بجلی دے بل یا موت دے پروانے۔۔!

بجلی دے ایہناں بلاں نوں ویکھ کے تقریباً ہر گھر وچ صف ماتم وچھی ہوئی اے۔ غریب طبقے دا تے ذکر چھڈو اوہ تے ہمیشہ ای ظلم دی چکی وچ پسدا چلیا آ رہیا اے

لکھت:عامر خان

میں اک سڑک توں لنگھ رہیا سی تے محکمہ بجلی دے اک اہلکار نوں گھراں وچ بجلی دے بل تقسیم کردے ویکھیا۔ بجلی دے ایہناں بلاں نوں ویکھ کے تقریباً ہر گھر وچ صف ماتم وچھی ہوئی اے۔ غریب طبقے دا تے ذکر چھڈو اوہ تے ہمیشہ ای ظلم دی چکی وچ پسدا چلیا آ رہیا اے۔ لوئر مڈل یا مڈل کلاس نال تعلق رکھن والے خانداناں نوں اسیں خوشحال طبقے وچ شمار کرنے آں۔ اگست دے مہینے دے بجلی دے بل جدوں ایہناں خوشحال خانداناں دے گھراں وچ وصول ہو گئی تے اوہناں دے وی ہوش گواچ گئے۔
غریب طبقے نوں اسیں کدوں دے زندہ درگور کرچکے۔ ہن مہنگائی دا ا اژدھا پھنکاردے ہوئے ایس طبقے وَل وی تیزی نال ودھ رہیا اے جہڑا ایس خوش فہمی وچ مبتلا سی کہ اسیں بڑے آسودہ حال آں۔ جدوں دی پی ڈی ایم دی موجودہ حکومت وجود وچ آئی اے اوہناں دا اک ای نعرہ اے کہ اسیں صرف پاکستان نوں دیوالیہ ہون توں بچان لئی شدید ترین معاشی بحران دے شکار ملک دے اقتدار نوں انتہائی مجبوری دی حالت وچ قبول کیتا اے۔ پی ڈی ایم دی حکومت وچ شامل ملک دی دو وڈی سیاسی جماعتاں دے رہنماواں دا ایہہ وی کہنا اے کہ اوہناں نے ملک نوں دیوالیہ ہون توں بچان لئی اپنے سیاسی مستقبل نوں وی دائو اتے لا دتا اے۔ عمران خان دی ساڈے تن سال دی حکومت وچ ملک دے معاشی حالات دے وگاڑ وچ بے پناہ وادھا ہویا سی۔ عوام اپنے مسائل تے مصائب دی وجہ نال عمران خان دی حکومت دے خلاف غصے نال بھرے ہوئے سن۔
پی ٹی آئی حکومت نوں عدم اعتماد دے ذریعے فارغ نہ کیتا جاندا تے عوام انتخابات وچ اپنے غم و غصہ تے ناراضگی دا ایس شدت نال اظہار کردے کہ عمران خان دی جماعت دے امیدوار دس فیصد سیٹاں اتے وی کامیاب نہ ہوندے۔ پی ٹی آئی دے امیدواراں لئی عام انتخابات وچ عوام دا سامنا کرنا آسان نہیں سی۔ عمران خان دی حکومت ہر شعبے وچ نکام ثابت ہوئی لیکن پی ڈی ایم دی چار مہینے دی حکومت نے ملک دی سیاست دا سارا نقشہ ای تبدیل کر دتا اے۔
ساڈے ملک دا سب توں وڈا مسئلہ معاشی بحران اے۔ عمران دی حکومت مگروں مختصر مدت وچ ای پی ڈی ایم دی حکومت نے ملک دی معیشت دے وگاڑ نوں ایس انتہا تک پہنچا دتا اے کہ عوام موجودہ حکمراناں نوں بددعاواں دین تے مجبور ہو گئے۔ جہڑی حکومت پاکستان نوں دیوالیہ ہون توں بچان دے وڈے دعوے کر رہی سی ہن پاکستان دا ہر طبقہ ایس حکومت دے نشانے اتے اے۔ اک پاسے پاکستان دی آبادی دا وڈا حصہ سیلاب دی تباہیاں دی زد وچ اے۔ دوجے پاسے مہنگائی دا سیلاب اے۔اک پاسے بارشاں دے پانی دی طغیانی اے۔ پانی انج غصے نال بپھریا ہویا اے کہ اوہدے سامنے سارے بے بس ہو چکے نیں۔بستیاں دی بستیاں صفحہ ہستی توں مٹا دین مگروں سیلاب دا غصہ گھٹ نہیں ہو رہیا۔ دوجے پاسے آئی ایم ایف نے اپنے شکنجے وچ سانوں انج قابو وچ لیا اے کہ ساڈے حکمران آئی ایم ایف دی ہر شرط تسلیم کردے چلے گئے نیں۔ ایہناں شرطاں دی قبولیت پاروں سارے بوجھ‘ مصائب تے مشکلات عوام نوں منتقل کر دِتے گئے نیں۔ پاکستان دیوالیہ ہون توں بچدا اے یا نہیں مگر ایس خطرے نوں نہیں ٹالیا جا سکدا کہ آئی ایم ایف دی ہر شرط قبول کر لین والے حکمراناں دے غلط فیصلیاں نال پاکستان دا ہر فرد دیوالیہ ضرور ہو جاوے گا۔ جے ایس ملک داکوئی طبقہ کوئی خاندان تے کوئی فرد دیوالیہ ہون توں نہ بچیا تے کیہ پاکستان دیوالیہ ہون توں بچ جاوے گا؟۔پاکستان 22کروڑ عوام دا نام اے۔ جے 22کروڑ عوام دا معاشی مستقبل ای تباہ ہو جاندا اے تے کیہ اوہنوں اسیں ملک نوں دیوالیہ ہون توں بچا لیا گیا دا نام دے سکنے آں۔ پی ڈی ایم دی حکومت وچ شامل جماعتاں دے کجھ رہنماواں نے ممکن اے پچھلے چار مہینیاں وچ اپنے کجھ مفادات دا تحفظ کر لیا ہووے۔ جہناں سیاسی رہنماواں نوں کرپشن دے مقدمات دا سامنا سی اوہناں لئی این آر او دا پربندھ وی کر لیا گیا اے لیکن عوام لئی پی ڈی ایم دی ایہہ حکومت عمران خان دی حکومت توں وی وڈا عذاب ثابت ہوئی اے۔ صرف پٹرول تے بجلی دی مہنگائی نے عوام دا بھرکس کڈ دتا اے تے مئی2023دے بجلی دے بلاں نے تے عوام نوں حواس باختہ کر دتا اے۔ عوام دی اکثریت بجلی دے اینے بھاری بل ادا کر ای نہیں سکدی۔ عوام دی قوت برداشت بجلی دے ایہناں بلاں مگروں ختم ہو جاوے گی۔ جے ملک وچ سیلاب نہ آیا ہوندا تے پی ڈی ایم دی حکومت عوام دی معاشی تباہی نوں جہڑی حد تک لیا چکی اے اوہدے مگروں عوام دا طوفان پی ڈی ایم دی حکومت دا کچومر کڈن لئی سڑکاں اتے موجود ہوندا۔
عمران خان شاید پی ڈی ایم حکومت لئی اینا خطرناک ثابت نہ ہون جہنے خطرناک پاکستان دے 22کروڑ عوام حکومت لئی ہو سکدے نیں۔سیلاب مگروں اگلا مرحلہ عوامی غیض و غضب دے سیلاب دا ہووے گا۔ جے پی ڈی ایم دی حکومت آئی ایم ایف دی شرطاں مندے مندے پاکستان دے عوام نوں
مار ای سٹنا چاہندی اے تے عوام نوں وی حق پہنچدا اے کہ اوہ اپنی زندگیاں بچان لئی ہتھ پیر مارے۔ ایس توں پہلاں کہ مہنگائی دا اژدھا عوام نوں اپنے منہ وچ پوری طرح قابو کر لوے اسیں عوام وی اپنا حق استعمال کر سکنے آں کہ حکومت دا تخت سٹ دتا جاوے تے شہباز شریف دے سر توں وزارت عظمیٰ دا تاج کھو لیتا جاوے۔ عمران خان اپنے اقتدار دی جنگ وچ مصروف اے لیکن عوام دی جنگ اپنے حقوق لئی ہووے گی۔ عوام تقریباً سارے سیاستداناں نوں آزما چکے نیں۔ سارے سیاستداناں نے ای عوام نوں مایوس کیتا اے۔
واری واری عوام نوں ساریاں نے لٹیا اے۔ عوام نے جہنوں وی اپنا رہنما سمجھیا اوہو راہزن ثابت ہویا۔ کاش ساڈے ملک وچ کوئی ایسی قیادت سامنے آوے جہڑی عوام وچوں ہووے‘ عوام جئی ہووے۔ جہدے دکھ عوام جئے ہون گے اوہ قیادت ای عوام دے مسئلے حل کر سکدی اے۔ جہدے درد عوام جئے نہ ہون۔ ایسی قیادت عوام دے مصائب دا ادراک کر ای نہیں سکدی۔ جدوں سارے سیاستدان ای عوام دے حق وچ موت دا فرشتہ ثابت ہوئے نیں تے ہن عوام نوں وی اپنا مسیحا اپنی صفاں وچ تلاش کرنا چاہیدا اے۔
نہیں تاں حکومتاں عوام لئی پروانہ موت جاری کردیاں ای رہن گئیاں کدی مہنگے آٹے دی صورت وچ‘ کدی مہنگے پٹرول دی شکل وچ تے کدی مہنگی ترین بجلی دی صورت وچ۔