑھ رہیا واں اوہدا ناں حسان بن ثابت مسجد اے۔ ظاہر شاعررسول دے ناں تے مسجد اک شاعر نوں زیادہ چنگی لگے گی۔ اوتھے تراویح پڑھان والے مولانا قاری حبیب اللہ نوں اللہ نے الحان دائودی عطا کیتا اے اوہ باقاعدہ حدیث دے استاد نیں تے مفسر قرآن نیں۔ ایس ورھے تے میں تراویح دے بعد اوہناں دے درس وچ بیٹھنا شروع کیتا کہ جو اوہ تراویح وچ پڑھاندے نیں بعد وچ پونا گھنٹہ اوہدے تے گل کردے نیں۔ بہت کجھ ملیا شکرالحمدللہ پر جدوں سورئہ حج دا تذکرہ آیا تے اوہناں نے اک واقعہ سنا دتا میں سوچیا کہ تہاڈے نال شیئر کراں۔ مولانا حبیب اللہ صاحب حج دا تذکرہ کردے ہوئے سامعین نوں کہن لگے کہ تسیں اللہ نال لگائو لائو کیفیت پیدا کرو اللہ مسبب الاسباب اے اوہ کوئی اجیہا بندوبست کرے کہ تہاڈے وہم و گمان وچ وی نہیں ہووے گا:
میری سوچوں کا بھی محور وہی ذات کہ جو
جہاں ہوتے نہیں اسباب بنا دیتی ہے
اوہ دسن لگے کہ 2008ء دی گل اے کہ اوہ راوی بلاک دی اک مسجد وچ تراویح پڑھاندے سن تے کرکٹ دے معروف امپائر علیم ڈار صاحب اوہناں دے پچھے قرآن پاک سن دے سن۔ فیر کہن لگے کہ انج تے اوہ اٹھ تراویح پڑھ کے چلے جاندے سن پر اک دن وہ ویہہ تراویح پڑھ کے اک پاسے بہہ گئے میں فارغ ہویا تے اوہ میرے کول آئے ایس توں پہلاں حبیب اللہ صاحب نے دسیا کہ ایس توں پہلی رات میں سورت پڑھدے ہوئے اک کیفیت وچ چلا گیا تے اللہ نال لو لگائی کہ مولا کوئی سبب بن جائے تے اوس دن وی سورئہ حج دی تلاوت کیتی سی۔ اوسے رات دی گل اے علیم ڈار صاحب نے اوہناں نوں کہیا کہ تہانوں میں حج کروانا اے تسیں تیار ہو جائو۔ فیر اوہناں نے ای پاسپورٹ وغیرہ بنوان وچ مدد کیتی تے ایس طرح مولانا حبیب اللہ صاحب فریضہ حج توں بہرہ مند ہوئے۔
میرے پیارے قارئین! ہن اک ہور میرا ذاتی مشاہدہ یاں واقعہ وی تسیں سن لوو کہ جدوں میں عمرہ کرن گیا تے اکلا سی۔ حج میں اپنی بیگم دے نال 2019ء وچ کیتا۔ عمرہ پہلے کیتا سی میرا روم میٹ اک سکول ٹیچر سی اوہ روندا بہت سی تے نعت پڑھن دا شوق سی اوہ شرطے توں ڈردا کہ کدھرے روک نہ دیوے۔ میں مسجد نبوی وچ بہہ کے اوہنوں کہندا کہ سنائو نعت۔ اک دن اوہ بے اختیار اپنے بارے دسن لگا شاہ جی میں تے اک معمولی ٹیچر آں میرے کول تے کجھ وی نہیں بس میں اپنے سکول وچ جدوں وی کلاس پڑھا کے واپس اک رُکھ تھلے آ کے اسمان ول ویکھ کے اللہ کیہ میں وی عمرہ کر سکنا واں۔ ایہ میرا معمول سی اک دن انج ای کلاس پڑھا کے واپس اوتھے آ کے بیٹھا تے اک بندہ آیا جو میرے لئی بالکل اجنبی سی کہن لگا عمرہ کریں گا۔ میں ہکا بکا اوہنوں ویکھدا رہ گیا۔ اوہنے کہیا اپنی فوٹو لے کے آنا۔ گویا سب کجھ اوہنے اہتمام کیتا تے میں تہاڈے سامنے بیٹھا واں اوہنے فیر رونا شروع کر دتا۔ میں سوچدا ای رہ گیا کہ مینو ںاپنے عمرے دا تے پتہ نہیں پر ایہدے عمرے دا یقین ہو گیا کہ مقبول اے تے ہن میں سوچنا واں کہ یقینا اوس بندے دے مصاحبت دا پھر مینوں وی ملے گا ایس واقعے نوں میں کدی نہیں بھُلیا اوہ عمرہ بڑا چنگا رہیا سی میں معروف شاعر آصف شفیع تے اوہدے دوستاں دے نال غارحرا وی گیا تے غارثور وی گیا۔ ایس دعا نال اجازت کہ اللہ سانوں سب نوں ایس حاضری توں فیض یاب کرے۔ (آمین)٭