الٹی گنگا بہان دی تیاری

سعد اللہ شاہ

رشتہ آب کیا حباب کے ساتھ
آب ملتا ہے آخر آب کے ساتھ
میں نے سیکھا خزاں کے موسم سے
رنگ وبو ہے فقط شباب کے ساتھ
خزاں رسیدہ موسم وچ تے پیلے تے سُکھے پتے ای اڈدے نیں تے اوہ ہوا دے دوش تے ہوندے نیں۔ کجھ انج دی ای صورتحال سیاست وچ آئی اے۔ اجہے حالات وچ منیرنیازی دی نظم دیاں اوہ لائناں یاد آ گئیاں۔
شاں شاں کر دے رکھ
پیل دے تے انھیاں کر دیاں وا واں
اوس رات دے بہتے لوکی
بھل گئے گھر دیاں راہواں
بھاویں ایس ویلے بہار پوری طرح گزری نہیں پر سیاست وچ موسم گرم کجھ زیادہ ای ہو گیا اے تے فیر موسم ہووے جس دا گہنا اوہو پھل ٹہنی تے رہنا۔ ہن عدلیہ تے پارلیمنٹ اک دوجے دے سامنے آ گئے نیں سگوں ایس طرح کہوو کہ پارلیمنٹ سینہ تان کے سپریم کورٹ دے سامنے کھڑی ہو گئی اے تے ایہ خطرناک گل اے۔ وزیراعظم نے قربانی دین دا طے کر لیا اے تے کہہ دتا اے کہ سپریم کورٹ دا کم ثالثی یاں پنچایت نہیں۔ سپیکر نے کہیا اے کہ تن رکنی بنچ دے فیصلے اوہ نہیں من دے۔ تحفظات دا ایہو مفہوم ہوندا اے۔ پارلیمنٹ وچ سوموٹو نوں ساسوموٹر کہیا گیا ایہ جو ویڈیو لیکس نیں اوہناںنے بڑا گند پا دتا اے۔ دلچسپ گل ایہہ وے کہ پارلیمنٹ وچ کہیا گیا کہ الیکشن دا فیصلہ پارلیمنٹ کرے گی تے اجہی صورت وچ آئین کتھے کھڑا اے اوہ 90 دن وچ الیکشن کروان دا حکم اے کتھے جاوے گا کوئی کیہ کہوے کہ سب اجتماعی خودکشی لئی تیار نیں سگوں ایس طرح کہوو کہ شہادت دا شوق چرایا نہیں سگوں دیدہ دانستہ اے۔ اصل وچ پی ڈی ایم دے جہاندیدہ و بارچشیدہ رہنما نوشتہ دیوار پڑھ چکے نیں ایس لئی اوہ دیوار ڈھان تے آ گئے نیں اوہ لوکاں دے سامنے اک نویں اعلامیہ یاں بیانیہ دے نال جانا چاہندے نیں۔
ہن اک نظر خان صاحب تے وی مار لینے آں کہ اصل وچ ایس گھمبیر صورتحال وچ اوہناں دے کول کھوہن لئی بہت کجھ اے کہ واقعتاً اوہ صورتحال نظر آ رہی اے کہ جو کدی بھٹو لئی سی کہ اوہ کسے کھمبے نوں ٹکٹ دیندے تے جت جاندا تتے سچ مچ وچ اوس دور دے کئی کھمبیاں نوں وی میں جاننا واں جہناں نے سوائے ایم این اے یاں ایم پی اے بنن دے کجھ نہیں کیتا پر ایس ویلے عمران خان مشاورت نال ٹکٹاں ونڈ رہے نیں پر دوجے پاسے تے ہور ای حکمت اے کہ الیکشن دا بائیکاٹ وی نہیں تے کسے نوں ٹکٹ ای نہیں ملیا خیر اسیں گل کر رہے سی کہ ایس ویلے سپریم کورٹ وچ پی ٹی آئی ولوں درخاستاں دتیاں جا رہیاں نیں کہ نگران حکومتاں وزیراعظم تے الیکشن کمیشن نوں ختم کیتا جاوے ایہدے نال نال پنجاب تے پختونخوا دی اسمبلیاں دی بحالی لئی رٹ کیتی گئی اے بس ایتھوں احساس ہوندا اے کہ اسمبلیاں توڑ کے بلنڈر کیتا گیا سی۔ طاقت وچ رہندے تے منظرنامہ ای کجھ ہور ہوندا کدی کدی میں سوچنا واں کہ پی ڈی ایم تے خاص طور تے ن لیگ نے حکومت وچ آ کے غلطی کیتی تے پی ٹی آئی نے حکومت چوں نکل کے انج دی ای غلطی کیتی۔ واپسی دی اینی وی کیہ جلدی سی۔ مینوں یاد اے کہ فواد چوہدری اوہناں دیہاڑیاں کہہ رہے سی کہ شاید پی ڈی ایم حکومت صرف 48 گھنٹے دی سی پر ایہدے بعد ویلا گزردا گیا تے ہن وی گزر رہیا اے۔ ہور غلطی ایہ کہ ہر کم خان صاحب نے جنرل باجوہ تے پا دتا۔ خان صاحب نے کئی بیانیے اکٹھے کر دتے تے اوہناں دی مقبولیت پاروں سارے بیانیے چل تے گئے پر سمت دا کوئی تعین نہیں سی خان صاحب دی خوش قسمتی ایہ کہ ن لیگ دی کارکردگی منفی سطح تے چلی گئی یعنی اوہ مہنگائی نوں کنٹرول کرن آئے تے مہنگائی اوہناں دے گلے پے گئی سب توں ودھ نقصان تے ن لیگ دا ای ہویا۔ زرداری صاحب نے تے بڑی آسانی نال کہہ دتا کہ اوہ تے حکومت وچ نہیں صرف اتحادی اے اوہناں دا بیٹا بلاول تے بھارت جا کے کانفرنس وی اٹینڈ کرے گا۔ ایس ویلے ٹانگے دے پچھے گھوڑے نوں جون دی کوشش ہو رہی اے اک گل سراج الحق نے بڑی بامعنی کیتی اے کہ ہن تے شاید بلدیاتی الیکشن ای ہون گے۔ ایہ تے تہانوں پتہ ای ہووے گا کہ بلدیاتی الیکشن کون کراندے نیں ایہناں سیاسی جماعتاں نوں تے کدی توفیق نہیں ہوئی کہ اقتدار تھلے نمائندیاں تک اپڑان۔
فیر آنے آں اپنے موضول ول کہ بڑی خطرناک چال وی چلی جا رہی اے کہ جو آئین دی روح کڈھ دیوے گی اک نویں اصطلاح آ گئی اے توہین پارلیمنٹ تن ججاں نوں استحقاق کمیٹی وچ بلان دی تیاری ہو رہی اے انج جیویں الٹی گنگا بہان دی تیاری ہو رہی اے اللہ نہ کرے انج ہو جاندا اے تے فیر پارلیمنٹ وچ بیٹھے لوکاں دا محاسبہ کوئی وی نہیں کر سکے گا بہرحال اک تکلیف دہ پہلو سپریم کورٹ دے اندر دی ونڈ وی اے کہ جس پاروں کسے نوں شہ ملی اے۔ آخر وچ ذرا تفنن طبع دا سامان وی ہو جاوے کہ اک زبردست خبر پڑھی کہ مارلن سوائٹ دنیا دی ذہین ترین خاتون نیں جہناں نے مونٹریال تے پیچیدہ ترین پہیلی حل کیتی اسیں سوچدے رہ گئے کہ ساڈے ایتھے تے عورت نوں پہیلی سمجھیا جاندا اے کہ جو اج تک کسے دی سمجھ نہیں آ سکی اوہ مشہور لطیفہ وی تے تسیں سنیا ہووے گا کہ چراغ توں پیدا ہون والے جن نے عورت دے بارے کجھ دسن دی تھاں بحراوقیانوس تے ڈبل پل بنانا قبول کر لیا سی۔ دوجی گل ایہ کہ مرد کیویں ہضم کر لین گے کہ عورت ذہین ترین ہو سکدی اے انج تے عورت مرد نوں تگنی دا ناچ نچا سکدی اے۔ دوجی خبر بھارتی ماڈل عرفی دی اے کہ جہنوں نازیبا کپڑیاں پاروں ہوٹل وچ داخلے توں روک دتا گیا پہلے تے تسیں ایہ سوچ لوو کہ اوہ کپڑے جو بھارتی معاشرے وچ وی قابل قبول نہیں کیویں دے نازیبا ہون گے دوجی گل زیادہ مزیدار ایہہ وے کہ عرفی نے ایہدے تے حیرت دا اظہار کیتا کہ کیہ اسیں واقعتاً اکیہویں صدی وچ داخل ہو چکے آں۔ شاید موصوفہ توں کوئی پچھدا کہ ایہ تے بائیسویں صدی دے کپڑے نیں۔ پتہ نہیں کہ عرفی نے ایس بندش دے جواب وچ احتجاج کس طرح کیتا ہووے گا بس تسیں اندازہ ای لا سکدے او۔٭