ایہہ چھاپہ سی یا حملہ…؟

حمید اللہ بھٹی

کسی اتے مقدمہ درج ہو چکیا ہووے تے قنون نافذ کرن والے اداریاں ولوں گرفتار کرن دی کوشش حیران کن نہیں ہوندی۔ ایہدے لئی قنون نافذ کرن والے ادارے چھاپیاں توں وی گریز نہیں کردے مگر چھاپے ول جان توں پہلاں عدالت کولوں سرچ وارنٹ لیتا جاندا اے جہڑا کسی معقول جواز دی بنا اتے ای عدالت جاری کردی اے۔ سرچ وارنٹ دے باوجود انسانی حقوق تے چادر و چار دیواری دا تقدس ملحوظ خاطر رکھیا جاندا اے مگر جمعہ تے ہفتے دی وچلی شام اینٹی کرپشن تے پلس نے مشترکہ چھاپے وچ جو کجھ لہور چودھری پرویزالٰہی دے گھر کیتا اوہنوں کسی صورت چھاپہ نہیں کہہ سکدے بلکہ ایسا حملہ سی جہدا مقصد صرف اپوزیشن رہنما نوں سبق سکھانا سی۔ جے ایہہ چھاپہ ہوندا تے پلس تے اینٹی کرپشن والے پہلے عدالت کولوں سرچ وارنٹ حاصل کردے۔ حیرانگی دی گل ایہہ اے کہ جہڑے مقدمے دی آڑ وچ چھاپہ ماریا گیا اوہدے وچ چودھری پرویزالٰہی دی 6مئی تک عبوری ضمانت اے جہدا مطلب اے کہ اوہ موجودہ نظام انصاف اتے اعتماد کردے تے ایہدے توں انصاف حاصل کرنا چاہندے نیں۔ ایسے بنا تے چھاپے دا جواز ای نہیں رہندا کیوں جے مطلوب نہ تے اشتہاری سن بلکہ عدالت کولوں عبوری ضمانت ملن مگروں اپنی معمول دی سرگرمیاں جاری رکھے ہوئے سن۔ اوہناں دا ملک توں فرار دا وی کوئی خدشہ نہیں ایسے لئی کہہ سکدے نیں کہ ایہہ چھاپہ نہیں بلکہ حملہ سی حملے توں اپوزیشن دے صف اول دے رہنما نوں دھمکایا تے خوفزدہ کرن دی کوشش کیتی گئی اے۔
چھاپے لئی قنون نافذ کرن والے ادارے جدوں کدھرے جاندے نیں تے سب توں پہلاں اہلخانہ نوں سرچ وارنٹ وکھاندے نیں فیر گھر داخل ہوندے نیں۔ جے کوئی رخنہ پائے یا رکاوٹ بنے تے ایسے شخص دے خلاف قنونی کارروائی دا جواز ملدا اے۔ جمعہ تے ہفتہ دی وچلی شام اینٹی کرپشن تے پلس دی کارروائی کسی حوالے نال وی قنون دے مطابق نہیں سی جہڑے کسی قنون ماہر نال ایہدے اتے گل بات ہوئی۔ ساریاں دا ایہو کہنا اے کہ ایہہ کارروائی اختیارات توں بالاتر تے غیر قنونی اے کیوں جے قنون وچ ایسی کوئی دفعہ نہیں جو کسی وی ادارے نوں بلاجواز چڑھائی دی اجازت دیندی ہووے۔ ایہہ کھلم کھلا حملہ اے اک ایسا مقدمہ جہدے وچ ضمانت قبل از گرفتاری ہو چکی ہو کے جواز بنا کے کسی دے گھر چڑھ دوڑنا واضح طور تے توہین عدالت اے۔ ایہدے خلاف متاثرہ فریق جے عدالت جاوے تے ذمہ داران نوں لینے دے دینے پے سکدے نیں۔ قنونی اختیارات توں تجاوز دی بنا تے ذمہ داراں نوں سزا مل سکدی اے۔
