عمران خان دیاں تقریراں نشر کرن اُتے مکمل پابندی

اسلام آباد(پنجابی میڈیاگروپ)پاکستان الیکٹرانک میڈیا ریگولیٹری اتھارٹی(پیمرا)نے چینلاں اُتے چیئرمین تحریک انصاف عمران خان دیاں تقریراں تے بیان وکھان اُتے پابندی لا دتی۔پیمرا نے ساریاں سیٹلائٹ چینلاں نوں ہدایت جاری کر دتی کہ عمران خان دا بیان، گل بات یا خطاب چینلاں اُتے لائیو یا ریکارڈڈ نشر نہ کیتا جائے،سابق وزیر اعظم اداریاں اُتے حملے کر رہے نیں جس پاروں پابندی لائی گئی، اوہ اشتعال انگیر بیاناں نال ریاستی اداریاں تے افسراں دے خلاف نفرت پھیلارہے نیں۔ پی ٹی آئی دے مرکزی رہنما فواد چوہدری نے پیمرادے حکم اُتے ردعمل دیندیاں آکھیا کہ امپورٹڈ حکومت نے عمران خان دیاں تقریراں تے بیان چلان اُتے پابندی لا دتی، ٹھگاں دی حکومت مکمل گھبرا چکی اے۔فواد چوہدری نے آکھیا کہ عمران خان دی آواز دبان دی اک ہور مذموم کوشش کیتی گئی اے، اسیں ایس حکم نوں عدالت وچ چیلنج کراں گے تے میڈیا وی ایس حکم نوں چیلنج کرے۔حکومت نے پچھلے ورھے اگست وچ چیئرمین پی ٹی آئی دی براہ راست تقریر وکھان اُتے پابندی لائی سی جس نوں عمران خان نے اسلام آباد ہائی کورٹ وچ چیلنج کیتا سی۔ہائی کورٹ نے پیمرا دا نوٹیفکیشن کالعدم قرار دیندیاں اپنے ریماکس دتے سن کہ ٹی وی چینل تاخیری نظام تحت ممنوعہ مواد دی نشر روکن دے پابند نیں۔عدالت دا کہنا سی کہ پیمرا سپریم کورٹ دی ہدایت دی روشنی وچ قنون اُتے عمل کران دا پابند اے، اگر ممنوعہ مواد نشر ہویا تے پیمرا ٹی وی چینلاں دے خلاف کاروائی کر سکدا اے۔