‘‘عبدالحفیظ شیخ تے صدارتی آرڈیننس’’

عبدالحفیظ شیخ نوں سینٹ دے ایوان وچ لیانا کپتان دی خواہش تے مجبوری اے

تحریر: محمداکرم عامر سرگودھا

حکومت تے اپوزیشن دے وچکار جاری محاذ آرائی نال ملک وچ جنگ ورگا سیاسی محول پیدا ہو گیا اے حزب اقتدار تے حزب اختلاف اک دوجے نوں زیرکرن لئی ہر حربہ استعمال کر رہے نیں، پی ڈی ایم دے امیدوار نے وفاق دی سینٹ نشست اُتے عبدالحفیظ شیخ نوں خلاف توقع شکست دے کے حکومت نوں انج گا گھائو لایا کہ کپتان دی حکومت نوں خطرہ محسوس ہون لگیا تے اپوزیشن نے نال بڑھک مار دتی کہ اوہ کسے وی ویلے وزیراعظم، وزیراعلیٰ پنجاب ، سپیکر و ڈپٹی سپیکر قومی اسمبلی دے خلاف کسے وی ویلے عدم اعتماد دی تحاریک لیا کے ایہناں نوں گھر بھجوا سکدے نیں۔ کپتان نے اٹ دا جواب اپوزیشن نوں پتھر نال دتا تے 48 گھنٹے بعد ای قومی اسمبلی دے ایوان توں اعتماد دا ووٹ لے کے ایوان وچ اپنی برتری ثابت کر کے سردست اپوزیشن ولوں عدم اعتماد دی تحاریک لیان دے دعویاں اُتے پانی پھیر دتا ۔ سینٹ الیکشن وچ کپتان نے صادق سنجرانی نوں چیئر مین سینٹ تے مرزا آفریدی نوں ڈپٹی چیئر مین منتخب کرا کے اپوزیشن نوں انج دا گھائو لایا کہ اپوزیشن زخم چٹ رہی اے تے دھاندلی دا شور مچا کے چیئر مین سینٹ دے انتخاب نوں عدالت وچ چیلنج کرن جا رہی اے۔
دوجے پاسے کپتان نوں عبدالحفیظ شیخ دی شکست بھُل نہیں رہی کیوں جے اوہ موصوف نوں ہر صورت وچ سینٹ دے ایوان وچ ویکھنا چاہندے سن پر کپتان دا ایہہ خواب اپوزیشن نے پی ٹی آئی دے ووٹ چرا کے چکنا چور کر دتا سی، فیر حکومت نوں چیئر مین تے ڈپٹی چیئر مین سینٹ دے الیکشن وچ کامیابی لئی سارے وسائل جھونکنا پئے تے وزیرراعظم نے فاٹا توں مرزا آفریدی نوں ڈپٹی چیئر مین سینٹ نامزد کیتا جد کہ فاٹا وچ تعمیر وترقی لئی 100 ارب دے سالانہ بجٹ دا اعلان کپتان پہلے ای کر چکے سن تے کپتان نے فاٹا دا انضمام وی کرایا سی جیہڑا اسان کم نہیں سی۔ کپتان نے بلوچستان توں دوجی وار صادق سنجرانی نوں چیئر مین سینٹ ایس لئی بنوایا کہ حکومت نوں قانون سازی وچ مشکل آ رہی سی تے کپتان جیہڑی تبدیلی لئی کجھ کرنا چاہندے سن، ایہناں نوں ایس وچ مشکل پیش آ رہی سی، جس دی وجہ نال کپتان نے چیئر مین سینٹ الیکشن وچ خوب پتہ کھیڈیا تے فاٹا توں خلاف توقع ڈپٹی چیئر مین مرزا آفریدی نوں نامزد کر کے ایس دے نتائج وی حاصل کیتے پر کپتان تے ایس دے ا تحادی عبدالحفیظ شیخ دی شکست دا غم ہجے وی نہیں بھُل پا رہے۔ سیاسی ذرائع کہندے نیں کہ حکومت جون 2021 توں پہلے عبدالحفیظ شیخ نوں سینٹ دے ایوان وچ ممبر ویکھنا چاہندی اے کیوں جے سینٹ الیکشن جت کے حکومت نوں اپوزیشن ول درپیش مشکلات وچ کمی تے حکومت دا اعتماد بحال ہویا اے۔ جس اُتے کپتان نے عبدالحفیظ شیخ نوں فیر توں سینیٹر بنان دا فیصلہ کر لیا اے۔ ایس حوالے نال صدر مملکت پاکستان عارف علوی اک تے صدارتی آرڈیننس جاری کرن گے۔ جس دا آئینی ماہرین ڈرافٹ تیار کر رہینیں۔ ایس آرڈیننس دے تحت مسلم لیگ ن دے سابق وزیر خزانہ اسحاق ڈار نوں ٹیکنوکریٹ پنجاب دی نشست توں ڈی سیٹ کر کے ایہہ نشست خالی کرائی جائے گی چونکہ اسحاق ڈار موصوف بیرون ملک رہ کے سینیٹر منتخب ہوئے سن تے 2018 توں ہن تیکر اوہناں نے بطور سینٹر ایوان توں حلف نہیں چکیا، ایس صدارتی آرڈیننس دے تحت جنہاں ممبران سینٹ یا اسمبلی نے دو سال توں حلف نہیں چکیا نوں ڈی سیٹ کرایا جائے گا، سینٹ دی نشست توں اسحاق ڈار توں علاوہ سابقہ دور دے وزیر داخلہ چوہدری نثار احمد جیہڑا کہ 2018ء وچ قومی اسمبلی دا الیکشن ہر گئے تے ایم پی اے بن گئے سن وی ڈی سیٹ ہو جان گے، کیوں جے چوہدری نثار احمد نے 2018ء توں ہن تیکر ایم پی اے دا ایوان توں حلف نہیں چکیا، تے موصوف ایس نشست اُتے حلف چکن دے خواہان وی نظر نہیں آ رہے۔ ایس طرح حکومت خاص طور تے کپتان عبدالحفیظ شیخ نوں پنجاب دی سینٹ نشست توں سینٹ دا ممبر بنوان جا رہے نیں تاں جے عبدالحفیظ شیخ نوں بطور وزیر خزانہ عہدے اُتے براجمان رکھیا جا سکے۔ اپوزیشن ایس دی روک تھام لئی کیہ اقدام چکدی اے ایہہ کہنا قبل از وقت اے تاںاسیں اپوزیشن نے سردست 26 مارچ نوں دھرنا دین دا اعلان کر رکھیا سی، حکومت نے اپوزیشن نوں چیء رمین سینٹ دے الیکشن وچ شکست دے کے قانونی جنگ لڑن ول دھکیل دتا اے، ہن اپوزیشن دا دھیان دو ول بٹ چکیا اے تے ایہنوں اک ٹائم وچ حکومت دے نال قانونی جنگ لڑن دے نال 26 مارچ نوں اسلام آباد لانگ مارچ دی وی تیار کرنا اے۔دوجے پاسے ہن فیر پی ڈی ایم دے سربراہ مولانا فضل الرحمان نے نواں اعلان کر دتا اے۔ کہ اپوزیشن دے ارکان قومی صوبائی اسمبلیز دے استعفیاں دے بغیر لانگ مارچ دا کوئی فائدہ نہیں، ایس نوعیت دا اعلان پی ڈی ایم سربراہ مولانا فضل الرحمان نے حکومت مخالف تحریک شروع کرن دے کجھ عرصہ بعد کیتا سی تے پیپلز پارٹی دی مخالفت دے بعد مسلم لیگ ن دی قیادت نے وی ارکان اسمبلی دے مشترکہ استعفیاں اُتے یوٹرن لے لیا سی تے ضمنی سینٹ الیکشن کمیشن دے زیر سایہ لڑیا جنہوں اپوزیشن جانبدار قرار دیندی آ رہی اے، اپوزیشن جماعتاں خاص طورتے مسلم لیگ ن تے پیپلز پارٹی دی قیادت مولانا دے حالیہ فیصلے متفق نظر نہیں آ رہی پیپلز پارٹی دے بلاول بھٹو نے تے واضع کہہ دتا اے کہ ایس نے والدہ (بے نظیر بھٹو) توں سکھیا اے کہ بائیکاٹ تے استعفیاں دی بجائے سسٹم وچ رہ کے مقابلہ کرنا چاہیدا اے تے انج پی ڈی ایم سربراہ نوں ایس اعلان اُتے وی یوٹرن لینا پئے گا۔ انج اپوزیشن دے لانگ مارچ دی چمک ماند پیندی وکھائی دے رہی اے۔ ڈپٹی چیئر مین سینٹ اُتے مولانا عبدالغفور حیدری نوں 10 ووٹ گھٹ ملنا ایس گل دی وی دلیل اے کہ اپوزیشن (پی ڈی ایم) وچ اندرون خانہ اختلافات نیں، اپوزیشن اتحاد وچ شامل اک وڈی جماعت مولانا فضل الرحمان توں ماضی دا بدلہ چکانا چاہندی اے چونکہ مولانا فضل الرحمان نے ملک وچ عورت دی حکمرانی نوں غیر مناسب قرار دتا سی۔
گل کتھوں کتھے نکل گئی گل ہو رہی سی عبدالحفیظ شیخ دے سینٹ الیکشن ہرن نال کپتان تے حکومت نوں لگن والے جھٹکے دی تے ملک وچ اک ہور صدارتی آرڈیننس جاری ہون نوں اے جس دے تحت پنجاب توں مسلم لیگ ن دے سینیٹر اسحاق ڈار دی چھٹی کرا کے ایس نشست اُتے عبدالحفیظ شیخ نوں ایوان وچ لیان لئی لائحہ عمل ترتیب دتا جا رہیا اے کیوں جے کپتان عبدالحفیظ شیخ نوں ہر صورت سینٹ دے ایوان وچ ویکھنا چاہندے نیں۔جس لئی اوہ کجھ وی کر سکدے نیں۔ سو ایسے تناظر وچ آئینی ماہرین اک ہور صدارتی آرڈیننس دے ڈرافٹ نوں حتمی شکل دے رہے نیں جس دے نتیجے وچ سینٹ توں اسحاق ڈار تے صوبائی اسمبلی توںچوہدری نثار دی نشست خالی ہو جائے گی چونکہ پنجاب وچ پی ٹی آئی تے ایس دے اتحادیاں نوں برتری حاصل اے ایس لئی ایہہ قدم چکیا جا رہیا اے تاں جے عبدالحفیظ شیخ نوں سینٹ دے ایوان وچ لیایا جاسکے جیہڑا کپتان دی خواہش تے مجبوری اے۔