افواہیں نہ پھیلائیاں جان، سیاست نال کوئی لینا دینا نہیں: ترجمان پاک فوج

پنڈی(پنجابی میڈیا گروپ)پاک فوج دے شعبہ تعلقات عامہ(آئی ایس پی آر)دے ڈائریکٹر جنرل(ڈی جی)میجر جنرل بابر افتخار ہوراں آکھیاکہ افواہواں نہ پھیلائیاں جان،فوج دا سیاست نال کوئی لینا دینا نہیں۔ایئر فورس دے افسراں سنے میڈیا نال گل بات کردیاں ہویاں ترجمان پاک فوج نے آکھیا کہ9 مارچ نوں بھارتی حدود نال تیز رفتار چیز نوں ریڈار اُتے ویکھیا گیا۔ 9مارچ نوں 6 وج کے33 منٹ اُتے اک شئے نے پاکستانی فضائی حدود دی خلاف ورزی کیتی، پاکستان ایئرفورس نے اوس شے دی مکمل مانیٹرنگ کیتی ۔ اوس چیز نے اچانک رخ بدلیاتے پاکستان ول ودھن لگی۔ میجر جنرل بابر افتخار نے آکھیا کہ فلائنگ اوبجیکٹ غیرمسلح سی، پاک فضائیہ نے فلائنگ اوبجیکٹ دی مکمل مانیٹرنگ کیتی، فلائنگ اوبجیکٹ 3 منٹ24 سیکنڈ تک پاکستانی حدود وچ پروازکردا رہیا، پاکستان فضائی حدود دی خلاف ورزی دی مذمت کردا اے۔اپنی گل بات نوں جاری رکھدیاں ہویاں اوہناں نے آکھیا کہ پاکستان نوں ایس واقعے دی وضاحت دینی ہوئے گی، پاکستان نے ہمیشہ ذمہ دار ملک ہون دا ثبوت دتا اے۔ کوئی انسانی جان ضائع نہیں ہوئی صرف اک دیوار ڈِگی ۔ واقعہ دی جیہڑی وی وجہ ہوئے بھارت نوں جواب دینا ہوئے گا ۔ اگر پاکستان دی حدود وچ کوئی وی چیز داخل ہندی اے یا کوئی وی خلاف ورزی ہندی اے تے اوس دا بھرپور جواب دین لئی پاک فوج موجود تے تیار اے۔اک سوال دے جواب وچ ترجمان پاک فوج نے واضح کیتا کہ اوہ پہلاں وی کہہ چکے نیں پاک فوج دا سیاست نال کوئی لینا دینا نہیں ۔ جیہڑے لوگ مداخلت دیگل بات کردے نیں، اوس دا جواب وی اوہناں توں ہی منگیا جائے، اوہناں توں ثبوت منگیا جائے تے اگر کوئی گل کردا اے تے اوس کول اوس دے ثبوت وی ہون گے۔ میجر جنرل بابر افتخار نے پریس کانفرنس دے دوران ملک دی حالیہ سیاسی صورتحال دے سوال اُتے مختصر جواب دیندیاں ہویاں آکھیا کہ اوہ سیاسی امور اُتے گل نہیں کرنا چاہندے۔ نیوز کانفرنس دے دوران اک سوال دے جواب وچ ترجمان پاک فوج نے آکھیا کہ آرمی چیف جنرل قمر جاوید باجوہ دے دورہ امریکا دا کوئی شیڈول جاری نہیں ہویا۔