مریم نواز نے پارٹی وچ نویں روح پھونکی اے،خواجہ آصف

گوجرانوالہ( پنجابی میڈیاگروپ)مسلم لیگ (ن)دے سینئررہنما تے وفاقی وزیر دفاع خواجہ آصف نے آکھیا اے کہ وطن عزیز گھمبیر حالات توں لنگ رہیا اے،مریم نواز نے واپس آ کے تے پارٹی نوں سنبھال کے اک نویں روح پھونک دتی اے۔گوجرانوالہ وچ تنظیمی کنونشن نال خطاب کردیاں ہویاں لیگی رہنما خواجہ آصف نے آکھیا کہ جنہاں مشکلاں دا سامنا اے ساہنوں ہویا اے شاید ہی پاکستان دی تریخ وچ کسی حکمران نوں ہویا ہوئے ، ساڈے مخالف فراڈیے تے نوسرباز دیاں ساریاں سازشاں نکام ہویاں، اوس دی جیل بھرو تحریک وی نکام ہوئی، خود ضمانت کروا لئی تے کارکناں نوں آکھیا کہ جیل جان۔خواجہ آصف دا کہنا سی کہ نواز شریف وطن واپس آیا، بیٹی دا ہتھ پھڑکے جیل چلا گیا، پاکستان تے سیاست دی لاج رکھی، عدلیہ کمپرومائز ہوئی تے نوازشریف دے خلاف فیصلے آئے، ساڈی جدوجہد کامیاب ہوئے گی، اسیں منزل تک پہنچاں گے، میرا تے تہاڈا قائد واپس آئے گا۔