کھوہ

اقتدارجاوید

مرددانا دی گل بات دا حاصل ایہو سی جو تبریز دے بادشاہ نے کہیا سی۔ ساڈا تہاڈا بادشاہ صائب تبریزی‘ مشرقی آذربائیجان دا صائب۔ برسرکوئے تو غوغائے قیامت می بود گر شکستِ دلِ عشاق صدائے می داشت ۔شکر اے دل ٹُٹن دی کوئی آواز پیدا نہیں ہوندی نہیں تے محبوب دے کوچے وچ قیامت وانگوں شور ہوندا۔ ایہ کہانی مادرملت دے انتخاب توں شروع ہوندی اے تے ندیم افضل چن دے وزیراعظم دے مشیر دے عہدے توں استعفے توں ہوندی ہوئی گلریز افضل چن نوں تحریک انصاف دا ٹکٹ نہ ملن تک آندی اے۔ سگوں ایہ کہانی جاری اے۔ اک ضلع کونسل دی ممبری توں لے کے اقتدار دی غلام گردشاں تے راہداریاں تک دی کہانی۔ نہ سیاسی اشرافیہ دی کہانی وچ کوئی ردوبدل دیکھن وچ آیا اے نہ اوہدی عادتاں وچ۔ اک جنگ اے جو اوہ کیتی جا رہیا اے لوکاں دی جنگ‘ انصاف دی جنگ‘ ظلم خلاف جنگ۔
صبح سویرے پولیس اہلکار تناں بھائیاں نوں انج طلب کردے نیں جیویں اوہ ملزم ہون جیویں اوہناں نے کوئی جرم کیتا ہووے۔ جہدی معافی ناممکن ہووے‘ اوہو خشونت بھری آواز کہ ووٹ ایوب خان نوں پوے گا کہ نہیں؟ جدوں جواب نہ وچ آیا تے وڈے بھائی نوں پولیس اوتھے چالان کرکے نال لے گئی۔ تناں بھائیاں نے الیکشن والے دن فاطمہ جناح دا کیمپ لایا تے ڈنکے دی چوٹ تے مادرملت نوں ووٹ دتا۔ مادر ملت نوں قیام پاکستان دے پہلے پندراں ورھیاں نے ای بددل کر دتا سی۔ کیہ خواب سن کیہ حقیقت نکلی‘ جو کھوٹے سکے سن اوہناں نے ای اقتدار دی میوزیکل چیئر انج شروع کیتی کہ اوہناں توں وی کھوٹے جوق در جوق مسلم لیگ وچ آندے گئے۔ فیر حالت ایہ ہو گئی کہ ایہو جماعت جو پاکستان دی خالق سی غریب دی جورو بن گئی تے اوہدے حصے بخرے ہوندے گئے۔ مسلم لیگ کنونشن‘ مسلم لیگ کونسل‘ مسلم لیگ۔ کنونشن مسلم لیگ ایوب خان دے حق وچ تے کونسل مسلم لیگ جمہوریت تے آئین دی پاسداری دی امین ہون دے دعویدار سی۔ ایس مسلم لیگ توں تیراں مسلم لیگ دے ناں توں جماعتاں نکلیاں جہناں وچ چھ ہن وی فنکشنل نیں۔ ایہناں تیراں توں ہن کافی دا ناں وی کسے نوںیاد نہیں۔ پر کونسل مسلم لیگ جہڑی کے پی دے عبدالقیوم خان نے بنائی سی تے جنہے مقبولیت دا ریکارڈ وی توڑ دتا سی اجہے اجہے جلوس کڈھے کہ ساریاں دے طوطے اڈ گئے تے 58ء دا مارشل لاء لگ گیا۔
