عمران خان دا اتوارنوں مینارپاکستان جلسہ کرن دااعلان

لہور(پنجابی میڈیاگروپ)سابق وزیراعظم و پاکستان تحریک انصاف دے چیئرمین عمران خان نے لہوروچ ریلی نال خطاب وچ اتوار نوں مینارپاکستان اُتے جلسے دااعلان کردتا۔عمران خان دی قیادت وچ زمان پارک توں ریلی شروع ہوئی تے مختلف رستیاں توں ہندیاں ہویاں داتا دربار پہنچنا سی لیکن سابق وزیراعظم نے داتا دربار پہنچن توں پہلاں ہی خطاب کردتا۔خطاب وچ عمران خان دا کہنا سی کہ توشہ خانہ کیس وچ دودھ دا دودھ پانی دا پانی ہوگیا، توشہ خانہ گھڑی دے معاملے اُتے میرے اُتے بیحد تنقید کیتی گئی تے کیس بنایاگیا، ہر طرح نال میری کردار کشی کیتی گئی لیکن ن لیگ دی فنڈنگ سامنے آئی تے سب پتا لگ جائے گا۔اوہناں نے اعلان کیتاکہ اتوار نوں دن2وجے مینارپاکستان اُتے جلسہ کراں گا ،ساہنوں مل کے جدوجہدکرنی اے۔اوہناں دا کہنا سی کہ سب نوں پتااے میری جان نوںخطرہ اے، ملک اُتے چوراں دا ٹولہ مسلط اے، اینہاں چوراں دااحتساب تے حقیقی آزادی لئی قوم نوں نکلناہوئے گا۔عمران خان نے آکھیاکہ کامیاب تریخی ریلی اُتے مرکزی تے صوبائی قائدین نوں مبارکباد دینداہاں۔ریلی نال خطاب دے بعد چیئرمین پی ٹی آئی عمران خان واپس زمان پارک روانہ ہوگئے۔