تخت نشینی توں بوریا نشینی تک

مظلوب ورائچ

پاکستان دے سیاسی تے معاشی حالات اجے تک وی ماڑے نیں۔ اج پاکستان نوں ماضی دے کسے وی دور دے مقابلے وچ بدترین صورتحال دا سامنا اے۔ سیاسی رواداری مکمل طور تے ختم ہو چکی اے۔ سیاسی رواداری دا مظاہرہ آپس وچ نہیں سگوں حریفاں دے نال کیتا جاندا اے۔ انج تے اج حکومت وچ تیراں یاں تیراں توں ودھ پارٹیاں نیں پر اک دوجے دے نال اوہناں دے رویاں نوں نہیں ویکھیا جانا سگوں اوہناں دے جہڑی سامنے پارٹی اے یاں پارٹیاں نیں اوہناں دے نال اوہناں دا کیہ رویہ اے اوہدی اہمیت اے۔ عمران خان دی پارٹی نوں حکومت چوں کڈھن لئی ایہ پارٹیاں دا اتحاد ہویا تے عمران خان نوں باہر کڈھیا گیا۔ ایہو عمران خان لئی بہت وڈا انتقام سی جیویں میاں نوازشریف نوں اقتدار توں وکھ کیتا گیا سی۔ اک بندے لئی یاں اک پارٹی لئی ایس توں وڈا کیہ انتقام ہو سکدا اے کہ اج اوہ تخت نشین اے۔ اگلے دن اوہ بوریا نشین بن جاوے۔ پر ساڈے ایتھے انتقام دی اگ ایس طرح بھڑکدی اے کہ مخالفاں نوں ساہ لین دے قابل وی نہ چھڈن تے تل جاندی اے۔ ایہو اج کل عمران خان دی پارٹی تحریک انصاف دے نال ہو رہیا اے۔
9 مئی دے بعد تے تحریک انصاف دا بہت ای زیادہ حلقہ حیات تنگ کر دتا گیا ایس توں پہلاں وی کجھ خیر دی خبر نہیں سی۔ ایس توں پہلاں وی تحریک انصاف دے وڈے لیڈراں نوں پھڑیا جاندا تے نال ای حکومت دے ترجماناں ولوں ایہ کہہ دتا جاندا کہ ایہدے وچ ساڈا کوئی ہتھ نہیں پر ہن تے ساریاں دیاں ساریاں پارٹیاں عمران خان‘ اوہناں دی لیڈرشپ تے کارکناں دی وڈی گنتی وچ گرفتاریاں لئی کوشاں اے۔ الزام ایہو لایا جاندا اے کہ اوہناں ولوں جلائو گھیرائو کیتا گیا۔ فوجی تنصیبات نوں تباہ کر دتا گیا ایہدے وچ کوئی شک نہیں کہ بہت زیادہ نقصان ہویا اے فوجی تنصیبات تے کورکمانڈر ہائوس وچ‘ جی ایچ کیو وچ‘ ریڈیو پاکستان تے حملہ ہوندا اے پر بالکل ای مزاحمت نہیں کیتی جاندی ایہدے توں کیہ تاثر لیا جاندا اے۔ حکومت ولوں ایہہ کہہ دتا جاندا اے کہ اسیں آپ لوکاں دیاں لاشاں ڈگن توں روکن لئی منع کیتا۔ لاشاں کیوں ڈگنیاں سن کیہ مظاہرین نوں منتشر کرن لئی یاں اوہناں نوں کسے عمارت وچ وڑن توں روکن لئی فائرنگ دی ضرورت اے۔ لاشاں گران دی ضرورت اے۔ انج پہلے وی کنی واری ہویا اے کہ حکومت ولوں پولیس نوں آرڈر دتا گیا کہ ایہناں تنصیبات دی حفاظت کرنی اے تے بخوبی حفاظت کیتی گئی پر ایس واری کیہ ہویا کہ پولیس نوں بالکل روک دتا گیا۔
