کہانی پراگا گڈی

سہیل ثروت

اوہنے کپ وچ چاہ پائی تے ہربرٹ نوں آکھیا اوہ اپنی سہیلی نوں چاہ پھڑائے۔ ‘ مس بیون نوں پچھ ، اوہ مکھن والی بریڈ یا بسکٹ لووے دی، سیمویل سوہنیا ۔
‘ دوویں لے،’ سیمویل نے دوویں تھالیاں اگے کردیاں ہویاں آکھیا۔ ‘ مینوں تے چنگا لگدا اے ، لوکی رج کے کھان،’
بییٹی نے ڈردیاں ڈردیاں مکھن والی بریڈ دا ٹوٹا تے اک بسکٹ اپنی تھالی تے اڑا لیا تے مسز سنبری بڑے پیار نال رت دے بارے گل کردی رہی۔ اوہنوں بییٹی نے اوکھیاں ہوندیاں ویکھ ویکھ کے تسلی ہوندی رہی۔ فیر اوہنے کیک کٹیا تے دھکے نال بییٹی نوں وڈا سارا ٹکڑا دتا، بییٹی نے اک برکی لئی تے جدوں اپنی تھالی وچ رکھن لگی تے اوہ تھلے پنجے ڈگ پیا۔ ‘ اوہ ہو! معاف کرنا’ اوہ کڑی بولی، جدوں اوہنے تھلیوں چکیا ۔ ‘ کوئی گل نہیں ، میں تینوں اک ہور ٹکڑا کٹ دینی آں ۔’ مسز سنبری نے آکھیا۔
‘ اوہ تکلیف ناں کرو، کوئی مسئلہ نہیں۔ تے فرش وی صاف اے،’ مسز سنبری بڑی چبھویں مسکراہٹ نال بولی ، ‘انج ای گل اے ، پر میں سوچ وی نہیں سکدی کہ تینوں بھنجے ڈگا کیک کھان دیاں ، ہربرٹ ایدھر کر، تے میں مس بیون نوں ہور دینی آں۔’
نہیں ، مسز سنبری ، میرا دل نہیں ، سچی، میں ہور نہیں لینا۔
‘ مینوں افسوس اے کہ تینوں میرا کیک پسند نہیں آیا’ میں تے خاص طور تے تیرے لئی بنایا سی۔’ اوہنے ماسا کو سارا لے کے چکھیا۔ ‘ مینوں تے ایہدا سواد ول ای لگا اے۔’
ایہ گل نہیں ، مسز سنبری، ایہ بڑا سوہنا کیک اے، بس ، مینوں بھکھ نہیں لگی۔
اوہنے ہور چاہ وی ناں لئی تے مسز سنبری نے ویکھیا کہ اوہ کپ توں جان چھڈا کے خوش ہوئی سی۔’ مینوں لگدا اے ، ایہ رسوئی وچ بہہ کے ہی روٹی کھاندے ہونے نیں،’ اوہنے اپنے آپ نال گل کیتی۔ فیر ہربرٹ نے سگریٹ لا لیا۔
ہرب ، چل آ اک سوٹا لائیے،’ بییٹی نے آکھیا ۔ میری تے سگرٹ پین لئی جان پئی نکلدی اے۔
مسز سنبری بی بییاں دا سگرٹ پینا چنگا نہیں سی سمجھدی، پر اوہنے صرف اپنے بروھٹے چاڑھے۔
اسیں ایہنوں ہربرٹ آکھنا ہی چنگا سمجھنے آں، مس بیون۔’ اوہنے آکھیا۔
بییٹی ایڈی وی پاگل نہیں سی کہ اوہنوں ایہ پتا ناں لگدا کہ مسز سنبری اوہنوں تنگ کرن دی کوشش پئی کردی سی، ہن اوہنوں اوہدے ول مڑ کے ویکھن دا موقعا لبھا سی۔ ‘ مینوں پتا اے،’ اوہنے آکھیا ۔ ‘ جدوں ایہنے مینوں اپنا ناں ہربرٹ دسیا سی تے میں تے ہس ہس کے پاگل ہو گئی ساں۔ سوچو ذرا ایہنوں کوئی واز مارے ، ہربرٹ! تے اک چیک نکل جائے، میں بلایا سی۔
مینوں افسوس اے کہ تینوں میرے پتر دا بیپٹزم دے ٹیم دتا گیا ناں چنگا نہیں لگا، میرا خیال اے کہ ایہ ودھیا ناں ایں۔ پر ، میرا خیال اے کہ ایہ سبھ ھ کجھ بندے دی حیثیت تے منحصر اے۔
ہربرٹ لڑائی مکان / مدد لئی اگے آیا۔
دفتر وچ مینوں لوکی برٹی بلاندے نے، ماں جی ۔
فیر میں تے ایہ ای آکھاں دی کہ اوہ سارے بڑے عام جئے لوک نیں۔
مسز سنبری بڑی معتبری نال چپ کر کے بہہ گئی، تے گل بات نوں اوہسے طرحاں مسٹر سنبری تے ہربرٹ نے چالو رکھیا۔ مسز سنبری ایہ ویکھ کے بڑی راضی سی کہ بییٹی غصہ پئی کردی سی۔ اوہنے ایہ وی غور کیتا کہ اوہ کڑی جانا چاہندی اے، پر اوہنوں سمجھ نہیں سی پئی اوہدی کی اوہ کیہ کرے۔ اوہنے پکا ارداہ کیتا سی کہ اوہ اگانہہ ہوکے اوہدی مدد نہیں کرے دی۔ اخیری ہربرٹ نے معاملہ سانبھ لیا۔ (جاری)