آکھن لوک سیانے

احسان باجوہ

پرائے جَس نال کیہ بھائ
معنے: جَس: خوبی بیان کرن۔
ویروا: مت دِتی گئی اے پئی گُن جاں اؤگن بندے دے اپنے ای اوسدے کم آؤندے نیں۔ جے کوئی کِسے دا جَس گا رہیا ہووے تاں اگلے نُوں اوس دا کِیہ فائدہ ہو سکدا اے۔کِسے دی تعریف کِسے ہور دا کیہ سوار سکدی اے۔
پرائے دا گؤن ‘ کدوُ دا لؤن
معنے: گؤن: گانا٭ لؤن: سالن۔
ویروا: مت دِتی گئی اے پئی بندہ آپنی ہر شَے نُوں ای چنگا سمجھدا اے اتے تھاں تھاں وڈھیاندا اے پر کِسے دی چنگی شَے نُوں وی کُجھ نہیں جان دا۔اتے اوس نُوں ویکھ کے اوسدی بِیڑی بہ جاندی اے اتے بولن جوگا وی نہیں رہندا۔
پرائے کانجے ویکھ کے اپنے پیالے نہ بھن
معنے: کانجے: پِتل جاں کَینہ دے بھانڈے۔
ویروا: مت دِتی گئی اے بھاگ بندے نُوں اپنے گھر نال ای ہوندا اے اتے کِسے دُوجے دی چنگی چِیز ویکھ کے اپنی بھَیڑی شَے نُوں گھروں باہر نہیں سُٹ دینا چاہیدا۔شے تاں اوڑک اپنی ای کم دیندی اے۔
پردہ پانا جنیاں دا کم اے
معنے: جنیاں: جواناں۔
ویروا: مت دِتی گئی اے پئی ہر کِسے نُوں کِسے دے عَیب تے پردہ پانا چاہیدا اے۔ اتے ایہ ای ربی حُکم وی اے اتے اوہ ذات وی سبھ توں وڈھی ستاراُلعیوُب اے۔ ایہ کم بس بہادر لوک ای کر سکدے نیں۔
پِڑ بن دا اے تاں بھریاں مُک جاندا اے
معنے: پِڑ:مَیدان٭بھریاں: رؤنق ہویاں۔
ویروا: مت دِتی گئی اے پئی جدوں جا کے کِسے پہلوانی جاں ہور ایسراں دے کم لئی مَیدان بن جاندا اے تاں اوتھے اینے لوک اکٹھے ہو جاندے نیں پئی اوس وِچ تھاں نہیں رہ جاندی۔پر اوڑک سارے گھرو گھریٹُ جاندے نیں اتے پِڑ خالی رہ جاندا اے۔ ٭٭