ملکی بہتری لئی آرمی چیف نال گل کرن نوں تیار ہاں،عمران خان

لہور( پنجابی میڈیاگروپ)پاکستان تحریک انصاف دے چیئرمین تے سابق وزیراعظم عمران خان نے آکھیا اے کہ میری اسٹیبلشمنٹ نال کوئی لڑائی نہیں، ملک دی بہتری لئی آرمی چیف نال گل بات کرن نوں تیار ہاں، کوئی گل نہیں کرنا چاہندا تاں میں کیہ کراں؟صحافیاں نال ملاقات وچ چیئرمین پی ٹی آئی عمران خان نے آکھیا کہ میں چیلنج کردا ہاں کہ میرے اُتے تے میری گھر والی اُتے اک کرپشن دا کیس ثابت کر دین،ساڈی اسٹیبلشمنٹ نوں سمجھ نہیں اے کہ سیاست کیہ ہُندی اے، پورا زور لایا گیا کہ پرویز الہی میرا ساتھ چھڈ دیوئے، ہُن اسیں پرویز الہی دے نال وفاداری وکھانی اے، میں کسی دے نال بے وفائی نہیں کر سکدا۔سابق وزیراعظم نے آکھیا کہ اگر اک ہی وار وچ عام الیکشن ہو جان تاں پیسے دی بچت ہوئے گی، اسیں پی ڈی ایم دے امپائراں دے باوجود الیکشن جِتاں گے،اوورسیز پاکستانی پی ٹی آئی دے نال نیں، مخصوص نشستاں اُتے عورتاں وی چاہندیاں نیں اوہ وزیراعلی پنجاب بنن، پنجاب دے وزیراعلی دا فیصلہ اجے کر لیا تاں قتل عام ہو جائے گا۔عمران خان نے آکھیا کہ مریم نواز ساڈی بہترین کھیڈاری اے، اوہ جو وی کردی اے فائدہ ساہنوں ہُندا اے۔چیئرمین پی ٹی آئی نے آکھیا کہ اسلام آباد ہوائی جہاز توں نہ جان دا فیصلہ رات 12 وجے کیتا،خبر آئی کہ مینوں ہوائی اڈے توں گرفتار کر کے بلوچستان لے جانا چاہندے سن، جنہاں نے میری حفاظت کرنی اے مینوں اوہناں توں ہی خطرہ اے، جیل وچ جان پاروں ہور ووٹ پیندے نیں۔