شہباز تے حمزہ دیاں عبوری ضمانتاں وچ10فروری تک توسیع

لہور( پنجابی میڈیا گروپ) لہور دی اسپشل سینٹرل کورٹ نے منی لانڈرنگ دے مقدمے وچ نامزد شہباز شریف تے حمزہ شہباز دیاں عبوری ضمانتاں وچ10فروری تک توسیع کر دتی۔ عدالت نے آئندہ سماعت اُتے چالان دیاں کاپیاں ملزماں نوں گھلن دی ہدایت کر دتی۔اسپشل سینٹرل کورٹ دے جج اعجاز اعوان نے اپوزیشن لیڈر شہباز شریف تے حمزہ شہباز دی عبوری ضمانتاں اُتے سماعت کیتی۔ حمزہ شہباز نے عدالت پیش ہو کے حاضری لوائی لیکن شہباز شریف کورونا پاروں پیش نہیں ہوئے تے حاضری معافی دی درخواست دائر کیتی۔عدالتی استفسار اُتے وکیل نے دسیا کہ شہباز شریف نوں کورونا دا شکار ہوئیاں 7 دن لنگ چکے نیں، کل دوبارہ ٹیسٹ ہوئے گا۔ ایف آئی اے دے وکیل نے موقف اختیار کیتا کہ ملزم دے پیش نہ ہون اُتے عدالت ضمانت کینسل کرسکدی اے۔دوران سماعت ایف آئی اے دے وکیل نے بیان دتا کہ اوہ درخواست ضمانت اُتے بحث لئی تیار نیں۔ ملزماں دے وکیل نے کارروائی ملتوی کرن دی استدعا کیتی۔ عدالت نے شہباز شریف تے حمزہ شہباز دی عبوری ضمانتاں وچ 10فروری تک توسیع کر دتی۔