عدالت دے حکم اُتے عمران خان گرفتاری ہونا چاہیدا اے،خواجہ آصف

اسلام آباد(پنجابی میڈیاگروپ)وزیر دفاع خواجہ آصف نے آکھیا اے کہ عمران خان نے پچھلے کجھ دناں توں ڈرامہ لا رکھیا اے، عدالت حکم دیندی اے تے اوہناں دی گرفتاری ہونی چاہید اے، عدالتاں توں منہ چھپاندے پھرنا سیاسی رہنماواں دا شیوہ نہیں اے، جنرل (ر) پرویز مشرف توں لے کے جنرل (ر) قمر جاوید باجوہ تک عمران خان نے کَدی وی اسٹیبلشمنٹ دی پشت پناہی دے بغیر سیاست نہیں کیتی ، موجودہ آرمی چیف نال ملاقات لئی ترلے کر رہے نیں، پہلے جنرل (ر) باجوہ دی تعریف کردے سن، ہن کورٹ مارشل دا مطالبہ کر رہے نیں،عمران خان دی سیاست نوں جَد تک اسٹیبلشمنٹ دا وینٹی لیٹر نہ لگیا ہویا اوہناں دی سیاست دی کوئی حیثیت نہیں،ماضی وچ اسیں اَت گردی دے خلاف جنگ لڑی تے اوس اُتے قابو پایا، ایس وار وی ساری قوم دے نال متحد ہو کے اسیں ات گرداں اُتے قابو پالاں گے۔ منگل نوں ایتھے پریس کانفرنس کردیاں ہویاں خواجہ آصف نے آکھیا کہ دوحہ معاہدے تحت افغانستان پابند اے کہ اوس دی سرزمین ات گردی دے خلاف استعمال نہ ہوئے ، ایس چیز اُتے اسیں اوتھے جا کے اصرار وی کیتا کہ اوہ ایس معاہدے دی پاسداری کرن تے اوس اُتے قابو پان لئی اوہناں نوں تجویز وی دتی اے۔اوہناں نے آکھیا کہ ماضی وچ وی اسیں اَت گردی دے خلاف جنگ لڑی تے اوس اُتے قابو پایا، ایس وار وی ساری قوم دے نال متحد ہو کے اسیں اَت گردی اُتے قابو پالاں گے۔ خواجہ آصف نے آکھیا کہ عمران خان نے پچھلے کجھ دناں توں ڈرامہ لا رکھیا اے، اگر عدالت حکم دیندی اے تے عمران خان دی گرفتاری ہونی چاہیدی اے۔