سلسلہ ہدایت تے اک رول ماڈل عالم

سعد اللہ شاہ

حسرت وصل ملی لمحہ بے کار کے ساتھ
بخت سویا ہی رہا دیدہ بیدار کے ساتھ
ایک احساس وفا کی طرح بے قیمت ہیں
ہم کو پرکھے نہ کوئی درہم و دینار کے ساتھ
اک کیفیت اے کہ جہدا بیان ممکن نہیں۔ میری گل نوں سمجھنا تہاڈے لئی بالکل وی اوکھا نہیں کہ سیاست تے سماجی منظرنامہ تہاڈے سامنے اے پر جو شہزاداحمد نے کہیا سی:
چلتی ہے زیر دشت بھی پانی کی ایک لہر
آتا ہے دشت میں بھی ہرن ناچتا ہوا
میں اک خوشگوار تقریب سعید دا تذکرہ کرنا چاہنا واںکہ ساڈے پیارے ڈاکٹر منہاس وچ اک روٹیشنل درس دا آغاز کیتا کہ صوت القرآن والے باقاعدگی نال ایس کارخیر نوں چلا رہے نیں۔ ایس توں پہلاں ایس باکمال بندے دا تذکرہ بہوں ضروری اے جہناں نے پہلے درس توں آغاز کیتا۔ میرے ذہن وچ ایہ بڑے عرصے توں اے کہ میں مولانا محمدعرفان دا تذکرہ کراں کہ اوہ باقی علماء کرام لئی اک رول ماڈل نیں۔ تہانوں سن کے حیرت ہووے گی کہ اوہ اک باعمل عالم تے ہے نیں پر جس چیز نے مینوں زیادہ متاثر کیتا اوہ اوہناں دا کسب معاش اے۔ اوہ صاف کہندے نیں میں قلم دی مزدوری کرنا واں۔ اوہ عربیوچ طاق نیں تے اوہناں نوں پروف ریڈنگ دا ایناں کم ملدا اے کہ جے دوجے علماء وی چاہن تے اوہناں لئی وی کافی اے۔ اک ہور حوالا وی بڑا ضروری اے کہ اوہناں دے ہتھ تے کئی غیرمسلم مسلمان ہوئے تے اوہناں دی تنظیم دا ناں ابن مریم اے۔ خیر عرفان صاحب نے جو مسجد بنائی تے اوہدا ناں وی ابن مریم اے۔ جدوں کوئی مسلمان ہوندا اے تے اوہدے نال رابطے وچ رہندے نیں۔ عرفان صاحب ہر واری حاجیاں دے نال معلم دے طورتے وی جاندے نیں عربی تے اوہناں نوں دسترس اے تے ایسے واسطے اوہناں دے دوست مکہ تے مدینہ وچ وی نیں۔ اوس دن ڈاکٹر افتخار منہاس دے گھر وچ اوہناں نے پہلا لیکچر دتا کہ لوکاں دے دل موہ لئے۔ اوہناں دی گل بات دا کمال اے کہ واقعات دے انداز وچ گل ذہن نشین کرواندے نیں کیوں جے ایہ درس دے سلسلے دا پہلا پروگرام سی تے اوہناں نے آغاز قرآن توں لفظ ہدی تے خطاب کیتا۔ ایہ کتاب فرقان اک ہدایت نامہ اے کہ انسان نے زندگی کیویں گزارنی اے۔ اللہ نے آغاز دے کلام توں ای اساسی گل کہہ دتی کہ زندگی دی کامیابی کیہ اے۔ پہلے ایہ دعویٰ کیتا کہ خالق دا دعویٰ اے کہ ایس کتاب وچ ذرا برابر شک نہیں۔ ریب دا معنی اے کہ کم ترین شک۔ جو غیب تے یقین رکھدے نیں نماز قائم کردے نیں تے اللہ دے دتے ہوئے وچوں خرچ کردے نیں۔ نال ای دس دتا کہ ایہ لوک کامیاب نیں تے فلاح پان والے نیں۔ اوہناں آکھیا کہ کوئی پورا قرآن پڑھے نہ پڑھے شروع دیاں کجھ آیتاں ای اوہدی سمت نمائی کر دیندیاں نیں۔
