عمران نیازی نوں پروٹیکٹ کرن لئی عدلیہ آہنی دیوار بن گئی اے،وزیراعظم

اسلام آباد (پنجابی میڈیا)وزیر اعظم شہباز شریف نے آکھیا اے کہ عمران نیازی نوں پروٹیکٹ کرن لئی عدلیہ آہنی دیوار بن گئی اے، عمران نیازی نوں دھاندلی تے جھرلونال وزیراعظم بنایا گیا سی تے لیان والیاں دا مقصد سب نوں چور،ڈاکو قرار دلوانا سی، عمران نیازی نوں10ورھیاں تک مسلط رکھن دا منصوبہ سی، اگر عمران خان خائن تے بددیانت نہیں اے تے عدالت وچ اپنی بے گناہی ثابت کرے۔جمعہ نوں وزیر اعظم شہباز شریف نے وفاقی کابینہ دے اجلاس وچ اظہار خیال کردیاں ہویاں آکھیاکہ معاشی حالات نال نمٹن لئی کابینہ پوری کوشش کررہی اے، پچھلے ورھے سیلاب دیاں تباہ کاریاں تے عالمی کساد بازاری پاروں مہنگائی دے طوفان تے پچھلی حکومت ولوں توڑے گئے آئی ایم ایف معاہدے نوں پورا کرن لئی جیہڑیاں کوششاں کیتیاں جا رہیاں نیں ایس بارے وزیر خزانہ بریفنگ دیون گے۔اوہناں نے آکھیاکہ پی ٹی آئی دی لیڈرشپ نے ملک نوں تباہی دے دہانے اُتے پہنچان لئی جیہڑا گھناؤنا کردار ادا کیتا اے، اوہ اج پاکستان لئی بوہت وڈا سوالیہ نشان بن چکیا اے،تُسی چنگی طرح جاندے او کہ جَد ساڈی حکومت آئینی طریقے نال آئی تے فی الفور عمران نیازی نے ایہ آکھیا کہ ایہ حکومت امریکا نے سازش کر کے بنوائی اے تے ایس سلسلے وچ اوہ تے اوہناں دے حواری لگاتار باور کران لئی بے شرمی نال جھوٹ بولدے رہے۔اوہناںنے آکھیاکہ نیشنل سیکیورٹی کمیٹی دی اک توں وَدھ میٹنگاں ہوئیاں تے ایس وچ باقاعدہ بحث دے بعد اعلامیہ جاری ہویا کہ کوئی سازش نہیں تے ایس طرح اسیں امریکا نال اپنے تعلقات خراب کرن وچ کوئی کسر نہیں چھڈ رہے ہاں۔اوہناں نے آکھیا کہ میں نے بطور وزیر اعظم تے وزیر خارجہ نے اپنے تئیں ایس نقصان اُتے قابو پان دی کوشش کیتی تے امریکا دے سفیرتے وفد نال اسیں ملے، وزیر خارجہ امریکا گئے تے بھرپور کوشش کیتی کہ ایہ جیہڑا نقصان پہنچان دی سازش کیتی اے، ایس نوں کنٹرول کیتا جائے تے فیر اک دن آیا کہ عمران خان گویا ہوئے کہ امریکا نے کوئی سازش نہیں کیتی، کیا ایہ کوئی بالاں دی کھیڈ اے کہ تُسی عالمی سفارتکاری وچ کسی ایسے ملک دے نال تعلقات وگاڑن لئی آخری حد تک لے جان تے فیر راتوں رات تہانوں الہام ہویا کہ کوئی سازش نہیں ہوئی۔