چودھری پرویز الہی تحریک انصاف دے منتخب،نوٹیفکیشن جاری

لہور( پنجابی میڈیاگروپ)سابق وزیر اعظم عمران خان نے چودھری پرویز الہی نوں پاکستان تحریک انصاف دا باقاعدہ طور اُتے صدر بنا دتا ۔سابق وزیر اعلی پنجاب چودھری پرویز الہی دی بطور مرکزی صدر تقرری دانوٹیفکیشن جاری کر دتا گیا، تحریک انصاف دے مرکزی رہنما فواد چودھری نے چودھری پرویز الہی نال اوہناں دی رہائش گاہ اُتے ملاقات کیتی تے عمران خان ولوں نوٹیفکیشن دی کاپی پیش کیتی جس اُتے اوہناں نے چیئرمین تحریک انصاف دا شکریہ ادا کیتا۔ایس موقع اُتے گل کردیاں ہویاں چودھری پرویز الہی نے آکھیا کہ عمران خان نے جیہڑا اعتماد کیتا اوس لئی شکر گزار ہاں،اوہناں دے نال ڈٹ کے آئین تے قنون دی سربلندی لئی کوشش کراں گے، عمران خان ملک وچ آئین تے قنون تے عام آدمی دی جنگ لڑ رہے نیں ۔ سابق وزیر اعلی پنجاب چودھری پرویز الہی نے ہور آکھیا کہ عمران خان دا رستہ روکنا حکومت دے وَس دی گل نہیں اوہ عوام دے دلاں وچ وَس چکے نیں، ملک وچ ہون والا ہر سروے، ہر ضمنی الیکشن عمران خان دی مقبولیت دی گواہی دے رہیا اے۔