الیکشن دی تریخ ملنا آئین دی جِت اے،فوادچودھری

لہور( پنجابی میڈیاگروپ)پاکستان تحریک انصاف دے مرکزی رہنما وسابق وفاقی وزیر فواد چودھری نے آکھیا کہ پنجاب وچ الیکشن دی تریخ ملنا آئین دی فتح اے،سیاسی جماعتاں نوں چاہیدا اے کہ اقتداردا فیصلہ ہُن عوام نوں کرن دین۔صحافیاں نال گل کردیاں ہویاں اوہناں نے آکھیا کہ اقتدار دا فیصلہ نامزدگیاں اُتے نہیں عوام دے ہتھوں ہونا چاہیدا ، ہر آن والے دن دے نال حکومت دے دن پورے ہو رہے نیں، حکومت ایس قابل نہیں رہی کہ حیلے بہانے کر سکے۔فواد چودھری نے آکھیا کہ اسٹیبلشمنٹ اپنی پالیسی اُتے نظر ثانی کردیاں ہویاں عوام اُتے اعتبار کرے، حکومت نہیں اسٹیبلشمنٹ دی سوچ دی اہمیت اے، الیکشن فریم ورک اُتے گل بات کیلئے تیار ہاں، الیکشن فریم ورک اُتے گل بات لئی آئینی ترمیم دی لوڑ ہوئے گی۔اوہناں نے آکھیا کہ میں حکومت توں درخواست کراں گا کہ سیاسی جماعتاں تے اسٹیبلشمنٹ نوں نال لے کے اک دُوجیاں نوں جگہ دین، ساڈا ایس ویلے اسٹیبلشمنٹ نال کوئی رابطہ نہیں۔