جیہڑاسپریم کورٹ دا فیصلہ نہیں مَنے گا نااہل ہوئے گا، اعتزاز احسن

لہور ( پنجابی میڈیاگروپ) پاکستان پیپلزپارٹی دے رہنما و معروف قنون دان اعتزاز احسن نے آکھیا اے کہ رانا ثنا اللہ عدالت آن تے دسن کہ تُسی کیوں آکھیا کہ 14مئی نوں الیکشن نہیں ہون دیاں گے، سپریم کورٹ نے پنجاب وچ 14مئی نوں الیکشن دا حکم دتا اے، جیہڑا سپریم کورٹ دا فیصلہ نہیں مَنے گا نااہل ہوئے گا ، عمران خان ناقابل شکست نہیں اے پر ایہ مقدمے بنا کے عمران دا سیاسی قد ودھا رہے نیں۔لہور ہائی کورٹ باہر میڈیا نال میڈیا نال گل کر دیاں ہویاں اعتزاز احسن نے آکھیا کہ بحث نوں الجھان دی کوشش کیتی جا رہی اے، اصل مسئلہ اک ہی اے کہ کیا پنجاب تے کے پی الیکشن 90 دناں وچ ہونے نیں یا نہیں، بینچ 7ممبراں دا ہوئے یا 9دا یا فل کورٹ، ایس وش اُلجھان دی کوشش کیتی جا رہی اے، آئین وچ لکھیا اے کہ الیکشن 90دناں وچ ہون گے، پنجاب دے نگراں غیر آئینی ہو گئے نیں، کوئی رقم، کوئی پیسہ نہیں خرچ کیتا جا سکدا، سوال ایہ اے کہ 90دناں وچ الیکشن کیوں نہیں ہوئے؟اوہناں نے آکھیا کہ انتظامیہ وچ جیہڑے براہِ راست ذمے دار نیں اوہناں وچ رانا ثنا اللہ، اعظم نذیر تارڑ تے وزیر اعظم شہباز شریف شامل نیں، پارلیمنٹ نال کوئی جنگ نہیں کرنا چاہندا، اگر پارلیمنٹ نے کجھ کہہ دتا اے تے تُسی چیف ایگزیکٹیو نوں پچھنا اے، شہباز شریف نے کیبنٹ وچ لے جا کے کیوں فیصلہ کیتا کہ سپریم کورٹ دے فیصلے دے بر خلاف ساہنوں چلنا اے؟ اینہاں3یا4 لوکاں وزیرِ اعظم، وزیرِ قنون، وزیرِ داخلہ تے الیکشن کمشنر نوں سپریم کورٹ سَدھے تے اوہناں توں پچھے کہ تُسی پارلیمنٹ توں باہر بیان دتا اے کہ سپریم کورٹ دے فیصلے دا انکار کرنا اے، تے کیوں نہ تہانوں سزا ہوئے ۔اگر رانا ثنا اللہ کہن گے کہ ایہ بیان نہیں دتا تے اوہناں دے بیان دی ریکارڈنگ اوہناں دے سامنے چلا دیون، ہن اوہناں نوں مننا پئے گا، اگر اوہ من جاندے نیں کہ میں آکھیا کہ میں بڑا راجپوت آں، فیر وڈا سمپل ہو گیا، اوہناں نے اقبالِ جرم کر لئیا،تُسی اوہناں نوںبے شک عدالت دے برخاست ہون تک سزا کر دیو تے جَد سزا ہوئے گئی تُسی یوسف رضا گیلانی ونگوں نا اہل ہو جاو گے۔