سانحہ پی آئی سی کیس وچ گرفتار 25وکیلاں دی درخواست ضمانت منظور

لہور: انسداد دہشت گردی دی خصوصی عدالت نے سانحہ پی آئی سی کیس وچ گرفتار 25وکیلاں دی درخواست ضمانت منظور کردیاں اوہناں نوں اک اک لکھ روپے مچلکے پیش کرن دا حکم دے دتا اے۔ انسداد دہشت گردی دی خصوصی عدالت وچ سانحہ پی آئی سی وچ ملوث گرفتار وکیلاں دے کیس تے سماعت ہوئی۔ تفتیشی افسر انسپکٹر عبید اللہ نے کیس دا ریکارڈ عدالت وچ پیش کیتا۔

سرکاری وکیلاں نے عدالت نوں دسیا 8وکیلاں دی شناخت پریڈ وچ تصدیق نہیں ہو سکی سی پر 25وکیلاں دی شناخت پریڈ وچ تصدیق ہو چکی اے جد کہ فوٹو گرامیٹک ٹیسٹ وی مکمل کر لئے نیں۔ سرکاری وکیل نے عدالت وچ استدعا کیتی عدالت ملزماں دی درخواست ضمانت خارج کرن دا حکم دیوے۔ انسداد دہشت گردی دی خصوصی عدالت دے جج ارشد حسین بھٹہ نے کیس تے سنوائی کیتی۔

ملزماں ولوں سینئر وکیل مقصود بٹر، رانا منظور، فرہاد علی شاہ تے ملک عدیل احسان نے درخواست ضمانت وچ دلائل دتے کہ25ملزمان وکلاء 12دن توں پلس حراست وچ موجود نیں۔ ملزماں دی درخواست ضمانت منظور کرن دا حکم دتا جاوے۔ ساڈے وکلاء بھراواں دا میڈیکل وی نہیں کرایا گیا۔