عرفان صاحب دی گل وچ بلا دی تاثیر اے کہ اوہ عمل وچ ڈھلے ہوئے عالم دین نیں۔ اوہ بڑے سوشل نیں تے ہنس مکھ نیں۔ لوکاں دی دلجوئی کردے نیں گلاں گلاں وچ پتے دی گل کر جاندے نیں۔ اوہناں نے تیراں چوداں ورھے دی عمر وچ حفظ کر لیا۔ عالم دین بنے تے ستاراں ورھے دی عمر وچ امام ہوئے۔ کجھ عرصے بعد ای اک جوڑا اوہناں دے کول آیا تے لڑکی مسلمان ہوئی۔ اوہناں نے لڑکے نوں کیسی حکمت دی گل کہی کہ دیکھو ایہ جو مسلمان ہوئی اے ایہنوں اسلام دے بارے پتہ نہیں۔ جدوں تک تسیں ایہنوں اک سچا تے عملی مسلمان بن کے نہیں وکھائیں گا ایہ اسلام تے قائم نہیں رہ سکے گی۔ بہرحال ایس ویلے اوہ باقاعدہ ایہنوں اک مشن بنائے ہوئے نیں پر ایس توں وڈا مشن کہ مسلمان نوں صحیح مسلمان بنانا اے۔ مینوں قرآن پاک دی اوہ آیت یاد آ گئی جہدا مفہوم ایہہ وے کہ نبی پاکؐ ہوریں تے دین وچ حق دی شہادت نیں تے اوہناں دی امت دوجی قوماں لئی نمونہ اے یعنی اوہ وی شہادت نیں۔ ایمان افروز گل ایہہ وے کہ ہدایت دی ہوا چل رہی اے۔ مرغزار کالونی وچ اک درس خدیجتہ الکبریٰ پارک وچ ہووے گا۔ اک غوثیہ پارک وچ تے مسجداں وچ وکھرے دروس نیں۔ ہن دی واری وی بڑے برگزیدہ جہے مہمان سدے سن جہدے وچ مولانا حمید حسین‘ ڈاکٹر ناصر قریشی‘ ندیم خان‘ غلام عباس جلوی‘ صہیب مقصود تے عبدالغفور توں علاوہ کئی مہمان باہروں سن۔ کجھ لوک خالص جماعت اسلامی ذہن دے سن۔ مہمان خصوصی تے ساڈے نویں صدر چوہدری شہزادچیمہ سن اوہناں دی جت نوں تے یقینا وکھرے توں سیلی بریٹ کیتا جاوے گا۔ مل بیٹھن دا اک مقصد خاص ایہ سی کہ کالونی وچ لوکاں نوں سہولتاں کیویں دتیاں جان۔ بجلی دی ودھدی ہوئی قیمتاں وچ ٹیوب ویل چلانا ممکن نہیں رہیا کوئی سولر دا انتظام کیتا جاوے سن کے حیرت ہوئی کہ بجلی دے بل سٹھ ستر لکھ تک اپڑ گئے۔ ایہدے وچ موجودہ مہنگائی دا وی وی تذکرہ ہویا۔
شفیق ملک تے باقاعدہ سیاستدان نیں تے اوہ جماعت ولوں ایم پی اے دا الیکشن وی لڑدے نیں۔ اوہناں دا کہنا بالکل ٹھیک سی کہ کسے وی جماعت دے کول لوکاں لئی کوئی منصوبہ نہیں سگوں موجودہ صورتحال وچ تے اوہ صرف اقتدار بچان یاں حاصل کرن دے چکر وچ نیں۔ اوہناں دی گلاں وچ سچ مچ ملک دا درد سی۔ ایہ گل وی بڑی ای چنگی اے کہ الخدمت توں ہٹ کے وی جماعت دے ونگز نیں جو غریب تے نادار لوکاں دی مدد کردے نیں بچیاں دے نال تقریباں رکھ کے اوہناں نوں انعام دیندے نیں۔ اوہناں دا تعلیم تے زور اے بالکل آخر وچ سعیدملک دا شکریہ کہ کھانے دا ودھیا بندوبست سی:
اے ذوق کسی ہمدم دیرینہ کا ملنا
بہتر ہے ملاقات مسیحا و خضر سے