اسلاموفوبیا،اَت گردی تے انتہا پسندی وچ صرف ناں دا فرق اے ‘چوہدری سرور

لہور(پنجابی میڈیا گروپ) گورنر پنجاب چوہدری محمد سرور ہوراں آکھیا کہ کوئی شک نہیں کہ اسلاموفوبیا، اَت گردی تے انتہا پسندی وچ صرف ناں دا ہی فرق اے۔ سماجی رابطے دی ویب سائٹ ٹویٹر اُتے اپنی ٹویٹ وچ چوہدری محمد سرور ہوراں آکھیا کہ اسلامو فوبیا دے خلاف وزیر اعظم عمران خان دی آواز پوری دنیا وچ اپڑ رہی اے تے دنیا اوہناں دی ہم آواز بن رہی اے، دنیا نوں سمجھ لینا چاہیدا اے کہ امن دا رستہ وی اسلاموفوبیا نوں ختم نال ہی نکلدا اے۔چوہدری محمد سرور ہوراں ہو آکھیا کہ جس طرح دنیا اَت گردی دے خلاف متحد اے اینج ای اسلامو فوبیا دے خلاف وی اک ہونا ہوئے گا، کوئی شک نہیں کہ اسلاموفوبیا، اَت گردی تے انتہا پسندی وچ صرف ناں دا ہی فرق اے، مغربی دنیا وچ اسلام دے خلاف نفرت پھیلان والے وی انتہا پسند نیں، دنیا وچ پائیدار امن لئی مختلف مذہباں نوں اک دُوجے دے مذہبی جذبیاں دا احترام کرنا ہوئے گا۔