چڑیا گھراں نوں ختم کر دینا چاہیدا اے؟

طلعت عباس خان

کجھ دیہاڑیاں توں میڈیا تے دو خبراں گرم سن۔ اک کراچی چڑیا گھر وچ نور جہاں (ہتھنی) دی موت تے دوجی وڈی خبر سپریم کورٹ تے الیکشن دی سی۔ ہتھنی دے مرن نال چڑیا گھر نال جڑی نیوز تے ختم نہیں گھٹ ضرور ہوئی جد کہ دوجی خبر سپریم کورٹ‘ الیکشن تے مذاکرات اجے تک گرم ضرور اے پر ہن نرم وکھائی دے رہیاں نیں۔ ڈر اے کسے دی نویں ویڈیو نہ آ جاوے۔ ساریاں نوں چپ لگ گئی اے ہر کوئی اپنی سوچ وچ گم اے۔ ہن اسیں پہلے ہتھنی ایشو بارے کہانی بیان کرنے آں۔ ہتھنی وچاری کافی دیہاڑیاں توں بیمار سی علاج لئی باہر ملکاں توں ڈاکٹر سدے گئے۔ چڑیا گھر دے سپوک پرسن صبح شام ہتھنی دی صحت بارے بریفنگ دیندے رہے۔ ایہ اوہدی خبر دینا کیوں ضروری سمجھدے سن شاید ایس لئی کہ دعاواں نال ایہ صحت یاب ہو جاوے پر ایس ویلے شہریاں دی سمجھ توں باہر اے کہ دعا کہدے لئی کریئے۔ سچ تے ایہہ وے کہ ہن بدنیتی دی وجہ نال دعاواں وچ اثر نہیں رہیا۔ ہن دم کرن والے وی نہیں رہے جہناں دے کول پیسے نیں پیر اپنے گھر لے آئے نیں مارکیٹ وچ جو باقی بچے نیں اوہ وی دونمبر نیں۔
ہتھنی دی بریکنگ نیوز سنان دا مقصد دا کجھ پتہ نہیں۔ کہیا جاندا اے ایہناں خبراں دا مقصد سمجھ توں باہر اے کہ ہتھنی نوں نورجہاں دا ناں کنہے دتا کس وجہ نال دتا۔ جد کہ ایہدی کوئی چیز نورجہاں نال ملدی جلدی نہیں سی فیر وی نورجہا ںدے ناں توں ایہنوں پکاریا جاندا سی۔ افسوس ناں رکھن والیاں تے تے ہتھنی دے مرن تے۔ ہتھنی ایشو نوں کنہے اٹھایا؟ یاں قدرت نے اوہناں بندیاں نوں بے نقاب کرنا سی جہناں نے وڈے جانور (ہتھنی) نوں چڑیاگھر وچ لیان تے کم کیتا سی۔ ایہناں توں پچھیا جاوے کہ ایس جانور نوں ویکھن دا شوق کنے فیصد لوکاں نوں سی ایہنوں لیان وچ کہڑے لوک ملوث سن۔ چار ورھے پہلاں چار ہاتھی (دو میل تے دو فی میل) لیاندے گئے بعد وچ اوہ چارے فی میل نکلیاں۔ لیان والیاں نوں ایہدے نال غرض نہیں سی کہ کنی میل سی اوہناں نوں اپنے کمیشن نال غرض سی۔ دسیا جاندا اے کہ اوس ویلے ایہ چار کروڑ وچ لیاندے گئے سن۔ دو ورھے دے بعد دو ہتھنیاں دے دند غایب ہوئے کنہے کیتا کوئی پتہ نہیں؟ ہاتھی وچ سب توں قیمتی اوہدے دند ای ہوندے نیں۔ لگدا ایہو اے جہڑے ایہ ہاتھی لے کے آئے سن اوہ ایس نیت نال لیائے سن کہ ایہدے نال چار پیسے بنن گے اوہ لوک ایہدے وچ کامیاب وکھائی وی دتے۔
انج تے ملکی معاشی حالات نوں ویکھ کے چڑیا گھراں نوں انج وی بند کر دتا جاوے تے بہتر اے۔ ایہدے وچ جانوراں دی تھاں بے سہارا غریباں نوں ایس تھاں وچ رکھیا جاوے۔ ایسے خرچے تے اوہناں نوں کھانا دیو ڈاکٹر دیو تے قدرت وی خوش تے بندے وی خوش۔ لوک ایتھے سبق حاصل کرن نوں بچیاں نوں لیاندا کرن گے کہ دیکھو انسان انسان دے نال کیہ کردا اے؟ اوہناں نوں اپنے ای ایس حال وچ چھڈ جاندے نیں ایس تھاں دا ناں چڑیا گھر دی تھاں ہوم لیس گھر رکھیا جاوے۔ امیر لوک تے اولڈ ہائوس وچ پیسے د یکے اپنے بزرگاں نوں چھڈ آندے نیں کیہ ایسا وقت غریب انسان تے نہیں آندا اوہناں لئی کیہ کوئی انتظام کرنا ضروری نہیں۔ انج وی پرندے جانور آزاد ای چنگے لگدے نیں۔ اوہناں نوں قید وچ رکھنا انج وی گناہ اے۔ انج کرنا نیکی دا کم وی اے چرند پرند نوں آزاد کرکے دعاواں وی ملن گئیاں۔ انج وی چڑیا گھراں وچ جانوراں دا کھانا اوتھے ملازم کھا جاندے نیں۔ کہیا جاندا اے کم کرن والے ای کھا جاندے نیں یاں گھر لے جاندے نیں ایس لئی گزارش اے کہ جے ایہ گل چنگی لگے تے آواز اٹھائو۔ اپنے ملک وچ چڑیا گھراں دی تھاں بے سہارا لوکاں نوں وسایا جاوے جہناں دا کوئی نہیں ہوندا۔ جو بجٹ اخراجات جانوراں تے آندے نیں اوہو ایہناں انساناں تے لائو۔
عام بندے نوں سمجھ نہیں آ رہیا کہ ایتھے ایشو کیہ نیں؟ مہنگائی اے‘ آئی ایم ایف اے‘ سپریم کورٹ اے‘ الیکشن کمیشن اے یاں پارلیمنٹ یاں آئین دی گولڈن جوبلی منانا اے ایہناں ایشو توں علاوہ وی بہت سارے ایشو نیں جہناں تے لکھیا جا سکدا اے لکھیا جانا وی چاہیدا اے۔ میرے نزدیک اج دا غریب انسان جانوراں توں وی بدتر زندگی گزار رہیا اے۔ اسیں سارے حقوق اللہ دا خیال کرنے آں پر حقوق العباد دا نہیں۔ حقوق اللہ جے ادا نہ وی ہون تے اوہ ذات فیر وی معاف کر دیوے گی پر حقوق العباد ادا نہ ہون تے معافی ملنی مشکل ای نہیں ناممکن وی اے۔ انج وی جو کم ساڈے کرن دے نہیں اوہدے تے ساڈا زور اے جد کہ ضرورت ایہہ وے کہ مسلمان ای نہیں انسان بن کے وی دوجے انساناں دی بھلائی تے اوہناں دی بہتری دا وی سوچو۔ ایہ اوہو راستہ اے جو جنت دی ددھ تے شہد دیاں نہراں ول لے جاندا اے۔ سپریم کورٹ تے لوئر عدالتاں دے جج صاحبان لاوارث شہریاں دے کیساں دا فیصلہ انصاف تے مبنی تے چھیتی کران گے تے ددھ تے شہد دیاں نہراں وی اوہناں دا مقدر بنن گئیاں۔
٭٭٭