وزیر داخلہ رانا ثنا اللہ دے ناقابل ضمانت وارنٹ گرفتاری جاری

گوجرانوالہ( پنجابی میڈیاگروپ)انسداد دہشتگردی دی عدالت نے مسلم لیگ(ن) دے مرکزی رہنما تے وزیر داخلہ رانا ثنا اللہ دے ناقابل ضمانت وارنٹ گرفتاری جاری کر دتے ۔گوجرانوالہ دی انسداد دہشت گردی عدالت وچ وفاقی وزیر داخلہ رانا ثنا اللہ نے حاضری توں استثنی دی درخواست دتی سی، عدالت نے درخواست خارج کردیاں ہویاں ناقابل ضمانت وارنٹ گرفتاری جاری کر دتے ۔ وفاقی وزیر داخلہ دے نا قابل ضمانت وارنٹ گرفتاری اے ٹی سی دے جج رانا زاہد اقبال خان نے جاری کیتے، عدالت نے پلس نوں حکم دتا اے کہ رانا ثنا اللہ نوں گرفتار کرکے 28مارچ نوں پیش کیتا جائے۔خیال رہے کہ رانا ثنا اللہ دے وارنٹ گرفتاری گجرات دے تھانہ انڈسٹریل وچ درج اک مقدمہ وچ جاری کیتے گئے سن، مقدمہ اگست 2022 وچ(ق)لیگ دے مقامی رہنما دی مدعیت وچ درج ہویا سی، ایف آئی آر وچ چیف سیکرٹری پنجاب تے اوہناں دے اہلخانہ نوں دھمکیاں دین دا الزام اے۔پچھلی سماعت اُتے پلس نے مقدمہ خارج کر کے رپورٹ عدالت وچ جمع کروائی سی جس اُتے عدالت نے اخراج رپورٹ مسترد کردیاں ہویاں رانا ثنا اللہ دے وارنٹ گرفتاری جاری کیتے سن، ناقص تفتیش اُتے مقدمہ دے تفتیشی افسر، ڈی ایس پی تے ایس پی انویسٹی گیشن نوں شوکاز نوٹس وی جاری کیتا گیا سی۔