جنرل فیض حمید کا کورٹ مارشل ہونا چاہیدا اے،مریم نواز

اسلام آباد(پنجابی میڈیاگروپ) پاکستان مسلم لیگ (ن) دی سینئر نائب صدر مریم نواز شریف نے آکھیا اے کہ سابق ڈی جی آئی ایس آئی لیفٹیننٹ جنرل (ریٹائرڈ) فیض حمید نے 2 ورھے مسلم لیگ (ن) دی حکومت ڈیگن تے 4 ورھے عمران حکومت دی حمایت ذریعے ملک تباہ کرن وچ اپنا کردار ادا کیتا اے،اوہناں دا کورٹ مارشل کیتا جانا چاہیدا اے ، ہائبرڈ نظام لیان والیاں نوں وڈی سزا ووٹ نوں عزت دیو دی شکل وچ عوامی آگاہی مہم توں ملی اے،عمران خان دی ریٹائرڈ آرمی چیف اُتے تنقید بزدلی دی نشانی اے ، اسیں اج وی حاضر سروس دا کھلے عام نام لیندے نیں، ثاقب نثاراجے وی متحرک نیں، ججاں دی آڈیو لیک ہون نال سچائی اُتے مہر ثبت ہوگئی اے،ججاں دا محاسبہ کنج ہوئے گا؟ جَد جنرل باجوہ آرمی چیف بنے تے وزیراعظم ہائوس وچ اوہناں دی فیملی دے نال ملاقات ہوئی سی ۔ اک انٹرویو وچ سابق وزیرِاعظم نواز شریف دی صاحبزادی تے مسلم لیگ (ن) دی چیف آرگنائزر مریم نواز نے آکھیا کہ غیر آئینی کردار ادا کرن اُتے سابق ڈی جی آئی ایس آئی نوں نشانِ عبرت بنانا چاہیدا اے تاکہ آئندہ فیر کسی نوں ایس قسم دی جرآت نہ ہوئے ۔ اوہناں نے آکھیا کہ جَد جنرل فیض حمید حاضر سروس ڈی جی آئی ایس آئی سن تے اوہ اوہناں دے خلاف عدالت گئی دی۔اوہناں نے آکھیا کہ میں درخواست جمع کرائی سی تے ثبوت پیش کیتے سن جس وچ سب توں وڈا ثبوت ایہ سی کہ جنرل فیض اوس ویلت دے اسلام آباد ہائی کورٹ دے جج شوکت عزیز صدیقی صاحب دے گھر گئے سن تے اوہناں نوں کہنا سی کہ نواز شریف تے مریم نوں تُسی سزا دینی اے تے ضمانت نہیں دینی تے تہانوں نوں یاد ہوئے گا کہ اوہناں نے آن کیمرہ بیان دتا تے آکھیا کہ تہانوں کنج پتا کہ سزا ہوئے گی۔ اوہناںنے آکھیا کہ ساڈی2ورھیاں دی محنت اے۔مریم نواز نے آکھیا کہ 2ورھے جیہڑی اوہ (جنرل فیض) محنت کردے رہے تے اوس دے بعد جیہڑا عمران نوں لیان دے بعد 4 ورھے ایس ملک نوں تباہ و برباد کرن دی محنت کیتی اے اوس اُتے نہ صرف اوہناں دا کورٹ مارشل ہونا چاہیدااے بلکہ اوہناںنوں نشانِ عبرت وی بنانا چاہیدا اے۔