مگرمچھ دے اتھرو

روہیل اکبر

اللہ تعالیٰ ولوں سانوں ملن والے ایس خوبصورت پاکستان وچ دنیا دی ہر خوبصورتی تے وسیلے موجود نیں ایتھے معدنیات نال بھرے پہاڑ نیں سونے ورگی زمین اے چاندی ورگے ریگستان نیں‘ چارے موسم نیں‘ سمندر نیں‘ دریا نیں‘ ندی نالے نیں پر ایہدے باوجود اسیں مزدور پیدا کرن وچ دنیا دے 9 ویں وڈے ملک وچ شمار ہونے آں۔ ساڈے مزدور دنیا بھر وچ کھوتیاں وانگوں کم کردے نیں اوتھے اوہناں نوں دن نوں سکون ملدا اے نہ اوہ رات نوں چین دی نیندر سوندے نیں تے اوہناں دے خون پسینے توں حاصل ہون والی کمائی پاکستان دی معیشت دی ترقی وچ دوجے نمبر اُتے اے جے ایہ لوک پاکستان پیسے نہ گھلن تے ساڈی معیشت دا دھڑن تختہ ہون وچ کناں ویلا لگے گا۔ حیرت دی گل ایہہ وے کہ ساڈی پی ڈی ایم حکومت نے سب توں پہلاں اوہناں دے ووٹ دا حق ختم کر دتا ساڈے ملک وچ کم کرن والے مزدوراں تے ملک توں باہر جا کے کم کرن والے مزدوراں دی سوچ وچ زمین اسمان دا فرق آ جاندا اے تے باہر جا کے اپنے ملک دے وسیلیاں دا وی اندازہ ہو جاندا اے تے نال ای لٹن والیاں دا وی پتہ لگ جاندا اے جہناں دی وجہ نال پاکستان وچ صرف غریب ای پیدا ہو رہے نیں جے ایہ کہیا جاوے کہ پاکستان وچ پیسہ صرف لٹ مار تے فائلاں نوں پہیے لان والیاں دی قسمت وچ اے تے غلط نہیں ہووے گا کیوں جے ایتھوں دا پڑھیا لکھیا بچہ وی نوکری تے کاروبار دے ذرائع نہ ہون پاروں مزدور ای بن رہیا اے تے جہناں دی سفارش ہوندی اے اوہناں نوں اعلیٰ عہدیاں تے بھرتی وی کر لیا جاندا اے ترقیاں وی ملدیاں نیں تے لٹ مار دے ساتھی وی بن جاندے نیں۔
تسیں میاں نوازشریف تے شہبازشریف دا پورا دور چک کے ویکھ لوو کہ کس طرح اوہناں نے میرٹ دی گردان پڑھدے پڑھدے اپنے چاہن والیاں نوں محکمہ پولیس‘ مال‘ ایجوکیشن سنے تقریباً 36 توں ودھ محکمیاں وچ اعلیٰ عہدیاں سنے چھوٹے عہدیاں تے وی بھرتی کرایا۔ اہل‘ ایماندار تے قابل لوکاں نوں جدوں میرٹ تے نوکریاں نہیں ملن گئیاں تے اوہ وی مزدور ای بنن گے۔ پاکستان ایس ویلے آبادی دے لحاظ نال دنیا دا چھیواں وڈا ملک اے جتھے کجھ خانداناں‘ وڈیریاں‘ جاگیرداراں تے سرمایہ داراں نوں کڈھ کے اک سائیڈ تے رکھ دیو تے باقی سارا ملک مزدور ای نظر آوے گا۔ ساڈے پنڈ تے اوتھوں دے لوکاں د رہن سہن ویکھ لوو اندازہ ہو جاوے گا غربت کیہ اے۔ کئی کئی ورھیاں توں اک جوڑا جتی تے دو سوٹ کپڑیاں دے نال زندہ رہن والے ایہ وی پاکستانی نیں جہناں نوں کوئی سہولت نہیں جو گرمیاں رُکھاں دے تھلے تے سردیاں کمبدے ہوئے گزاردے نیں تے اوہناں دے ووٹاں نال اقتدار وچ آن والے دنیا بھر دیاں آسائشاں اک کلک تے انجوائے کردے نیں جے ویکھیا جاو یتے ساڈے سرکاری ملازم جہناں دا گریڈ 16 تے ایس توں گھٹ اے اوہ وی مزدور ای نیں جہناں دی تنخواہ آن توں پہلاں ای ختم ہو چکی ہوندی اے تے فیر اوہ پورا مہینہ بچیاں نوں تسلیاں دیندے ہوئے گزاردے نیں ساڈی پولیس وچ کانسٹیبل توں تھانیدار تک جنے ملازم نیں اوہ وی مزدوراں وانگوں کم کردے نیں۔ موجاں تے عیاشیاں نیں تے افسراں دی جو سرکاری خرچ تے پوری زندگی گزار جاندے نیں۔
مزدور رہنما دریاب یوسف تے فاروق آزاد نال مزدوراں دے عالمی دن دے حوالے نال گل ہو رہی سی تے اوہناں دا کہنا سی کہ ساڈے نظام حکومت نے ملک دی تقریباً 85فیصد توں ودھ آبادی نوں مزدور وی نہیں بنن دتا کیوں جے مزدور تے فیر کدھرے نہ کدھرے کم دھندا لبھ ای لیندا اے پر جو سفیدپوش طبقہ اے اوہ تے مزدوری کر سکدا اے تے نہ ای کسے دے اگے ہتھ پھیلا سکدا اے تے جو اوہناں نوں ایس حال تک اپڑان والے نیں اوہ اوہناں دی بے بسی تے اتھرو بہانا فرض سمجھدے نیں خا ص کر حکمراناں ولوں بڑی شعلہ بیانی کیتی جاندی اے مزدوراں دی فلاح و بہبود دے منصوئے بنائے جاندے نیں پر نتیجہ صفر ای نکلدا اے۔ ساڈا مزدور اپنے بچے نوں کسے چنگے سکول وچ پڑھا نہیں سکدا۔ سرکاری سکول وچ وی ایس غرض نال نہیں گھلدا کہ کل نوں پڑھ لکھ کے وی نوکری نہیں ملنی ایس لئی ویلا ضائع کیتے بناں اوہ اوہنوں کسے نہ کسے کم تے لا دیندا اے۔ ساڈے ایتھے چائلڈ لیبر دا قنون موجود اے پر اوہدے تے عمل نہیں ہوندا بچے بچپن توں ای نوکر بن جاندے نیں تے فیر ایہ نوکری خاندان تک چلدی اے۔ دوجے لفظاں وچ جے ایہ کہہ لوو کہ ساڈا نظام نہ مزدور پیدا کردا اے نہ غریب سگوں غلام پیدا کر رہیا اے جو حکمراناں دی غلامی توں لے کے سرمایہ داراں تک دی غلامی کردا اے جے اسیں ایس غلامی توں آزاد ہو جائیے تے فیر ہر چیز طریقے تے سلیقے نال ہووے گی کوئی ملازم غیرقنونی طریقے نال کم نہیں کرے گا۔
مینوں شیخ رشید دا جملہ یاد آ رہیا اے کہ پاکستان وچ غریب دا دشمن غریب ای اے جو اک دوجے نوں ماردا اے برباد کردا اے تے فیر اک دوجے دی بربادی دا جشن مناندے نیں جد کہ سرمایہ دار‘ جاگیردار تے مفاد پرست کدی آپس وچ نہیں لڑدے حکومت کسے دی وی ہووے پر چینی تے ارباں روپیے دا مفاد حاصل کرن والے اک ہوندے نیں تے لائناں وچ لگ کے اک دوجے نوں پیراں تھلے مدھن والے‘ اک اک روپیے دی خاطر اک دوجے دے لہو دے پیاسے بن جاندے نیں۔٭