بھٹو دے دل وچ اوہدی مقبولیت دی اجہی گرہ پئی سی کہ کدی خان قیوم نوں اگے خان پچھے خان تے کدی ڈبل بیرل خان کہہ کے دل دے پھپھولے جلاندے۔ آخر اوہناں نوں زیر کرکے ای ساہ لیا تے وزارت داخلہ مدارالمہام بنا دتا۔ خان نے اپنی مسلم لیگ نہیں چھڈی تے لالٹین دا نشان وی سلامت رہیا۔ ایہدے بعد مسلم لیگ دا جہڑا حال آمراں نے کیتا اوہ تے سامنے دی داستان اے۔ کدی ایہ لیگ مجلس شوریٰ وچ گئی کدی نظام مصطفی دی تحریک وچ نواں ستارہ بنی۔ ایہدی کوکھ چوں کجھ ورھے پہلاں مسلم لیگ قائداعظم بنی جہڑی ہن وی جیویں تیویں بنی ای ہوئی اے۔ ایس مسلم لیگ نوں ویکھ کے ایہو کہیا جا سکدا اے کہ یہ سب تمہارا کرم ہے آقا کہ بات اب تک بنی ہوئی ہے۔ کوئی جھرنا سی جو اپنے آپ پھُٹی جا رہیا سی تے اسیں ایس آبشار وچ بھگدے جا رہے سی۔ افضل چن دی گل بات جاری سی۔ سیاسی اشرافیہ دا ناپسندیدہ کنی دیر سیاست وچ رہ سکدا اے نہ صرف رہ سکدا اے سگوں اپنے پچھے کامیابی دیاں داستاناں وی چھڈ سکدا اے۔ اک نواں ضلع بنان لئی ایہناں دیہاڑیاں تے اینی کوشش چاہیدی اے جنی پاکستان بنان لئی سی۔ نویں پاکستان دی تے گل ای نہ کرو۔ پاکستان تے بن گیا نواں پاکستان کنہے بنانا اے تے کیہ بننا اے اپنے آپ نوں عقل کل سمجھن والے اپنی نک تک ویکھن والے تے نہیں چھڈاں گا دا سبق دہران والے ناممکن ناممکن۔
ضلع بنانا تے پچھلے تریہہ ورھیاں تک ایس ضلعے دے اکلوتے صوبائی وزیر دا اعزاز وی۔ ایس ضلع نوں تے مفتوحہ یاں علاقہ غیر سمجھیا جاندا اے۔ وزارتاں دی سوغات آل دوالے دے ضلعیاں تے ختم ہو جاندی اے۔ سیاست دے دریا وچ پانی گھٹ تے مگرمچھ زیادہ ہوندے نیں اوہ جو کہیا جاندا اے دریا وچ رہنا تے مگرمچھ نال وَیر اک ناممکن گل اے۔ سیاست وچ رہنا اے تے سیاستداناں نال بنا کے رکھنی اے۔ دریا وچ رہنا اے تے مگرمچھ توں بچ کے رہنا اے۔ اک ایم پی اے‘ اک ایم این اے دا والد تے اینی سادگی۔ آپ ضیاء دے غیرجماعتی انتخابات توںلے کے ہن ک ناقابل شکست رہن والا تریخ دی پوٹلی کھولدا جاندا سناندا جاندا۔ کہندے نیں جدوں دو برادران اٹھ سالہ جلاوطنی کٹ کے آئے تے ایئرپورٹ تے ای اک وزیراعظم سی تے دوجا وزیراعلیٰ۔ کجھ سکھ کے نہیں سن آئے ایہ اوہناں دی سیاست توں ثابت وی ہو گیا۔ اوہو کم‘ اوہو غلطیاں‘ اوہی رنجشاں تے اوہو ناسمجھی وچ کندھاںنال ٹکراں مارنا‘ کندھاں دا کیہ جانا اے۔ سر پاڑنا اے تے کردے رہو اپنا سر اے جتھے مرضی مارو۔ صبح ویلے ٹیلی فون کیتا لینڈ نمبر ای ہوندے سن برادر خورد نے فون چکیا ملاقات دا وقت طے ہویا عرض کیتا جو غیرقنونی اسلحہ اے ضبط کرو جو آتشیں اسلحہ اے ممنوع کرو پولیس تے اپنی رٹ چاہندی اے اوہنوں جواب دہ بنائو پولیس دی مرضی نال نہیں اپنی مرضی نال حکومت کرو۔ پر نتیجہ اوہو ڈھاک دے تن پات۔٭