اداکار نسیم وکی،آغاماجد اُتے فائرنگ:مقدمہ درج

فیصل آباد(پنجابی میڈیا گروپ)معروف اداکاراں نسیم وکی تے آغاماجد اُتے فیصل آباد وچ فائرنگ دا مقدمہ درج کر لیا گیا۔ٹی وی تے سٹیج دے نامور مزاحیہ اداکار نسیم وکی تے آغا ماجد جمعرات نوں سبینہ تھیٹروچ پرفارمنس توں بعد لہور جان لئی راجباہ روڈ توں لنگ رہے سن کہ نامعلوم بندیاں نے اوہناں دی کار اُتے فائرنگ کر دتی،واقعہ وچ دوناں اداکار معجزانہ طوراُتے محفوظ رہے۔نسیم وکی دا کہنا سی کہ فیصل آباد وچ تھیٹر محفوظ نہیں ایس تاثر نوں ختم کرن لئی پرفارم کرن آیا فائرنگ کرن والے لوگ کون نیں میں نہیں جاندا۔سی پی او فیصل آباد مبشر میکن نے اداکار نسیم وکی نال ملاقات کیتی تے اوہناں نوں چھیتی انصاف دا یقین دلایا۔سی پی او ہوراں آکھیا کہ فیصل آباد دے تھیٹر نوں محفوظ بنایا جائے گا۔دُوجے پاسے واقعہ دا مقدمہ تھانہ ریل بازار وچ درج کر کے سی سی ٹی وی فوٹیجز دی مدد نال ملزماں نوں گرفتار کرن دی کوشش کیتی جارہی اے۔فیصل آباد وچ مرد وخواتین سٹیج اداکاراں دے نال تشدد تے فائرنگ دے واقعات معمول بن دے جا رہے نیں جس دی وجہ اینج دے واقعات اُتے ملزماں دے خلاف کارروائی دا نہ ہونا اے۔