اکبر ایس بابر اسکروٹنی کمیٹی نوں ثبوت دین وچ نکام رہے: فرخ حبیب

اسلام آباد( پنجابی میڈیا گروپ) فرخ حبیب ہوراں آکھیا کہ اکبر ایس بابر اسکروٹنی کمیٹی نوں ثبوت دیون وچ نکام رہے، اوہناں دی درخواست وچ دعوے جھوٹے ثابت ہوئے، ن لیگ 64 کروڑ روپے دا حساب نہیں دے رہی۔وزیر مملکت اطلاعات فرخ حبیب نے اسلام آباد وچ میڈیا نال گل بات کردیاں ہویاں آکھیا کہ اسکروٹنی کمیٹی نے اکبر ایس بابر دے دعویاں دا پول کھول دتا، اوہ فارن فنڈنگ دا کوئی ثبوت پیش نہیں کرسکے، اکبر ایس بابر کول پیش کرن لئی کجھ وی نہیں،اوہناں نوں کیس توں وکھ کرن لئی پٹیشن دائر کر دتی ۔فرخ حبیب ہوراں آکھیا کہ 64 کروڑ روپے دا ن لیگ کوئی جواب نہیں دے سکی، ن لیگ نے 9 بینک اکانٹس چھپائے، ساریاں سیاسی جماعتاں دے اکائونٹاں دی جانچ پڑتال ہونی چاہیدی اے، پیپلزپارٹی، ن لیگ قنون توں نٹھنا چاہندے نیں، الیکشن کمیشن اسکروٹنی کمیٹی نوں فوری طور اُتے فعال کرے، اسکروٹنی کمیٹی ن لیگ تے پیپلزپارٹی دے کیس دی رپورٹ جمع کرائے، مریم تے بلاول اپنے اکائو نٹاں اُتے گل کیوں نہیں کردے ؟ دونوں آکے سوالاں دے جواب دیون ۔پی ٹی آئی رہنما ہور آکھیا کہ تحریک انصاف قنون دا احترام کردی اے، ن لیگ عدلیہ اُتے حملے کر رہی اے، عدلیہ اُتے حملے دی اجازت نہیں دتی جاسکدی، راناثنااللہ دے بیاناں دی مذمت ن لیگ نے نہیں کیتی، مقصود تے مسرور کون اے؟ ایس داجواب دتا جائے، پہلی وار طاقتور نوں قنون توں خوف آ رہیا اے، جس نے وی ملک نوں لٹیا اے، اوس دا احتساب ہوئے گا۔