وفاق نے وعدے پورے نہ کیتے تے وزارتاں چھڈ دیاں گے:بلاول بھٹو

کراچی( پنجابی میڈیاگروپ)وزیرخارجہ بلاول بھٹو زرداری نے آکھیا اے کہ وفاق ساڈے نال کیتے گئے وعدے پورے کرے ورنہ وزارتاں رکھنا مشکل ہوئے گا ۔کراچی وچ تقریب نال خطاب کردیاں ہویاں پیپلز پارٹی دے چیئرمین بلاول بھٹو زرداری نے آکھیا کہ سندھ حکومت سیلاب متاثرین دی مدد کر رہی اے، سیلاب نال زرعی معیشت نوں بوہت وڈا جٹھکا لگیا اے، ساہنوں زراعت دے شعبہ اُتے توجہ مرکوز کرنا ہوئے گی، چھوٹے کساناں دی مدد کرکے معیشت وچ بہتری لیا سکدے ہاں، مہنگائی نال ہر طبقہ مشکلاں دا شکار اے، زراعت وچ سرمایہ کاری نہیں کراں گے تے کنج زرعی ملک کہلائے گا ۔ وزیر خارجہ نے آکھیا کہ سندھ واحد صوبہ اے جس نے کنک دی قیمت4 ہزار روپے مقرر کیتی، آصف زرداری جَد صدر بنے تے پاکستان دے ایکسپورٹس بوہت گھٹ سن، ہر شے پاکستان امپورٹ کرواندا سی، یوکرین دے کساناں نوں ڈالر دے رہے ساں، آصف زرداری دے دور وچ زرعی شعبہ اُتے خصوصی توجہ دتی گئی، چھوٹے کساناں نوں اپنے پیراں اُتے کھڑا کرنا چاہیدا اے، پاکستان نوں زرعی شعبہ وچ خود کفیل بنانا اولین ترجیح اے۔