مفت آٹا پیکج ملکی تاریخ دا سبھ توں وڈا سکینڈل ثابت ہوئے گا:چودھری پرویز الٰہی

لہور( پنجابی میڈیاگروپ)سابق وزیر اعلی پنجاب چودھری پرویز الٰہی نے آکھیا اے کہ مفت آٹا فراہمی پیکیج ملکی تریخ دا سب توں وڈا سکینڈل ثابت ہوئے گا۔مرکزی صدر تحریک انصاف چودھری پرویز الٰہی نال سابق وفاقی وزیر چودھری وجاہت حسین، برگیڈیئر اعجاز شاہ، سابق وزرا چودھری ظہیر الدین، با رضوان، چودھری لیاقت علی بھدر، سابق مشیر وزیر اعلی پنجاب ڈاکٹر زین بھٹی، بیرسٹر ارحم طارق بٹ، بیرسٹر عزیز، بیرسٹر حمزہ، سلمان خان تے فرخ ایڈوکیٹ نے ملاقات کیتی، ایس دوران سیاسی صورتحال اُتے تفصیلی تبادلہ خیال کیتا گیا۔ایس موقع اُتے گل بات کردیاں ہویاں چودھری پرویز الہی نے آکھیا اے کہ الیکشن کمیشن، سٹیٹ بینک تے پارلیمنٹ سمیع اللہ نال کلیم اللہ دا کھیل کھیڈ رہے نیں، سپریم کورٹ دے حکم اُتے الیکشن کمیشن نوں مختص رقم دینا ہوئے گی، جمہوریت دے استحکام تے تحفظ لئی سب نوں آئین و قنون اُتے عمل کرنا ہوئے گا، مفت آٹا فراہمی ملکی تریخ دا سب توں وڈا سکینڈل ثابت ہوئے گا۔سابق وزیر اعلی پنجاب چودھری پرویز الٰہی نے آکھیا کہ نگران دور وچ کنک ، آٹا، چینی تے کھاد دی سمگلنگ وَدھ گئی اے، غیر منتخب نمائندے عوامی فلاحی منصوبیاں دے التوا دا باعث بن رہے نیں، شہباز شریف توہین عدالت دے مرتکب ہو چکے، ہُن فیصلے دا انتظار اے، عمران خان دے4 سالہ دور وچ ملک ترقی اُتے گامزن ہویا۔