ثاقب نثار سیاسی دکان چمکان لئی عدالت لاندے سن،وزیراعظم

پنڈی(پنجابی میڈیا گروپ)وزیراعظم شہباز شریف نے اک وار فیر سابق چیف جسٹس نوں آڑے ہتھوں لیندیاں ہویاں آکھیا اے کہ ثاقب نثارغریب نوں انصاف لئی نہیں سیاسی دکان چمکان لئی عدالت لاندے سن ،ثاقب نثار حنیف عباسی نوں شکست دلوان لئی شیخ رشید دے ایجنٹ بن کے حلقے وچ گئے۔میڈیا نمائندیاں نال گل کردیاں ہویاں وزیراعظم شہباز شریف نے آکھیا کہ مریضاں داعلاج کرنا بوہت وڈی عبادت اے، ایس ہسپتال دی تعمیر وچ 5 ارب روپے لگ چکے نیں،ہسپتال نوں بوہت پہلاں دُکھی انسانیت دی خدمت وچ کردار ادا کرنا چاہیدا سی۔اوہناں نے آکھیا کہ پچھلی حکومت نے ایس ہسپتال نوں ردی دی ٹوکری وچ سُٹ دتا سی لیکن کورونا دے دناں وچ وی اسپتال نے بے پناہ خدمات انجام دتیاں۔وزیراعظم نے سابق چیف جسٹس نوں آڑے ہتھاں لیندیاں ہویاں آکھیا کہ اک شخص دن رات کہنداسی کہ شہباز شریف نے 20 ارب روپے کیتھے لائے، اوہ شخص کہندا سی کہ 20 ارب روپے غرق ہوگئے نیں۔