عمران خان دی گرفتاری دی خبر اُتے ملک دے مختلف شہراں وچ احتجاج شروع

لہور(پنجابی میڈیاگروپ)سابق وزیر اعظم عمران خان دی گرفتاری دی خبراُتے ملک دے مختلف شہراں وچ تحریک انصاف دے کارکن احتجاج کرن سڑکاں اُتے نکل آئے۔کراچی دے مختلف علاقیاں اورنگی ٹائون، فورکے، فائیو سٹار، داد چورنگی، ماری پور، قیوم آباد ، سٹار گیٹ، شاہین کمپلیکس، سہراب گوٹھ، حسن اسکوائر وچ پی ٹی آئی دے کارکناں نے عمران خان دی گرفتاری اُتے احتجاجی مظاہرہ کیتا،احتجاج پاروں شہر دیاں اہم شاہراہواں بند کر دتیاں گئیاں۔اسلام آباد دے علاقے ترنول وچ تحریک انصاف دے کارکناں ولوں جی ٹی روڈ بند کر دتا گیا، جس دے بعد پلس دی نفری سَدھ لئی گئی، پلس نے آکھیا کہ اسلام آباد وچ کسی وی جگہ احتجاج نہیں کرن دیا جائے گا، اوس دے علاوہ پی ٹی آئی کارکن احتجاج لئی کمیٹی چوک پہنچے، مظاہرین نے حکومت دے خلاف شدید نعرے بازی کیتی۔سابق وزیراعظم عمران خان دے آبائی حلقہ وچ وی پی ٹی آئی کارکن سڑکاں اُتے نکل آئے، مظاہرین ولوں کمرمشانی دے مقام اُتے روڈ بلاک کردتا گیا، کبیروالا وچ تحریک انصاف دے کارکناں نے احتجاج کردیاں ہویاں ملتان اسلام آباد روڈ بلاک کردتا، مظاہرین نے حکومت دے خلاف سخت نعرے بازی کیتی