الیکشن دی تریخ اُتے اے پی سی دیاں گلاں اجے صرف ہوائی نیں، پرویز الٰہی

لہور( پنجابی میڈیاگروپ)مرکزی صدر تحریک انصاف و سابق وزیر اعلی چودھری پرویز الہی نے آکھیا اے کہ الیکشن دی تریخ اُتے آل پارٹیز کانفرنس (اے پی سی) دیاں گلاں اجے صرف ہوائی نیں ۔ مرکزی صدر تحریک انصاف چودھری پرویز الہی نال سابق وفاقی وزیر چودھری وجاہت حسین، سابق ایم پی ایز چودھری شجاعت نواز اجنالہ، چودھری خالد اصغر گھرال ایڈووکیٹ نے ملاقات کیتی، ملاقات وچ گجرات دی موجودہ سیاسی صورتحال سنے آئندہ الیکشن دے حوالے نال لائحہ عمل مرتب کیتا گیا۔ایس موقع اُتے گل کردیاں ہویاں چودھری پرویز الہی نے آکھیا کہ گرفتاریاں تے مذاکرات نال نال نہیں چل سکدے، حکومت نوں جماعت اسلامی دی کانفرنس نال کوئی دلچسپی نہیں، اوہ صرف عدلیہ دے فیصلے توں فرار چاہندی اے۔اوہناں نے آکھیا کہ جماعت اسلامی توں بہتر کوئی نہیں جاندا کہ نواز شریف، شہباز شریف قابل اعتماد نہیں، ایہ اوہی شہباز شریف اے، جنہاں نے واجپائی دی خوشنودی لئی قاضی حسین احمد اُتے پلس حملہ کرا دتا سی، مسلم لیگ ن نے جماعت اسلامی دے عمر رسیدہ کارکناں اُتے بدترین پلس تشدد کرایا سی۔