سازشی تھیوری تے حقیقت

لکھت:ڈاکٹر صغریٰ صدف

اشرف المخلوقات ہو ن دے دعویدار نوں بخوبی احساس اے کہ ایس اعزاز دا جواز عقل تے بصیرت وچ رکھیا گیا اے۔روٹین دے معاملات جیہڑے ساڈی عادت دا حصہ بن جاندے نیں توں علاوہ عقل دی صلاحیت آپ ای کم نہیں کردی۔ ایہہ تے انسان دے ہتھ وچ اک چابی وانگوں اے۔ جس نال اوہ کائنات وچ رکھے رازاں والے صندوق کھولدا جاندا اے تے تسخیر دی تختی تے اپنا ناں لکھدا جاندا اے۔ جے اینوں استعمال نہ کیتا جائے تے اوہ شیواں انسان تے کدی نہیں کھلدیاں۔ کروڑاں ورھیاں توں ایہہ کائنات آباد اے۔ انسان تے کائنات دونویں ارتقا دے سفر توں لنگھ رہے نیں۔ ایہہ راز تے ہمیشاں توں موجود سن پر ایہناں نوں مختلف اوقات وچ دریافت کیتا گیا۔ جدوں کسے صاحب بصیرت نے کسے مخصوص سمت مشاہدے تے حکمت توں جانن دی جستجو کیتی تے ایس تے حقیقت کھلنا شروع ہو گئی۔ کئی وار ایہہ اک قسط وار سلسلہ بن جاندا اے تے ویلے دے نال نال ترقی ہوندی رہندی اے۔ فطرت دے ہر مظہر وچ کئی راز پوشیدہ نیں ۔ زمین تے آسمان دی بیکراں حدود وچ ہجے تیکر سمندراں، جنگلاں، پہاڑاں تے نظام شمسی وچ بے شمار نامعلوم حقیقتاں منتظر نیں کہ کوئی سوچ ایہناں نوں ویکھے۔ خالق کائنات نے انسان دی بصیرت تے ایہناں دی تلاشی رکھ چھڈی اے۔ تلاش وی اک کھیڈ اے۔ انسان دی اکھاں تے پٹی بنھی ہوئی اے۔ ایس دی پہنچ حرکت، آواز تے محسوسات توں نیڑے دیاں شیواں تیکر ای رہندی اے۔ ایہہ دور تیکر ویکھن دی صلاحیت نوں ورتن دا سوچدا نہیں پر کجھ خاص ذہن جیہڑے پٹی کھول کے ظاہری مشاہدے تے ادراک نوں باطنی آگہی دی روشنی وچ ویکھن دی راہ تے چلدے نیں ایہناں دی جھولی ایجاد دے کرامتی پھُلاں نال ضروری بھری جاندی اے۔
مغرب جدوں تیکر چرچ دے زیر اثر رہیا، اوتھے سائنسی ترقی معدوم رہی۔ فلسفیاں ،سائنسداناں، ریاضی داناں تے نفسیات داناں تے طرح طرح دے الزام لگدے رہے۔ موجود ہ تریخ دے مطابق ، قبل مسیح توں سوچ دے رستے تے چلن تے ایجادات کرن والیاں نوں کڑی تنقید تے معاشرتی مشکلاں دا سامنا کرنا پیندا رہیا اے۔ وجہ ایہہ اے کہ اوسط ذہن دے لوگ اک دم توں اعلیٰ ذہن دی تخلیق نوں قبول کرن دی سکت نہیں رکھدے۔ اوہ اپنے محدود دائرے دے حوالے نال شیواں نوں پرکھدے تے ایہناں دی حیثیت تے سوال چکدے نیں۔ گلیلیو نے سولھویں صدی وچ جدوں ایہہ کہیا کہ سورج زمین دے دوالے نہیں گھمدا بلکے زمین سورج دے دوالے گھمدی اے تے قدامت پرستاں دی طرفوں ایس نظریے دی شدید مخالفت ہوئی۔ ایس تے بدعت دا الزام لایا گیا تے سزائے موت تیکر تجویز کر دتی گئی۔ 78سال دی عمر نوں اپڑ کے دنیا توں رخصت ہون والے گلیلیو نوں سائنس دا رہ چھڈن تے معافی لبھی۔ ماشااللہ اسیں سائنس توں مخالفت دا آغاز لائوڈ اسپیکر نال کیتا۔ فیر ٹی وی تے دیگر شیواں ایس دی زد وچ آندیاں رہیاں تے ہولی ہولی اپنی افادیت پاروں ساڈی ضرورت بندی گئیاں۔ مخالفت کرن والے سب توں زیادہ فائدہ مند ہو رہے نیں پر ہجے تیکر دوربین دا مسئلہ حل نہیں ہویا۔ زیادہ تر مسلم ملکاں وچ مہینے پہلے چن دی تریخ دے بارے وچ دس دتا جاندا اے پر اسیں ہجے تیکر اکھاں توں چن نوں ویکھ کے فیصلا کرنا اے تے پتا نہیں ایس تے اسیں کدوں تیکر قائم رہنے آں۔ تاں اج میں گل کرنا چاہ رہی سی ایس سازشی تھیوری دی جیہڑی ایس ویلے ساڈی فضائواں وچ گردش کر رہی اے تے اکثریت ایس نوں ٹھیک تسلیم کر چکی اے۔
مسلسل پیغامات دا سلسلا جاری اے کہ کورونا یہود و نصاریٰ دی سازش اے جس دے مطابق اوہ مسلماناں دیاں مسجداں نوں ویران کر کے ایہناں دے جذبہ ایمانی نوں کمزور کرنا چاہندے نیں۔ اک انج دے ویلے وچ جد کہ پوری دنیا ایس وبا دی لپیٹ وچ اے، رب نوں منن تے نہ منن والے سارے ایس دا شکار نیں، جدوں کلیسا، مندر تے گوردوارے وی بند نیں، اسیں ایہہ کنج سوچ سکنے آں کہ ایس دا نقصان صرف سانوں ہو رہیا اے تے ایہہ کسے انسان دی ودھائی گئی وبا اے۔ کوئی وی بندا کسے انج دی مصیبت داآغاز نہیں کر سکدا جس دا شکار اوہ آپ وی ہو سکدا ہوئے تے نہ ای کوئی ملک انج کر سکدا اے۔ ویکھوں کدوں تیکر سازشی تھیوری تے رجعت پسندی سائنس تے منطق دے سامنے کندھ بنی رہے گی تے نویں نسل کدوں حقیقت پسندی نال ہتھ ملا کے ذہنی غلامی نوں خداحافظ کہے گی۔