وزیر اعظم دی زیر صدارت اجلاس، اتحادیاں دا پی ٹی آئی نال غیر مشروط مذاکرات اُتے اتفاق

اسلام آباد( پنجابی میڈیاگروپ)وزیر اعظم شہباز شریف دی زیر صدارت ہون والے اتحادی جماعتاں دے اجلاس دی اندرونی کہانی سامنے آ گئی اے، معاشی حالات اُتے اتحادی رہنماواں نے تحفظات دا اظہار کر دتا ۔وزیر اعظم ہاوس وچ ہون والے اہم اجلاس وچ اتحادی رہنماواں نے موجودہ سیاسی صورتحال اُتے تبادلہ خیال کیتا، وزیر اعظم شہباز شریف ولوں امیر جماعت اسلامی سراج الحق نال ہون والی ملاقات بارے وی رَلتیاں نوں آگاہ کیتا گئیا، پیپلز پارٹی نے اجلاس وچ مذاکرات دے حوالے نال سیاسی جماعتاں نال ہون والی مشاورت بارے بریفنگ دتی ۔حکومتی اتحاد نے کسی وی سیاسی فریق نال مشروط مذاکرات نوں یکسر مسترد کردیاں ہویاں آکھیا کہ سیاست وچ گل بات دے دروازے ہر ویلے کھلے نیں، اگے ودھن لئی کسی نوں وی شرطاں طے نہیں کرنیاں چاہیدیاں، اسیں ملک لئی بے لوث تے بامقصد گل بات کرن لئی تیار ہاں۔اتحادیاں نے عمران خان دے رویے نوں ہٹ دھرمی قرار دیندیاں آکھیا کہ قوم وچ نفرتاں پھیلان والے مذاکرات وچ وی سنجیدہ نہیں، اقتدار نوں اک ورھا مکمل ہون اُتے اطمینان دا اظہار کیتا گیا، رَلتیاں نے آکھیا اک سال دوران چیلنجاں تے مشکلاں دا ڈٹ کے مقابلہ کیتا گیا، قوم نوں تنہا نہیں چھڈاں گے۔اجلاس وچ عدالتی امور اُتے وی قنونی ٹیم نے تفصیلی بریفنگ دتی، ایس دوران قنونی ٹیم دیاں کوششاںنوں وی سراہیا گیا، وزیر اعظم نے فردا فردا ساریاں رہنماواں نال موجودہ سیاسی صورتحال اُتے اوہناں دی رائے لئی،ساریاں اتحادی جماعتاں نے وزیر اعظم شہباز شریف دی قیادت اُتے مکمل اعتماد دا اظہار کیتا ۔ذرائع مطابق اجلاس وچ عمران خان یا تحریک انصاف نال بیک ڈور رابطیاں دا وی جائزہ لئیا گیا، قومی اسمبلی توں منظور کردہ قوانین کل سینیٹ توں منظور کرائے جان گے، اتحادی جماعتاں وچ اتفاق رائے دے بعد تحریک انصاف نال مذاکرات کرن یا نہ کرن دا فیصلہ کیتا جائے گا۔اجلاس وچ جے یو آئی نے موقف اپنایا کہ عمران خان کوئی سیاسی قوت نہیں، ایس لئی اسیںپی ٹی آئی نال ڈائیلاگ دی مخالفت کردے ہاں، شاہ زین گبٹی نے وی آکھیا کہ اسیں ڈائیلاگ دے عمل دے مخالف نہیں لیکن عمران خان اک جھوٹا انسان اے، جیہڑا بھروسے دے لائق نہیں۔ایس موقع اُتے وزیر خارجہ بلاول بھٹو زرداری نے اپوزیشن نال مذاکرات دے معاملے اُتے اصرار کردیاں ہویاں آکھیا کہ گل بات دے دروازے بند کر لینا نہ صرف ساڈے اصولاں دے برخلاف اے بلکہ ایہ غیرجمہوری تے غیرسیاسی وی اے۔ بلاول بھٹو نے ہور آکھیا کہ ایہ ویلے دی لوڑاے کہ ڈائیلاگ دا رستہ اختیار کرکے ملک نوں بحران توں کَڈیا جائے، چھوٹیاں جماعتاں وی مذاکرات دے حوالے نال بلاول بھٹو دے موقف دی حمایت کیتی۔