پاکستان دے مستقبل اُتے سرمایہ کاری کیتی جائے
لكهت:عتیق انور راجہ
ایہہ حکومت نیا پاکستان بنانا چاہندی اے تے ایہنوں چاہیدا اے کہ سب توں پہلے پرائمری ٹیچر تے فیر محلے دے پریچر ’’مولوی‘‘ دی اہمیت سمجھدے ہوئے ایہناں دونواں تھاواں اُتے اعلیٰ تربیت یافتہ لوکاں نوں پرکشش معاوضے اُتے بھرتی کرے۔ فیر ایہناں معلمین دے فرائض وچ ایہہ گل شامل کرے کہ اوہناں نے بالاں نوں رٹے نہیں لوانے بلکہ معاشرے دا چنگا شہری بنان لئی کم کرنا اے۔ قانون دا احترام کیوں ضروری ہوندا اے، بازار وچ کنج جانا چاہیدا اے، سڑک اُتے سفر کردے ویلے کیہ احتیاطی تدبیراں اختیار کرنیاں چاہیدیاں نیں ایہہ سب گلاں بچپن وچ سکھائی جان گیاں تے آن والے اٹھ دس ورھیاں وچ اسیں ہجوم توں قوم بنن چلے جان گے۔ پاکستان دا مستقبل جے نوجوان نیں تے اج ایہناں دی بہتر تربیت کرنا بوہت ضروری اے۔ سانوں ایہہ احساس ہن ہو جانا چاہیدا اے کہ ساڈے دشمن ملک دے نوجوان جدید تقاضیاں دے مطابق پڑھ کے کنج دنیا دے آئی ٹی اداریاں نوں کنٹرول کر رہے نیں تے اسیں اج وی کلرک، ڈاکٹر، انجینئر تے مزدور تیار کر رہے نیں۔ پاکستان دا مستقبل جے محفوظ بنانا اے تے بالاں نوں زیادہ نمبر حاصل کرن دی نس بھج توں کڈ کے سمجھن، سکھن ول لے جانا ہوئے گا۔ بچپن توں سن دے چلے آرہے نیں کہ نوجوان ملک دا مستقبل ہوندے نیں۔ ہن پتہ نہیں ساڈے وڈے ایہہ فقرہ کس گل نوں ذہن وچ رکھدے ہوئے کہندے رہے نیں کیوں جے جس قدر بحیثیت قوم اسیں اپنے بالاں دے مستقبل توں لاپروائی ورتی اے شاید ای کسے قوم نے ورتی ہوئے۔ ایس غفلت دی اک وجہ تے ایہہ اے کہ ساڈی اشرافیہ تے حکمران طبقے دے بال دوجے ملکاں وچ پل دے جوان ہوندے نیں اوتھے کاروبار کردے نیں تے ایہناں ای ملکاں دی شہریت حاصل کر کے اوتھے مقیم ہو جاندے نیں۔ قوم دے پتر صرف جلسیاں دی رونق ودھان لئی ای چاہے ہوندے رہے نیںتے ایہناں دی ایہہ لوڑ قوم دے پتراں دے ہر دور وچ اپنی جان و مال دی قربانی دے کے پوری کیتی اے۔کجھ دن پہلے میٹرک دے نتیجے دا اعلان ہویا اے تے ہن سوشل میڈیا اُتے زیادہ نمبر حاصل کرن والیاں نے خوب رونق لا رکھی اے۔ تعلیم دا مقصد علم دا حصول گھٹ تے نمبراں دی نس بھج زیادہ بن چکیا اے۔فیر اسیں ایہہ گلہ کرنے آں کہ ساڈا ملک سائنسدان کیوں پیدا نہیں کر رہیا ۔ آئی ٹی دے شعبے وچ اسیں دنیا توں کیوں پچھے آں۔ میں نے پہلے وی ایس معتبر اخبار دے ذریعے کئی وار ایہہ کہن دی کوشش کیتی اے کہ ساڈا نظام تعلیم اج وی کلرک پیدا کر رہیا اے۔ ساڈا نظام تعلیم ذہنی غلاماں دی اک فوج تیار کر رہیا اے جیہڑا چنگی نوکری، چنگی گڈی تے چنگے گھر نوں زندگی دا مقصد بنا کے میدان عمل وچ داخل ہوندے نیں تے فیر ساری عمر ایس خاب نوں حقیقت دا رنگ دین لئی کوشاں رہندے نیں۔ دوران تعلیم بالاں نوں ایہو دسیا جاندا اے کہ اعلیٰ تعلیم حاصل کردے ای پرکشش نوکری لبھ جائے گی تے فیر پوری حیاتی موج ای موج پر عملی طور اُتے انج ممکن نہیں طلبہ نوں تعلیم مکمل کرن توں بعد دو چار سال دفتراں دے دھکے کھان توں بعد پتہ چلدا اے کہ جو پڑھیا اے ایس دا عملی زندگی نال تعلق بوہت کمزور اے۔ ہن نوکری حاصل کرن لئی مزید کورسسز کرنے ہون گے۔ اج توں دو سو ورھے پہلے جدوں انگریز نے ایس خطے اُتے خطبہ کر لیا تے ایہنوں اپنے احکامات دی پیروی لئی کلرک تے اپنی ترجمانی لئی انگریزی زبان بولن والیاں دی لوڑ سی۔ ایسے نقطے نوں ساہمنے رکھدے ہوئےاوہناں نے ساڈی مقامی زباناں نوں ان پڑھاں دی زباناں دس کے اپنی زبان ’’انگریزی‘‘ پڑھانی شروع کیتی ۔ انگریزی پڑھ کے کجھ لوک ایہناں دفتراں وچ نوکری حاصل کر کے بابو اکھوان لگے تے ایہناں نوں چار پیسے ملدے ویکھ کے باقیاں نے وی انگریزی زبان نوں ای ترقی دا ذریعہ سمجھ لیا۔ انگریز چلا گیا پر اپنی انگریزی ایتھے چھڈ گیا۔ اونج تے اردو قومی زبان اے پر ساڈے دفتراں وچ خط کتابت انگریزی زبان وچ ہوندی اے۔ عوام دی کیہ گل ساڈے ایم اے پاس لوک وی انگریزی زبان نوں نہیں لکھ پڑھ سکدے پر کیوں جے ایہہ ساڈے سابق آقاواں ولوں برتری دا احساس دلواندی اے ایس لئی صاحب لوک ایس زبان نوں الیٹ دی زبان قرار دیندے نیں تے ایہنوں جاری و ساری رکھے ہوئے نیں۔
صاحبو! کوئی حکومت اینی نوکریاں پیدا نہیں کر سکدی جنہی تعداد وچ ایس ملک دے نوجوان ڈگریاں حاصل کر رہے نیں فیر کیوں ضروری اے کہ ہر گھر توں سب بچے ایم اے، ایم ایس سی یا ایم فل کرن دی کوشش کرن۔ جدوں پتہ اے کہ سب نوں نوکری نہیں مل رہی تے کیوں میٹرک یا ایف دے بعد حکومتاں اک مخصوص تعداد وچ نوجواناں نوں اپنا نکا موٹا کاروبار کرن ول متوجہ نہیں کر رہی۔
