کیہ ایہ سچ نہیں؟

مطلوب ورائچ

انج دے بھیڑے حالات نہ پاکستان وچ کدی پہلے ویکھے‘ نہ سنے تے نہ ای کدی پڑھے سن تے ایس طرح سیاستداناں نوں کدی انتخابات توں ڈر کے راہ فرار اختیار کردے وی کدی نہیں سی ویکھیا۔ ایہناں لوکاں تے شک ہوندا اے کہ ایہناں نے سیاست وچ ایناں ناں کمایا اے اوہ سیاستدان ہے وی یاں نہیں۔ جمہوریت وچ مقابلہ سیاسی میدان وچ ہوندا اے حریف دی اکھاں وچ اکھاں پا کے گل کیتی جاندی اے۔ ہتھاں وچ ہتھ پا کے مقابلہ کیتا جاندا اے۔ صرف شکست نوں ویکھ کے انتخابات گریز بیانات‘ کالعدم قرار دوان تے پابندیاں وچ جکڑن دے منصوبے‘ کیہ ایہ سیاست تے جمہوریت اے۔ تیراک تالاب وچ اترن توں گریز کرے‘ ڈرائیور ڈرائیونگ توں انکار کرے‘ سیاستدان انتخابات وچ نہ جان دے بہانے لبھے‘ ساری اکو گل اے۔ اج حکومت وچ موجود ساریاں پارٹیاں یک زبان ہو کے عمران خان دی حکومت دوران انتخابات دا مطالبہ کردیاں سن۔ جس دھڑلے نال ایہ مطالبہ کیتا جاندا اے آپ حکومت وچ آئے تے ہن انتخابات نہ کران تے ایس توں ودھ ولولہ وکھایا جا رہیا اے۔
بلاول بھٹو زرداری اپنے نانا ذوالفقارعلی بھٹو تے اپنی ماں بینظیر بھٹو دی سیاسی وراثت دے دعویدار نیں اوہ تے انتخابات توں کدی نہیں سن گھبرائے جد کہ بلاول بھٹو زرداری اوہناں قوتاں دے آلہ کار بن گئے جو انتخابات توں نس رہے نیں۔ اج حالات جس طرح ماڑے نیں حکومت دی الیکشن گریز پالیسیاں دا نتیجہ اے۔ ایس حوالے نال حکومت کس حد تک چلی گئی اے ایہ وی کدی پاکستان وچ نہیں ہویا۔ عدلیہ دی تضحیک ججاں دے ناں لے کے‘ اوہناں تے دشنام‘ اوہناں خلاف قنون سازی کابینہ دے اجلاساں تے پارلیمنٹ دے فورم تے مذمتی قرارداداں‘ انج کدی نہیں ہویا۔
عمران خان نوں القادر ٹرسٹ کیس وچ نیب نوں مطلوب ہون تے چک کے قید کر دتا گیا۔ عمران خان تے ڈیڑھ سو مقدمے نیں۔ اوہ کدی اسلام آباد تے کدی لہور دی عدالت وچ ہوندے نیں۔ سابق کسے وزیراعظم تے اینے مقدمے وی کدی نہیں بنے۔ اوہناں نوں پھڑنا سی تے پھڑدے ایس کیس وچ کیہ خاص سی۔ وڈے وڈے لیڈر گرفتار ہوندے رہے نیں۔ ہو سکدا اے کہ ایس توں وی بھیانک طریقے نال ہوندے ہون پر انج لوکاں نے کدی نہیں ویکھیا۔ جس طرح ریڈ کیتا گیا کالر توں پھڑیا گیا‘ ویل چیئر توں چک کے دھرویا گیا تے ایہ سارا عدالت دے احاطے دے اندر ہویا۔ ایہدے تے پی ٹی آئی دے ورکرز اشتعال وچ آئے۔ کوئی اک وی گرفتاری دے ایس طریقہ کار توں متفق نہیں سوائے سفاکانہ ذہنیت رکھن والے دے‘ گرفتاری توں کیہ حاصل ہویا۔ پورے ملک وچ جلائو گھیرائو‘ اطلاعواں موجب سو توں ودھ بندے موئے‘ ہزا رتوں ودھ زخمی‘ وڈے لیڈراں سنے پنج ہزار پھڑے گئے۔ سٹھ ارب ڈالر دی املاک د نقصان‘ جدید دور وچ انٹرنیٹ تے کاروبار منتقل ہو رہے نیں۔ تن دن نیٹ کدھرے بند زیادہ تر محدود رہیا۔ پھڑے جان والے رہا ہو جان گے پر کئی چیزاں دا کوئی متبادل نہیں۔
