فرقہ واردیت دے خاتمے دا ضامن پیغام پاکستان!

لكهت:شاہد ندیم

دین اسلام وچ اک جائز حد دے اندر اختلاف رائے دی افادیت و ضرورت نوں تسلیم کیتا گیا اے تے ساڈے نبی ﷺ نے ایس علمی اختلاف نوں رحمت قرار دتا اے پر ایہہ اختلاف علمی مسائل وچ جائز حدود دے اندر نیک نیتی نال دینی امور دی وضاحت لئی ای کیتا جانا چاہیدا اے۔ ایس اختلاف رائے نے ملتِ اسلامیہ دی ترقی و عروج تے اسلامی علوم دی ترویج و اشاعت وچ جیہڑا کردار ادا کیتا اوہ ساڈی علمی و ملی تاریخ دا اک حصہ اے تے اسیں ایس اُتے بجا طور اُتے فخر کر سکنے آں، پر جس اختلاف و نزاع دے پہلو نے ملتِ اسلامیہ نوں مختلف متحارب گروپاں وچ ونڈیا، ہمیشہ توں مذموم رہیا تے اج وی مذموم اے۔ امت مسلمہ نوں متحارب فرقیاں وچ ونڈن والے اختلافات وچ سارے تنازعات دا پس منظر علمی تے دینی نہیں، بلکہ سیاسی رہیا اے۔ جے ایس نوعیت دے اختلاف تے تنازعے دے اسباب و محرکات نوں بے نقاب کرن دی کوشش کیتی جائے تے ایس دے پس منظر وچ دشمناں دی سازش صاف طور اُتے جھلکدی ہوئی وکھائی دیندی اے۔
ایس وچ شک نہیں کہ مسلم دشمن قوتاں نے فرقہ بندیاں دی بنیاد وچ کارفرما تنازعات توں فائدہ چکیا اے تے جدوں وی ملتِ اسلامیہ کسے مشترکہ مقصد دی طرفوں ودھدی ہوئی نظر آئی اے دشمن دے خفیہ ہتھ نے مسلماناں وچ فرقہ وارانہ جھگڑیاں دی چنگاری نوں ہوا دتی اے۔ ایس حوالے نال پاکستان وچ وی فرقہ واریت دے ذریعے بدامنی ودھان دی غیر ملکی سازشاں کار فرما رہیاں نیں۔ ایس پس منظر وچ وفاقی وزیر مذہبی امور پیر نور الحق قادری دی زیر صدارت اسلامی نظریاتی کونسل دے زیر اہتمام سارے دینی مکاتب فکر دے نمائندہ علماء کرام دے اجلاس وچ مسلکی ہم آہنگی دے فروغ لئی 20 نکاتی متفقہ ضابطہ اخلاق دی منظوری اک انتہائی اہم تے بروقت اقدام اے ایس دی لوڑ بڑی شدت نال محسوس کیتی جا رہی سی، کیوں جے دشمن طاقتاں مسلسل ملکی سلامتی دے در پے نیں تے ایس دے امن و امان نوں تہ و بالا کرن لئی علاقائی، نسلی تے فرقہ وارانہ بنیاداں اُتے فساد کران دی مذموم سازشاں وچ مصروف نیں جنہاں دے تدارک لئی انج دا ضابطہ اخلاق ناگزیر سی۔
ایس علما کرام دے دستخط شدہ ضابطہ اخلاق وچ کہیا گیا اے کہ کسے وی مکتبہ فکر نوں نفرت انگیزی، اہانت اُتے مبنی جملیاں تے دوجیاں دے خلاف بے بنیاد الزامات تے تقریراں دی اجازت نہیں ہوئے گی۔ کوئی بندا انبیائے کرام، خلفائے راشدین تے صحابہ کرام دی توہین نہیں کر سکے گا۔ ضابطہ اخلاق وچ ایس گل نوں وی شامل کیتا گیا اے کہ حکومت، مسلح فوجاں تے قانون نافذ کرن والے اداریاں نال جڑے بندیاں نوں کافر قرار دینا کسے دا حق نہیں، ریاست دے خلاف لسانی، علاقائی، مذہبی تے فرقہ وارانہ تعصبات دی تحریکاں دا حصہ بنن توں گریز کیتا جائے گا۔ وزیر مذہبی امور دی زیر صدارت ہون والے اجلاس وچ سارے مکاتب فکر دے نمائندہ علمائے کرام نے ضابطہ اخلاق اُتے کاربند رہن دا تحریری وعدہ کیتا اے تاں علمائے کرام، مدارس دی انتظامیہ، دانشوراں تے سول سوسائٹی نوں انتہا پسندی تے دشمن عناصر دے خلاف متحد رہنا ہوئے گا جیہڑا ملک وچ بدامنی ودھان لئی فرقہ وارانہ مذہبی تشدد نوں ودھاوا دین دا باعث بن دے نیں۔ ایس ویلے دشمن فرقہ واریت دے ذریعے قومی اتحاد مٹان دے در پے اے، ایس سازش نوں ناکام بنان لئی ضروری اے کہ حکومت دی گائیڈ لائنز دی پیروی کردے ہوئے سارے مکاتب فکر دے علماء کرام اتحاد بین المسالک نوں فروغ دیندے ہوئے عوام الناس نوں موثر طریقے نال آگاہ رکھیا جائے کہ ساڈے باہمی نفاق نال ملک مخالف قوتاں اپنی مذموم کاروائیاں وچ کامیاب ہو سکدے نیں، ایس لئی مسلکی وابستگی توں بالا تر ہو کے صرف اک مسلمان تے امام عالی مقام دے پیروکار دی حیثیت نال انج دے عناصر دے مذموم عزائم نوں ناکام بنان۔سانوں باہمی اختلافات فراموش کر کے اسلام دشمن تے وطن دشمن طاقتاں دے خلاف متحد ہو جائیے تے اسلام تے پاکستان دے خلاف ہون والے منفی پراپیگنڈے دا بھرپور تے منہ توڑ جوان دیئے سانوں ایس واضح حقیقت نوں سمجھن دی لوڑ اے کہ اسلام دی بقا تے ایس دا عروج فرقہ پرستی تے گروہی اختلافات وچ نہیں، بلکہ باہمی اتحاد و یکجہتی وچ پنہاں اے۔ ایہہ بڑی حوصلہ افزا گل اے کہ سب مسلکاں دے سینکڑے مذہبی اسکالرز تے علمائے کرام نے متفقہ طور اُتے فرقہ واریت دے زیر اثر اقدامات دی روک تھام لئی ضابطہ اخلاق واضح کیتا اے، اسلامی تعلیمات دے مطابق ہن ہر مسلمان ایس گل دا پابند اے کہ فرقہ واریت، مذہبی تے مسلکی تعصب دی نفی کرے۔
ایہہ امر خوش آئند اے کہ سارے مسلکاں تے مکتبہ ہائے فکر دے نمائندہ علمائے کرام نے سماجی پہلو دے نال معاملے دی سکیورٹی ضروریات نوں جتھے سمجھن دی کوشش کیتی اے، اوتھے موجودہ صورتحال دی اصلاح لئی اپنا کردار ادا کرن دا وی یقین دلوایا اے۔ ایس ویلے دہشت گردی، معاشی بدحالی، بدعنوانی تے سیاسی عدم استحکام نال دو چار ریاست لئی فرقہ وارانہ نفرت اک وڈا خطرہ ہو سکدی اے۔
ایس فرقہ واریت دے خاتمے دا ضامن پیغام پاکستان اے جیہڑا کہ پیغام اسلام اے تاں ملک دشمن عناصر کھلے عام پیغام دے رہے نیں کہ فرقہ وارانہ فساداں دے ذریعے پاکستان نوں عدم استحکام دا شکار کیتا جائے گا۔ ایس ساری صورت حال دا افسوسناک پہلو ایہہ اے کہ کجھ نادان تے ناسمجھ بندے ایہناں سازشاں دا آلہ کار بن جاندے نیں۔ ایس اُتے مستزاد سیاسی جماعتاں دا غیر ذمے دارانہ رویہ ناقابل فہم اے۔ ایہہ خطے دی وگڑدی صورت حال نوں جان دے ہوئے وی اپنی وراثتی سیاست نوں بچان لئی کدی سکیورٹی اداریاں، حکومتی شخصیات اُتے فتوے نما سنگین الزامات عائد کر رہیاں نیں۔ ریاست پاکستان اکوں ویلے کئی اندرونی تے بیرونی محاذاں اُتے سرگرم عمل اے۔ علمائے کرام تے اہل دانش طبقات نے ہمیشہ ریاستی مفادات دے تحفظ لئی اپنا کردار مثبت انداز وچ انجام دتا اے تاں ریاست تے علمائے کرام نوں انج دے موقعے زیادہ توں زیادہ پیدا کرن دی لوڑ اے جتھے سارے مسلکاں دے علماء نہ صرف اک ساتھ بہہ سکن، بلکہ اسلام مخالف قوتاں دا مقابلہ کرن دی مشترکہ حکمت عملی وی وضع کر سکن دشمن دے ہتھکنڈیاں دا مقصد سانوں ونڈنا اے جے اسیں متحد رہے تے دشمن آپ ای ناکام ہو جائے گا۔