پی ڈی ایم جماعتاں شکست تسلیم کر چکیاں نیں،شیخ رشید

اسلام آباد(پنجابی میڈیاگروپ)سربراہ عوامی مسلم لیگ تے سابق وزیرداخلہ شیخ رشید نے آکھیا اے کہ پی ڈی ایم دیاں پارٹیاں اپنے اپنے انتخابی نشان اُتے الیکشن لڑن جا رہیاں نیں، ایہ ذہنی طور اُتے شکست تسلیم کر چکے نیں تے الیکشن وچ رکاوٹ پیدا کرنا چاہندے نیں۔سماجی رابطے دی ویب سائٹ ٹوئٹر اُتے اپنے پیغام وچ سابق وفاقی وزیر شیخ رشید نے آکھیا کہ عمران خان لہور وچ اپنی الیکشن مہم شروع کررہے نیں میں وی اوہناں دے نال ہواں گا، ملک الیکشن ول جا رہیا اے، ہوسکدا اے کہ صوبے تے مرکز دے الیکشن اکٹھے ہو جان ۔ شیخ رشید نے آکھیا کہ خیبر پختونخوا دے گورنر نوں فضل الرحمان دی رشتہ داری توں وَدھ آئین تے قنون ول ویکھنا ہوئے گا، سپریم کورٹ نے واضح طور اُتے الیکشن کمیشن تے خیبر پختونخوا دے گورنر نوں الیکشن دی تریخ دین دا آکھیا اے۔