مریم نوازدے خلاف ٹوئٹ:ایف آئی اے سائبر کرائم نے فواد چودھری نوں سَدھ لیا

اسلام آباد(پنجابی میڈیاگروپ)ایف آئی اے سائبر کرائم اسلام آباد نے پاکستان تحریک انصاف دے رہنما تے سابق وفاقی وزیر فواد چودھری نوں نوٹس جاری کردتا۔ذرائع دے مطابق فواد چودھری نوں نوٹس ن لیگ دی چیف آرگنائزر مریم نواز دے خلاف ٹوئٹ اُتے انکوائری لئی جاری کیتا گیا اے، ایف آئی اے سائبر کرائم نے فواد چودھری نوں17مارچ نوں سدھ لیا ۔ سائبر کرائم وچ فواد چودھری دے خلاف اسلام آباد دے رہائشی محمد ہارون نے درخواست دتی سی ، درخواست وچ موقف اختیارکیتا گیا اے کہ فواد چودھری نے مریم نوازاُتے توشہ خانہ توں گھڑی لین دا جھوٹا الزام عائدکیتا، فواد چودھری نے12مارچ نوں شب9وج کے42 منٹ اُتے اشتعال انگیز تے جھوٹا ٹوئٹ جاری کیتا جس وچ پرائیویسی قنون دی خلاف ورزی کیتی گئی، ٹوئٹ ذریعے مریم نواز دے خلاف عوام نوں بھڑکایاگیا۔