لہور ہائی کورٹ نے پنجاب پلس نوں عمران خان نوں ہراساں کرن توں روک دتا

لہور ( پنجابی میڈیاگروپ) لہور ہائی کورٹ نے پنجاب پلس نوں پاکستان تحریک انصاف دے چیئرمین و سابق وزیر اعظم عمران خان نوں ہراساں کرن توں روکدیاں ہویاں آکھیا اے کہ کیس دی سماعت تک سائل دے نال قنون مطابق سلوک کیتا جائے گا۔چیئرمین تحریک انصاف عمران خان نے اک ہی نوعیت دے مقدمے درج تے تادیبی کارروائی خلاف درخواست دی چھیتی سماعت دی استدعا کیتی سی ،عمران خان نے درخواست نوں سماعت لئی مقرر کرن لئی متفرق درخواست دائر کردیاں ہویاں موقف اپنایا سی کہ لہور ہائی کورٹ دے 2رکنی بینچ نے درخواست سماعت لئی لارجر بینچ نوں گھلی لیکن ریاستی مشینری دا استعمال کر کے سیاسی انتقام دا نشانہ بنایا جا رہیا اے۔اوہناں دا کہنا سی کہ عدالت عمران خان دی درخواست نوں اج ہی مقرر کرن دا حکم دیوے۔اوس دے علاوہ عید دے دناں وچ زمان پارک وچ ممکنہ آپریشن روکن لئی وی لہور ہائی کورٹ وچ درخواست دائر کردتی گئی۔اظہر صدیق ایڈووکیٹ دے توسط نال لہور ہائی کورٹ وچ دائر کیتی گئی درخواست وچ آئی جی پنجاب، چیف سیکریٹری سنے ہوراں نوں فریق بنایا گیا اے۔ درخواست وچ موقف اپنایا گیا کہ پلس ولوں عید دے دناں وچ زمان پارک اندر آپریشن کرن دی تیاری کیتی جا رہی اے،ساریاں کیساں وچ ضمانت اُتے ہاں لیکن پلس ہراساں کرن دا ارادہ رکھدی اے۔عدالت توں استدعا کیتی گئی کہ زمان پارک وچ ممکنہ آپریشن روکن بارے حکم امتناع جاری کرے۔