شرپسنداں دا محاسبہ

ڈاکٹر صغرا صدف

اپنے ملک دی املاک اپنے ای لوکاں دے ہتھوں برباد ہوندے ویکھنا کنی اذیت ناک گل اے۔ پتہ نہیں ملک دیاں سڑکاں‘ گڈیاں‘ عمارتاں تے دفتراں نوں اپنے ہتھ نال اگ دی چنگاری دے حوالے کر کے شعلیاں دے نال نچن والے لوک کس مٹی دے بنے نیں۔ وطن کوئی خیالی تصور ن ہیں‘ جیوندی جاگدی تے دھڑکدی زمین دا ناں اے جہدے صحن وچ ساڈی زندگی ‘پچھان تے بقاء دی پرورش ہوندی اے۔ سوال ایہ نہیں کہ لوکاں نے اجیہا غیرقنونی تے ملک دشمنی تے مبنی عمل کیوں کیتا۔ سوال ایہہ وے کہ اوہناں نے اینی دلیری تے بے خوفی نال ایناں وڈا جرم کیویں کیتا جہدے تے نہ اوہناں نوں کوئی شرمندگی اے نہ سزا دا ڈر۔ اوہناں دے ضمیر نے ملامت کیتی نہ ریاست دے کسے قنون نے اوہناں دی متشدد سوچ دا ہتھ روکیا۔ اک بندے دی چاہت وطن دی محبت تے حاوی ہو گئی۔ وقت نے کیسا پلٹا کھادا پچھتر ورھے تک حب الوطنی دے گیت گان تے زمین تے جان نچھاور کرن دیاں قسماں کھان والے زمین دا حسن ساڑ کے مٹی کرن تے تُل گئے۔ حیرت تے فکرمندی دی گل ایہہ وے کہ ذہنی طور تے مفلوج بنائے گئے لوکاں دے ہتھوں ایناں نقصان ویکھن دے باوجود شرپسندی دی حمایت کرن والے ایس رویے نوں برا کہن تے اصلاح تے تیار نہیں۔
اجہی سفاکیت تے شاید پہلے کدی ایتھے نہیں ہوئی پر ملک نوں نقصان اپڑان دے چھوٹے موٹے واقعات کئی واری ہو چکے نیں سگوں پچھلے کجھ عرصے توں ہر احتجاج تے کجھ ٹٹ بھج ضرور کیتی جاندی رہی جہنوں سرکار تے اداریاں دے نظرانداز کرن نال لوک قنون نال کھلواڑ کردے لاقانونیت ول ودھدے رہے۔ پچھتر ورھے توں ہجوم نوں قوم دی شکل نہ دین دا الزام ساریاں برسرپیکار قوتاں تے حکومتاں توں علاوہ والدین‘ استاد تے معاشرے تے وی لاگو ہوندا اے۔ معاشی تے سیاسی آزادی دے ناں تے حاصل کیتے گئے ملک وچ غیریقینی صورتحال نے اک اجہی فضا نوں پروان چڑھایا جتھے لوکاں دی شخصیت وچ تہذیب و شائستگی نوں اجاگر کرن دی تھاں اوہناں دی جبلت دی خونخواریت نوں خوراک دے کے طاقتور کیتا گیا۔ وحشت دے درجے تے انسان جانوراں توں ودھ خطرناک تے اینے وحشت ناک ہو جانے نیں کہ اپنے رستے وچ آن والی ہر شے نوں مدھن وچ سکون محسوس کردے نیں۔ ٹٹ بھج کرن والیاں دے نفسیاتی مسئلے تے محرومیاں دا وی کافی عمل دخ اے جو اک وکھری بحث تے مسئلہ اے۔
9 مئی دی سہ پہر جدوں میں لبرٹی توں گزر رہی سی تے دھوں تے پتھراں دا کھیڈ جاری ہو چکیا سی۔ نہتے لوک اپنی جان و مال دی فکر وچ پریشان حال سن۔ ہر چوک تے کھڑے لوکاں دیاں اکھاں دی وحشت تے ہتھاں دے ڈنڈیاں توں گڈیاں دے اندر بیٹھے لوک وی سہمے ہوئے سن۔ ایہ تماشا کوئی عام گل نہیں تخریبی ذہناں دا ہتھیار بن دا جا رہیا اے۔ مانگ پوری کرن دا ایہ طریقہ تے وطیرہ ہن ختم ہونا چاہیدا اے۔ ایہ منفی طرزعمل ساڈے پیارے ملک دے متھے تے غیرمحفوظ تے بدامنی دا داغ بن چکیا اے۔ ایہدے پاروں سیاح ساڈے ملک دا رخ کردے گھبراندے نیں نہیں تے ساڈے کول وکھووکھ مذہباں دے چاہن والے تے تاریخ داناں نوں متاثر کرن والے جنے مذہبی تریخی‘ ثقافتی تے فطری نظاریاں نال بھرے مقامات نیں ایتھے محققین تے سیاحواں دا تانتا بجھیا رہنا چاہیدا اے۔ ایس واری حکومت تے اداریاں نوں مثال قائم کرنی چاہیدی اے تے ملک دشمنی تے سخت سزاواں دے کے اگوں ایس قسم دی وحشت دا راہ روکنا چاہیدا اے۔
ایہدے وچ دو رائے نہیں کہ ملک وچ بہت ساری اصلاحات دی ضرورت اے پر ایہ اصلاحات خونیں احتجاج دی تھاں ووٹ دی طاقت تے ق نون سازی دے راہیں کیتی جانی چاہیدی اے۔ عمران خان صاحب وی ساڑھے تن ورھے سب اچھا دی رپورٹ دیندے مطمئن رہے تے حکومت جان دے بعد اپنے بنھے ہتھاں دا رونا رون لگے۔ آخر تن ورھیاں دوران جمہوریت نوں مضبوط کرن والی قنون سازی کیوں نہ کیتی گئی۔ مقصد جے عوامی اقتدار ہووے تے ای جمہوریت وی اگے ودھ سکدی اے تے ملک وی ترقی کر سکدا اے۔ ذاتی اقتدار دے دوالے گھمدی سوچ سوائے سمجھوتیاں دے کوئی قابل ذکر اقدام کرن دی متحمل نہیں ہو سکدی۔ دکھ تے ایس گل دا وی اے کہ اسیں رون تے ہسن دے سلیقے نوں روندے سی سانوں تے اج تک احتجاج کرنا وی نہ آیا۔ جمہوری رویاں‘ قنون دے احترام تے اختلاف کرن دی تربیت دے نال وطن پرستی وی نصاب وچ شامل کرنا پوے گی۔ بقول شاعر
وطن چمکتے ہوئے کنکروں کا نام نہیں
یہ تیرے جسم، تری روح سے عبارت ہے
پاکستان نال محبت ساڈی روح وچ شامل اے خدارا ساڈی محبت نوں بے وقار نہ ہون دیو‘ ملک دی تذلیل کرن والیاں دا ہتھ روکو۔٭