قوم چوراں خلاف کھڑی نہ ہوئی تے فیر ساڈا کوئی مستقبل نہیں:عمران خان

لہور( پنجابی میڈیاگروپ)چیئرمین پاکستان تحریک انصاف تے سابق وزیر اعظم عمران خان نے اکھیا کہ اگر قوم چوراں دے خلاف کھڑی نہ ہوئی تے ساڈا کوئی مستقبل نہیں۔زمان پارک وچ کارکناں نال خطاب کردیاں ہویاں سابق وزیر اعظم عمران خان نے آکھیا کہ تنخواہ دار طبقہ مہنگائی وچ پس گیا اے،جنہاں نوں ملک اُتے مسلط کیتا گیا اوہناں دا پیسہ باہر پئیا اے، کسی انسان، کسی ادارے سامنے کَدی جھکیا نہ تہانوںجھکن دیاں گا، چور تے ڈاکو صورتحال جیتھوں تک لے گئے، ہجوم نہیں قوم اوس دا مقابلہ کرے گی، اج ساڈا ملک دنیا سامنے ذلیل ہو رہیا اے۔اوہناں نے ہور آکھیا کہ وزیر اعظم دنیا توں پیسے منگ رہیا اے لوگ ٹھکرا رہے نیں، شہباز شریف نوں16 ارب روپے دے کرپشن کیس وچ سزا ہون لگی سی، جنرل باجوہ نے اوس نوں بچا کر وزیر اعظم بنا دتا، آصف زرداری پیچھے بیٹھ کے سارا کھیڈ کھیڈ رہیا اے، لندن وچ بیٹھیا بھگوڑا اوتھوں ملک نوںکنٹرول کررہیا اے جَد وڈے مجرم باہر بیٹھ کے فیصلے کرن گے تو ملک دیوالیہ ہی نکلے گا۔چیئرمین پاکستان تحریک انصاف نے آکھیا کہ جس قوم وچ ظلم دا مقابلہ کرن دی ہمت نہیں اوہ بھیڑ بکریاں بن جاندی اے، اج ایہ بھکاریاں منگوں قرض منگ رہے نیں کوئی نہیں دے رہیا، چور اُتے بیٹھے نیں ایس لئی کوئی قرض دین نوں تیار نہیں، حکمران اپنا پیسہ واپس لے آن تے آئی ایم ایف کول جان دی لوڑ نہیں، اپنا پیسہ باہر دے ملکاں وچ رکھیا اے تے لوکاں توں بھیک منگ رہے نیں۔