جیویں کہ میں پہلے کہیا کہ حکومتی وزیراں ولوں وڈیاں وڈیاں گرفتاریاں تے ایہ کہیا جاندا سی کہ ایہدے وچ ساڈا ہتھ نہیں تے فیر کہدا ہتھ اے ایہ نہیں دسیا جاندا سی۔ اک صحافی کئی دیہاڑیاں توں لاپتہ اے ہائیکورٹ ولوں اوہنوں بازیاب کران لئی ہر ممکن کوشش کیتی گئی‘ آرڈر دتے گئے‘ سختی کیتی گئی پر اوہ بازیاب ہو کے عدالت وچ پیش نہیں کیتے گئے آئی جی نے وی یقین دوایا سی ڈی پی او نے وی یقین دوایا سی پر اوس صحافی دی بازیابی ممکن نہیں ہو سکی عدالت وچ موجود جج صاحب توں علاوہ کوئی دو اڑھائی درجن لوگ موجود ہوندے نیں سگوں اکثر اوقات ایس توں وی ودھ‘ سارے دے سارے ایہہ کہندے نیں کہ اوہ صحافی کتھے اے کوئی پتہ نہیں ہر اک اپنی تھاں لاعلمی دا اظہار کردے رہے۔
9 مئی دی ٹٹ بھن دا بہانہ بنایا جا رہیا اے تے پی ٹی آئی دی لیڈرشپ نوں پھڑ کے کئیاں دیاں ہمدردیاں بدلن دی کوشش وی ہو رہی اے۔ پریس کانفرنساں ہو رہیاں نیں جہناں وچ کہیا جا رہیا اے کہ اسیں تحریک انصاف دا ساتھ دین لئی تیار نہیں استعفیٰ دے رہے آں۔ عمران خان ولوں اک اجہے استعفے تے پارٹی چھڈن تے کہیا گیا کہ مینوں عامرکیانی دا پارٹی چھڈ جانا بڑا افسوسناک لگا‘ اوہ پرانے ساتھی سن۔ ایس طرح عامرکیانی وانگوں ہور وی کئی لوکاں ولوں پریس کانفرنس کیتی گئی اوہناں وچ اک علی زیدی وی نیں۔ علی زیدی ولوں ایہ بیان سامنے آیا کہ اوہ تحریک انصاف دے نال نہیں چل سکدے ایس بیان دے تھوڑی دیر بعد اوہ فیر پریس ٹاک کردے نیں اوہدے وچ اوہناں آکھیا کہ میں تحریک انصاف نہیں چھڈ رہیا تحریک انصاف جے چھڑوانی اے تے میرے متھے تے گولی ماری جاوے۔ ایہدے نال اوہناں آکھیا کہ مینوں اوہناں نے جیل وچ نظربند کیتا سی میں حکومت اگے درخواست کیتی کہ مینوں جے تسیں نظربند ای کرنا اے تے میرے گھر وچ ای کر دتا جاوے۔
لہور توں اک ایم پی اے دے ٹکٹ ہولڈر نوں وی پریس کانفرنس لئی لیاندا گیا اوہنے پی ٹی آئی چھڈن دا اعلان کیتا ٹکٹ واپس کرن دا اعلان کیتا۔ جدوں اوہناں نوں عدالت وچ پیش کیتا گیا تے اوہناں آکھیا کہ اجہی پریس کانفرنس جس طرح نال ہوندی اے تہانوں پتہ ای اے میں تحریک انصاف دے نال آں میں اوہناں دا ساتھ نہیں چھڈ سکدا۔ اوہناں نوں فیر پھڑ لیا گیا ایسے طرح باقی وی کئی لوکاں نوں جہناں دی پریس کانفرنس ہوئی اوہناں دا وی ایہو قصہ اے ایہو کہانی اے تے فیر جس طریقے نال تحریک انصاف دا گھیرائو کیتا جا رہیا اے کل ای میں ویکھیا کہ اک گڈی تے کجھ نوجوان سوار سن اوہ اپنے ہتھ وکھا رہے سن ہتھاں تے مہر لگی ہوئی سی جدوں کسے نوں جیل چوں باہر کڈھیا جاندا اے تے اوہدے ہتھ تے مہر لا دتی جاندی اے ۔ اوہناں نوں عمران خان دے گھر دے باہروں پھڑیا گیا سی۔ جس طرح کور کمانڈر ہائوس ساڑیا گیا فوجی تنصیبات نوں تباہ کیتا گیا ایہدے لئی اک غیرجانبدار تحقیقات دی ضرورت اے۔٭