اداریاں دے اندر اجہی تقسیم پہلے کدی نہیں سی ویکھی گئی۔ حکومت ولوں اپنے مقصد لئی عدلیہ تے پاک فوج نوں وی استعمال کرن دی کوشش کیتی جا رہی اے۔ تاثر دتا جاندا اے کہ اسیں سب کجھ اُتے والیاں دے کہن تے ای کر رہے آں۔ فلاں دی گرفتاری نال ساڈا تعلق نہیں۔ عمران خان دی گرفتاری خلاف لوک لہور وچ کور کمانڈر دے گھر وڑ گئے۔ جی ایچ کیو وچ وی ایہو کجھ ہویا‘ کور کمانڈر ہائوس تے ساڑ ای دتا گیا۔ سوال کرن والے پچھدے نیں کہ سکیورٹی کتھے سی۔ پوری دنیا وچ اک واری فیر تاثر گیا کہ پاکستان دی حساس ترین تنصیبات وی محفوظ نہیں۔ ایہ سب کیہ پلاننگ دے تحت ہویا کسے سازش دے تحت ہویا جو وی ہویا سوال ایہو اٹھدا اے سکیورٹی والے کتھے سن؟ کہیا جاندا اے کہ سکیورٹی والیاں نے مزاحمت نہیں کیتی تاں جے موتاں توں بچیا جا سکے۔ مزاحمت دی لوڑ ای نہیں سی۔ بس اوہناں دے سامنے حصار کھڑا کر دیندے۔ ایہ لوک آ کے نعرے لا کے واپس ٹر جاندے۔ عمران خان ولوں فیر کہیا گیا کہ آزادانہ انکوائری ہووے۔ اوہ سپریم کورٹ دے چیف جسٹس دی سربراہی وچ انکوائری دا مطالبہ کر رہے نیں۔ اودھر مولانا فضل الرحمن دی قیادت وچ پی ڈی ایم سپریم کورٹ دے چیف جسٹس خلاف احتجاج کر رہی اے۔ عجب اے کہ حکومتی پارٹیاں چیف جسٹس دے خلاف اوس علاقے وچ مظاہرہ کرن جتھے آپ دفعہ 144 لائی اے تے فوج نوں وی سدیا گیا اے۔ فوج تحریک انصاف دے احتجاج نوں روکن لئی سدی گئی اے۔ حکومتی پارٹیاں ولوں الزام لایا جاندا اے چیف جسٹس تے کجھ جج عمران خان دے نال ملے ہوئے نیں۔ الزام ای نہیں سگوں کردار کشی وی کیتی جاندی اے۔
دوستو! وطن عزیز وچ حکمران آپ قنون تے آئین تے عملدرآمد کرن توں انکاری نیں ایس لئی جدوں ملکی ادارے ملکی قنون نوں منن توں انکاری نیں تے فیر ریاست دے جبری احکامات تے عملدرآمد کیویں ممکن اے؟ ہن سول نافرمانی دا آغاز آپ حکومت وقت نے کر دتا اے ایس لئی گرفتاریاں لئی چھاپے تے پکڑ دھکڑ سب ماورائے آئین اے ایس لئی تہانوں پھڑن والا اصل وچ تہانوں اغوا کرنا چاہ رہیا اے تے اوہنوں روکنا تے مزاحمت کرنا تہاڈا مڈھلا حق اے۔ میرے ایس بیان دی ہر پارٹی دا ورکر اپنی مرضی دی تشریح تے ترجمہ کرے گا پر ایہدے نال کیہ حقیق