چھاپے تے حملے وچ فرق ہوندا اے۔ چھاپہ قنون ولوں دتے گئے اختیارات دے مطابق ہوندا اے لیکن حملے لئی کسی قنونی جواز دی لوڑ نہیں ہوندی بلکہ طاقتور جدوں چاہوے کسی نوں کسی وی ویلا روند سکدا اے۔ اینٹی کرپشن تے پلس نے چودھری پرویزالٰہی دے گھر اپنی طاقت دا مظاہرہ ای تے کیہ اے۔ سب توں پہلاں گھر دے بوہے نوں اگ لائی گئی جہنوں وجھان لئی گھر دے اندروں پانی سٹیا گیا۔ مگروں حملہ آور پلس نے غصے وچ بکتر بند گڈی دے ذریعے بوہا توڑ دتا۔ ایس توں پہلاں پلس اہلکار کندھاں ٹپ کے گھر وچ داخل ہوندے رہے تے فیر بوہا ٹٹن مگروں نعرے لاندے گھر وچ داخل ہو گئے۔ ملکی تریخ وچ پہلی واری ذرائع ابلاغ دی وساطت نال حملے دے منظر پاکستانیاں نے ویکھے تے ششدر رہ گئے۔ انج لگ رہیا سی کہ ایہہ کسی سیاستدان دا گھر نہیں بلکہ کسی غیر ملکی جاسوس دا ہیڈ کوارٹر اے جہنوں سٹن لئی ملک دی ساری طاقت جھونک دتی گئی ۔ اوہو پلس جو کچے وچ آپریشن توں خوفزدہ تے بے مقصد کارروائیاں وچ مصروف اے۔ ایتھے سارے فسطائیت دے نال حملہ آور ہوئی۔ کچے وچ تے کارروائی پان پلس اہلکار سویرے جاندے تے سنسان جگہ اتے بیٹھ کے گولیاں چلا کے شام نوں واپس آ جاندے نیں۔ ایہو پلس الیکشن ڈیوٹی کرن توں وی گریزاں اے۔ امن وامان قائم وچ وی نکام اے لیکن اک سیاسی رہنما دے گھر ایسی دیدہ دلیری نال جھپٹی جیویں کوئی ذاتی پرخاش ہو گھر دا بوہا توڑن دے نال گھر دے اندرونی بوہے تک توڑ دتے۔ ایس دوران اہلخانہ دے نال گھریلو ملازماں نوں وی زدوکوب کیتا۔ ایسا ظلم وجبر کدی آمریت دے دور وچ وی نہیں ہویا۔ پلس تے اینٹی کرپشن دا ایہہ مشترکہ حملہ اختیارات توں تجاوز دی مزموم مثال اے۔ ایس واقعہ توں ایسا تاثر گہرا ہویا کہ ملک وچ حاکمان وقت نال اختلاف کرن والے نوں عبرت دا نشان بنان دی پالیسی رائج اے۔
موجودہ حکومت وچ شامل اکثر چہریاں اتے بدعنوانی دے الزامات نیں جہناں وچ وزیراعظم توں لے کے وزرا تک تے مریم نواز توں لے کے میاں شہباز شریف دے صاحبزادیاں نے ضمانتاں کرا رکھیاں نیں۔ ایہناں نوں آندے جاندے پلس نہ صرف تحفظ دیندی اے بلکہ پروٹوکول اتے وی مامور اے۔ چودھری پرویزالٰہی دوواری ملک دے سب توں وڈے صوبے دے منتخب وزیراعلیٰ‘ دو واری سپیکر پنجاب اسمبلی‘ اک واری اپوزیشن لیڈر‘ قومی اسمبلی‘ ملک دے نائب وزیراعظم سنے کئی واری صوبائی وزیر دے طور تے کم کر چکے نیں۔ اوہ ایس ویلے ملک دی سب توں مقبول تے وڈی اپوزیشن جماعت دے مرکزی صدر نیں۔ اوہناں دا واحد جرم جو ایس ویلے نظر آندا اے اوہ حاکمان وقت دی پالیسیاں اتے دلیری نال تنقید کرنا اے۔ ایہہ کوئی جرم نہیں حالانکہ ہر جمہوری ملک وچ حکومت دی ایسی پالیسیاں جو عوامی مفاد دے منافی ہون۔ اپوزیشن ولوں ہدف تنقید بنائی جاندیاں نیں جہدا مقصد حکومت دی اصلاح ہوندا اے حکومت وی اپوزیشن دی تجویزاں دے چانن وچ اپنی پالیسیاں اتے نظرثانی کردی تے بہتر بناندی اے لیکن موجودہ حکومت نے تنقید نوں جرم بنا دتا اے۔ اختلاف رائے تے جمہوریت دا حسن اے مگر حکمران اختلاف رائے نوں برداشت کرن توں انکاری نیں۔ ایہہ طرزعمل جمہوری اصولاں دے منافی اے ایہہ جمہوریت دی خدمت نہیں بلکہ کمزور کرن دے مترادف اے۔
حیران کن پہلو ایہہ اے کہ اینٹی کرپشن تے پلس نے ایسے ویلے کارروائی کیتی جدوں نگران وزیراعلیٰ محسن نقوی ملک وچ موجود نہیں بلکہ عمرے دی ادائیگی لئی سعودی عرب نیں ایسے طرحاں آئی جی پنجاب تے سی سی پی او لہور وے ملک توں باہر نیں۔ وزیر داخلہ رانا ثناتے محسن نقوی دونوواں نے پلس گردی توں لاعلمی دا اظہار کردیاں واقعہ دی رپورٹ طلب کر لیتی اے۔ شہباز شریف نے وی آکھیا اے کہ ایس کارروائی دا وفاقی حکومت نال کوئی تعلق نہیں جہدی بنا تے پلس دا دیدہ دلیری نال معروف سیاسی رہنما دے گھر چڑھائی تے حملہ ناقابل فہم اے۔ وفاقی حکومت دی لاعلمی تے اعلیٰ پلس افسر اوہناں دی عدم موجودگی وچ ایہہ حملہ حیران کن اے۔ جہدی گہرائی تک انکوائری ہونی چاہیدی اے۔
ایسے طرحاں دا واقعہ زمان پارک وچ وی پیش آیا جدوں عمران خان دی غیر موجودگی وچ پلس نے گھر دی اٹ نال اٹ وجا دتی۔ تشدد کردیاں زنانیاں نوں وی نہ بخشیا گیا بالکل ویسا ای چودھری پرویزالٰہی دے گھر ہویا جتھے چادر تے چار دیواری دی دھجیاں تے اڈائی ای گئیاں مگر ایسی زنانیاں جہناں اتے اج تک کدی کسی غیر محرم دی نظر تک نہیں پئی نال وی مجرماں والا سلوک کیتا گیا۔ گھریلو تے بے گناہ زنانیاں نال ایسے سلوک دی قنون وچ کوئی گنجائش نہیں۔ ہور ستم ایہہ کہ پلس اپنی بدمعاشی لکان لئی جہڑے حربے اختیار کردی اے ایتھے وی باز نہیں آئی۔ پلس گردی دے سارے منظر اک پاسے ذرائع ابلاغ نے پورے ملک نوں وکھا دتے نیں فیر وی دھونس دا مظاہرہ کردیاں ات گردی سنے کئی دفعات لا کے متاثرین دے خلاف ای مقدمہ درج کر لیتا گیا۔ اک جرم نوں لکان لئی دوجا جرم پلس دی سراسر بدمعاشی اے۔ ہن ویلا آ گیا اے کہ پلس نوں قنون تے قاعدے دا سختی نال پابند بنایا جاوے وگرنہ یاد رکھو اجے تے ایہہ حملہ عمران خان تے پرویزالٰہی دے گھراں اتے ہویا اے کل نوں ہو روی سیاستدان زیرعتاب آ سکدی نیں۔ جے پلس گردی دا خاتمہ کرنا اے تے غیر جانبدارنہ تحقیقات دے نال ذمہ داراں دے خلاف بلاامتیاز سخت ترین کارروائی کرنا ہووے گی تاں جے مستقبل وچ ہور کوئی سیاستدان ایسے کسی حملے دا نشانہ نہ بن سکے۔