بلاول بھٹو تے جمہوری قدراں
ڈاکٹر صغرا صدف
پیپلزپارٹی شاید اوہ واحد سیاسی جماعت اے جنہے سیاست دے پرخار راہواں تے چلدے ہوئے سب توں ودھ اوکڑاں دا سامنا کیتا۔ سب توں ودھ قربانیاں دتیاں ‘ قیدوبند دیاں اوکڑاں برداشت کیتیاں‘ جلاوطنی دا جبر سہیا‘ خاندان دے بندے نہ صرف اپنی زمین‘ اپنے گھر تے لوکاں توں دور ہوئے سگوں اپنے خونی رشتے داراں توں وی ورھیاں تک بچھڑے رہے۔ وکھووکھ ملکاں وچ وطن دی سربلندی لئی ویکھے گئے اپنے رہنما دے خواباں دی پاداش وچ اکلاپے کٹدے ہوئے اجنبی بن کے رہن تے مجبور ہوئے۔ ادھی صدی پہلاں سرمائے دی غیرمنصفانہ ونڈ وچ لبڑے استحصال زدہ معاشرے وچ غربت دا بھار ڈھوندے پسے ہوئے طبقے نوں ذرا لک سدھا کرن دی ڈھل دینا وی پسندیدہ عمل نہیں سی پر دنیا دیاں وڈیاں طاقتاں دی مرضی دے الٹ پاکستان دی معاشی خودمختاری دا منصوبہ بنا کے کم شروع کر دینا تے بہت ای انقلابی قدم سی جو کامیاب ہو جاندا تے اج پاکستان وی گوانڈھی ملک چین توں قرض نہ منگ رہیا ہوندا سگوں اوہدے برابر کھڑا ہوندا کہ وسیلے تے محنت کرن والیاں دی ایتھے وی تھوڑ نہیں سی جہدے سر تے بھٹو نے سفر دا آغاز کیتا سی پر ظلم دی انتہا ویکھو اپنے ملک تے لوکاں دے مفاد لئی اٹھایا گیا قدم ذوالفقارعلی بھٹو دا ناقابل معافی جرم بن گیا۔
چٹے دن وچ سنھ لاندی کالی رات اوہدے خلاف سازش کرن تے تل گئی۔ کوڑے الزامات نوں عقیدے دی انھی لاٹھی نال بنھ کے مداری نے اوہ خونی کھیڈ رچایا جہدی کڑواہٹ دھرتی دے پانیاں تے فضاواں وچ وی وڑ گئی۔ ہر پاسے زہر پھیل گیا‘ اجلے غلاف پہنے بہروپیے نفرت دا زہر سوچاں وچ بھرن تے لگ گئے پر محبت نوں مات نہ دے سکے کہ محبت دا قصہ کدوں ختم ہوندا اے۔ نویں زمانے دے نویں کردار نویں وادھے کردے ایہنوں اگے ودھاندے رہندے نیں۔ ایتھے وی ایہو کجھ ہویا‘ پنجاب تے پاکستان بھٹو دی محبت توں دستبردار نہ ہوئے تے اک واری فیر ملک نوں سنوارن دی بھج نس دی ویژنری تے دلیر دھی نوں سونپ دتی گئی۔ بی بی قربان ہو گئی تے آصف علی زرداری نے ایس سفر نوں جاری رکھیا تے اپنے دور صدارت وچ وفاق نوں مضبوط تے صوبیاں نوں خشحال کرن لئی اجہے قنونی راہ متعارف کروائے جو اوہناں دی گہری دانش تے حکمت عملی دے ثبوت نیں۔ ایہ اوسے سفر دا اعجاز اے کہ اج اینے ورھے سازشاں وچ جکڑے ماحول دی فضا نکھرنی شروع ہو چکی اے جہدا مطلب اے کہ ہن حالات و واقعات بدل چکے نیں۔ جبر دیاں بے رحم زنجیراں تے کردار ہن اپنے ابدی انجام نوں اپڑ رہے نیں۔
