حکومت دا خودکش انداز

سعد اللہ شاہ

کوئی مرکز بھی نہیں کوئی خلافت بھی نہیں
سب ہی حاکم ہیں مگر کوئی حکومت بھی نہیں
جھوٹ ہی جھوٹ ہے یہ سارا نظام حرمت
اور اس جھوٹ پہ حاکم کو ندامت بھی نہیں
تسیں یقین کرو کہ سارے ای اقتدار دے بھکھے نیں۔ گھٹو گھٹ ایس معاملے وچ مولانا نے سچ تے ای کہیا سی کہ کیہ کوئی اقتدار حاصل نہ کرن لئی وی سیاست کردا اے۔ کوئی منے یاں نہ منے پر سراج الحق دی گل سچ اے کہ ایوان تے عدلیہ مورچہ زن نیں۔ آئین تختہ مشق بنیا ہویا اے۔ اک فلمی ویکھی سی جہدے وچ رنگیلا تے منورظریف اپنے استاد دی خدمت کردے ہوئے استاد دیاں دوہاں لتاں دی مالش کردے سن جدوں استاد نے اپنی سجی لت کھبی لت تے رکھی تے رنگیلے نے کہیا کہ تیری لت دی ایہ جرأت کہ میری لت تے سواری کرے ایہ کہندے ہوئے اوہنے اوسے لت تے ڈنڈا کڈھ ماریا۔ استاد چیکیا پر منورظریف نے ایہ کہندے ہوئے کہ توں میری لت تے ڈنڈا ماریا اے کہندے ہوئے تتا تتا پانی کھبی لت تے پا دتا۔ دوہاں لتاں نوں اپنی ملکیت سمجھن والے بھُل گئے اوہناں نے استاد دیاں دوویں لتاں مجروح کر دتیاں سن۔ ایہ مذاکرات دا معاملہ وی عجیب اے ایہ تے سچ مچ مذاق رات اے۔ گھٹو گھٹ حکومتی لوک تے مذاکرات نوں وقت ٹالن لئی کر رہے نیں۔ پی ٹی آئی والے سمجھن توں قاصر نیں کہ ایہ ہو کیہ رہیا اے ہن گل ایہو ہو رہی اے کہ جہدا ڈر سی اوہو ہویا اے۔ مولانا دا موقف ایہہ وے کہ الیکشن کمیشن سیاستداناں نوں سد کے گل کر سکدا اے پر الیکشن کمیشن تے پی ٹی آئی تے اعتماد نہیں۔ گل فواد چوہدری دی وی باوزن اے کہ لوکاں دے نمائندہ لوکاں دی حکومت نہیں۔
کہیا جا رہیا اے کہ پی ڈی ایم مذاکرات لئی سنجیدہ نہیں تے اہ ایہ بالکل غلط نہیں کہ عام جیہا فہم رکھن والا بندہ وی سوچ سکدا اے کہ اپنی موت نوں کون آواز دیندا اے۔ حکومتی لوک ایس لئی وی خطرناک ہو چکے نیں کہ اوہناں نوں اپنا مستقبل نظر ای نہیں آ رہیا۔ اوہ پہلے ای جیلاں تے سزاواں بھگت چکے نیں اوہناں دے سینے تے ہتھ رکھن والا وی کوئی نہیں‘ معاملہ کجھ زیادہ ای الجھ گیا اے شاہ محمود قریشی دیاں گلاں توں سب کجھ واضح اے کہ ایہ مذاکرات وغیرہ سب فضول نیں اک ڈرامے توں علاوہ کجھ نہیں کہ حکومت تے اپنے موقف توں اک انچ وی پچھے نہیں ہٹی کہ اوہ خرچیاں لئی پیسے دے دیوے گی۔ سگوں ایہ معاملہ تے پچھے رہ گیا اے اوہ تے ہور بھوتر گئے نیں۔ ہن بھوتر دا ترجمہ نہیں ہو سکدا۔ ہور تے ہور بلاول زرداری ای من نہیں رہے۔ اوہ جو کہندے نیں وڈے میاں سو وڈے میاں چھوٹے میاں سبحان اللہ۔ پی ٹی آئی تے اکتوبر لئی الیکشن دا من سکدی اے پر ایس گل دا کون یقین دوائے کہ اکتوبر وی کبوتر ثابت نہ ہووے۔ تسیں یقین کرو کہ حکومت کسے معجزے دی تلاش وچ اے کہ اوہناں دی پوزیشن کسے طرح نال بہتر ہو جاوے شاید روس توں پٹرول سستا مل جاوے یاں کوئی آئی ایم ایف رحم کھا لے۔ ن لیگ نوں آپ یقین نہیں آ رہیا کہ اوہناں دی پوزیشن اینی مخدوش ہو جاوے گی۔ اوہناں ولوں تے طے اے کہ عمران خان نہ آئے تے ایس گل نال سارے اتحادی مکمل طور تے متفق نیں۔ لوکاں وچ اوہ ایہ گل کردے نیں کہ کسے نوں کیہ اختیار کہ اوہ جدوں چاہے چنگی بھلی اسمبلی توڑ کے کہوے الیکشن کرائو۔ کیہ لوکاں دے پیسے ایس مقصد لئی نیں ایس لئی اوہناں نوں پاکستان دے لوکاں دے پیسیاں دا کناں خیال اے۔ اک ہور گل بڑی اہم اے کہ جہدے ول غور نہیں ہو رہیا حکومت بجٹ پیش کرن تک جانا چاہندی اے تے ایس بجٹ وچ اوہ بارودی سرنگاں وچھائے گی یعنی آن والی حکومت لئی کوئی نہ کوئی وڈا مسئلہ چھڈے گی۔ ایس توں پہلاں وی انج ہوندا آیا اے انج تے اوہ عمران خان تے وی ایہو چارج لاندے نیں کہ اوہنے آئی ایم ایف نال نہ نبھان والے معاہدے کیتے۔ معاہدے نبھان لئی حکومت نوں لکیراں کڈھنیاں پئیاں ہن ایسے طرح دا بدلہ ایہ حکومت وی تے لوے گی کیوں جے ویلا گزرن دے نال نال ایہدی کامیابی دے امکانات گھٹ رہے نیں۔
ہن صورتحال ساریاں دے سامنے اے کہ شہبازشریف دی لکنت وچ وی روانی آ گئی اے کہ کہندے نیں تن رکنی بنچ دا فیصلہ نہیں من دے‘ گھر گھلنا چاہندے نیں تے تیار آں پر ایوان دا مان نہیں توڑاں گا۔ 180 ارکان دا اعتماد وکھایا جا رہیا اے۔ منیرنیازی نے کہیا سی کہ اک دوجے دے خوف نال جڑے ہوئے نیں شہر دے مکان۔ شہبازشریف نے ارکان دے اعزاز وچ ظہرانہ وی دتا اوہ تے عصرانہ تے عشائیہ وی دین گے۔ اک زمانہ سانوں یاد اے جدوں ن لیگی ارکان نوں چھانگا مانگا لے جا کے تن وقت دا کھانے دا ذمہ لیا گیا۔ اودوں تے ارکان لئی ہارس ٹریڈنگ دا لفظ استعمال کیتا جاندا سی تے ایس لفظ دی چھانگا مانگا دے نال مناسبت وی سی میرا مطلب اے تلازمہ مکمل سی۔ آخر وچ بابراعظم نوں مبارکباد کہ پہلا ون ڈے میچ نیوزی لینڈ توں جت لیا۔ نیوزی لینڈ نے بڑا چنگا کھیڈ پیش کیتا تے 287 دا ٹارگٹ دتا 117 دی کمال اننگز کھیڈی بابر دی ففٹی اک رنز توں رہ گئی امام نے 60 رنز کیتے اک ویلا اجیہا وی آیا کہ رنز بننے بالکل بند ہو گئے آغا سلمان نے یاراں بال ضائع کیتے پر آخر رضوان ای کم آیا تے اوہنے کمال اننگز کھیڈدے ہوئے پاکستان نوں فتح دلائی۔ پاکستان 500 فتوحات والا تریجا ملک بن گیا۔ سب توں اہم گل کہ بابراعظم اپنی فارم وچ آ گیا اے تے انج وی ٹیم وچ اک ٹیم ورک نظر آیا نواز نے وی چھیتی کرن دی تھاں رضوان نوں سٹرئیک دا انتظار کیتا سانوں تے پاکستان دی فتح نال سروکار اے میں آخری گیند تک میچ ویکھیا۔٭