نعت شریف

اقبال راحت

آپۖ آئے تے آئی اے بہار یارسول اللہۖ
کھڑ پئے ہر طرف گلزار یارسول اللہۖ
سراں تے سن غماں دیاں دھپاں
آپۖ دی شفقت گئی اے ٹھار یارسول اللہۖ
بڑا ای ڈر بڑا فکر سی محشر دا
بن گئے آپۖ میرے غم خوار یارسول اللہۖ
چمکیا تارا اے میرے مقدر دا
سی چراں دا ای انتظار یارسول اللہۖ
وگ پئیاں ٹھنڈیاں ہواواں ہر پاسے
ونڈیا آپۖ نے جدوں پیار یارسول اللہۖ
آپۖ دے واسطے ای دو جہان بنے
دو جہاناں دے آپ سردار یارسول اللہۖ
میرا مان میری جان تسی او آقا
میرا پیار تسی او دلدار یارسول اللہۖ
بڑی اے حسرت کدے خواب وچ آئو
ملے راحت نوں وی دیدار یارسول اللہۖ