مطالعہ پاکستان دی تطہیر ہونا تے ٹھیک شکل سامنے آن دا عمل جاری و ساری اے۔ تریخ تے پائے جبری نقاب وقت دی تیز رفتار ہوا ہولی ہولی سرکاندی جا رہی اے۔ جے ایہ کہیا جاوے کہ سوشل میڈیا تے موجود اہل دانش نے ایس نسل تے پوری تریخ دے نیک و بد تے ٹائوٹ کردار واضح کر دتے نیں تے غلط نہیں ہووے گا نہ صرف لوکاں دے شعور وچ وادھا ہون نال اوہناں دی رائے بدلی سگوں سیاستداناں نے وی سمجھوتے کرن دی تھاں ٹھیک تے کڑے فیصلے کرن دی ہمت کیتی۔ ایس ویلے ملکی تے غیرملکی اہل دانش و سیاست نوں جس سیاستدان نے متاثر کیتا اوہ بلاول بھٹو اے۔ ہن تک ہر فورم تے اوہنے اپنی مدلل گل بات نال لوکاں نوں متاثر کیتا اے کہ جدوں ہر پاسے جذباتیت تے گالھاں دا دور ہووے اجہی گل بات غنیمت تے خوش خبری اے۔ پارلیمنٹ وچ بلاول بھٹو دی تقریر جمہوری نظام دی برتری تے مضبوطی دے نویں دور دا آغاز اے۔ بلاول نے نہ صرف اپنی ہر تقریر تے عمل نال اک مثبت‘ ویژنری تے پاکستان دے معاملات دا فہم رکھن والے اصول پسند سیاستدان دا احساس دوایا اے سگوں جمہوریت تے یقین رکھن والیاں نوں ناامیدی توں وی بچایا اے۔ اوہدے حافظے وچ پاکستا ندی تریخ دا ہر ورق محفوظ اے جہنوں سمجھ کے اوہ عمل کرن لئی پرعزم اے۔ بدتہذیبی نوں بڑائی سمجھن تے اوہدے تے آکڑن دی فضا وچ اوہ اک باشعور سیاستدان بن کے سامنے آیا اے جو صرف ماضی دے واقعات تے طنز نہیں کردا سگوں اوہدی جیب وچ مستقبل دا خاکہ وی اے۔ یقینا پاکستان نوں ایس ویلے اجہی نوجوان قیادت دی ضرورت اے جو ہوش تے جوش نال مزین ہووے۔ جو صرف زبانی جمع خرچ تے حکمرانی لئی کوشاں نہ ہووے سگوں جہدے کول اجیہا ٹھوس عملی منصوبہ وی ہووے جو ملک نوں درپیش چیلنجاں چوں کڈھ کے ترقی دی راہ تے ٹور سکے۔ اگلے انتخابات وچ وقت ثابت کرے گا کہ پنجاب نہ کل ضیاالحق نال کھڑا سی نہ اج۔ اوہنے کوڑے کھانے قبول کیتے پر بھٹو دے خلاف جان تے راضی نہ ہویا۔ اج جبر دی اوہ فضا باقی نہیں۔ دفاعی ادارہ وی ہن ضیا دے نظریات نوں اون نہیں کردا ایس لئی اج پنجاب اپنی معاشی‘ ثقافتی ترقی تے روشن خیالی دی فضا دی بحالی لئی زیادہ پرجوش اے۔ وہ ہر اوس سوچ دے نال قربت رکھدا اے جو عوامی تے وفاقی اصلاحات دی آئینہ دار اے۔
پیپلزپارٹی پاکستان دی پہلی سب توں وڈی وفاقی جماعت سی تے ہن تک ہے۔ اک اجہی جماعت جہڑی لوکاں نوں ونڈن دی تھاں قومی وحدت وچ جوڑن دی تدبیر کردی اے۔ جو ملک وچ ادب و ثقافت تے تصوف راہیں خیر دیاں قدراں دی پیامبر اے۔ بلاول بھٹو نے اپنی جماعت دی ساری نظریاتی اساس اپنے دل وچ بھری ہوئی اے۔ اوہ اخلاقی‘ روحانی تے سیاسی قدراں دا پاسدار اے۔ میرے ورگے صوفیا دے فلسفے نال جڑت رکھن والے انسان لئی اوہ اک روشن امید اے جو لوکاں دی عزت کرنا جان دا اے۔ خدمت خلق تے عوامی بھلائی جہدا منشور اے مینوں یقین اے جہڑے چراغاں دی سانوں خواہش سی اوہ بلاول ورگے رہنما دے ہتھوں ای روشن ہون گے۔٭
