پاکستان دنیا دا واحد ملک اے جیتھے چور دُوجیاں دا احتساب کر رہے نیں: شاہد خاقان

اسلام آباد(پنجابی میڈیا گروپ) شاہد خاقان عباسی ہوراں آکھیا کہ پاکستان دنیا دا واحد ملک اے جیتھے چور دُوجیاں دا احتساب کر رہے نیں، فرار ہون والے مشیراں نوں حساب دینا ہوئے گا، ایتھے کرسیاں چھڈن دا نہیں اوہناں نال چِمڑے رہن دا رواج اے، نواز شریف علاج مکمل ہندیاں ای واپس آجان گے۔سابق وزیراعظم و رہنما مسلم لیگ نون شاہد خاقان عباسی نے اسلام آباد وچ میڈیا نال گل بات کردیاں ہویاں آکھیا کہ چیئرمین نیب نوں صرف اپوزیشن نظر آندی اے، کیا چیئرمین نیب نال کسی دن ایہ سوال نہیں ہوئے گا، وزیراعظم دے مشیر فرار ہوگئے، فرار ہون والے مشیر اپنے اثاثیاں دا جواب دیون، احتساب وچ ایہ نہیں ہندا کہ جعلی کیس بنائے جاون، نیب دا تماشہ لگیا رہے گا، لانگ مارچ عوام دے نال اظہار یکجہتی ہندا اے۔اُدھر اپوزیشن لیڈر پنجاب اسمبلی حمزہ شہباز نے لہور وچ میڈیا نال گل بات کردیاں ہویاں آکھیا کہ آٹے دا بحران ہوئے یا چینی دا ،اج کسان کھاد دی عدم دستیابی اُتے دہائیاں دے رہیا اے، نوا پاکستان بنان والیاں نے ملک نال کھیڈ کھیڈیا، ن لیگ دے خلاف کیس وچ4 ورھے توں اک پائی کرپشن ثابت نہیں ہوسکی، الیکشن کمیشن دی اسکروٹنی کمیٹی نے عمران خان نوں چور ڈکلیئر کر دتا۔لیگی رہنما نے آکھیا کہ کیا کدی وزیراں دے منہ توں سنیا کہ مہنگائی بوہت ودھ ہوگئی، خیبرپختونخوا وچ پادری قتل ہوگیا اجے تک ملزماں دی نشاندہی نہیں ہوئی، عمران نیازی نے ن لیگ دے قائدیناں نوں جیل وچ پایا کوئی گل نہیں، اج مارکیٹ وچ بخار دی دوا دستیاب نہیں۔